Read Iban Mark 6 Bible Online

Mark 6 - Iban bible

Mark 6

¹Jesus angkat ari endur nya lalu pulai baru ngagai menua Iya Empu, lalu sida murid Iya nitihka Iya.

² Lebuh hari Sabat, Iya belabuh ngajar dalam balai gempuru, lalu mayuh orang alit ati ninga Iya. Ku sida, “Dini alai orang tu bulih semua utai tu? Nama penemu-dalam tu ti udah diberi ngagai Iya? Nama kereja ajih ti benung dikereja Iya tu?

³ Ukai enda Iya tu tukang kayu, anak Maria, menyadi James, Joses, Judas, enggau Simon? Ukai enda sida menyadi indu Iya bisi ditu enggau kitai?” Sida lalu nulak Iya.

⁴ Lalu ku Jesus bejaku ngagai sida, “Nabi endang dibasa orang, kelimpah ari di menua iya empu, enggau ba bala kaban belayan iya empu, enggau dalam rumah iya empu.”

⁵ Lalu Iya enda ulih ngereja kereja ajih dia, kelimpah ari ngengkahka jari atas dua tiga iku orang ke sakit, lalu ngeraika sida.

⁶ Lalu Iya balat alit ati ke penadai pengarap sida. Udah nya Iya bejalai ngagai genturung pendiau, ngajar orang.

⁷Iya lalu ngangauka sida ke dua belas iku ngagai Iya, lalu ngasuh sida bejalai dua iku sepasang, lalu meri sida kuasa atas roh ti jai.

⁸Iya enda nyagi sida mai utai lebuh sida bejalai, semina tungkat aja: enda mai roti, kandi, duit dalam belulang sida,

⁹tang semina ngena selipar, lalu enda tau mai baju kena besilih.

¹⁰Ku Iya bejaku ngagai sida, “Lebuh kita tama ngagai rumah orang, diau dia nyentuk ngagai maya kita mupuk ari endur nya.

¹¹ Enti orang dia enggai nerima kita lalu enggai mendingka kita, tesai abus[19] ari kaki kita lebuh kita mupuk ari endur nya, nyadika saksi kena ngelaban sida.”

¹² Sida mupuk, lalu madahka semua orang enda tau enda nesal ati ke dosa sida.

¹³ Lalu sida muru mayuh antu, lalu nata mayuh orang ke sakit ngena minyak, lalu ngeraika sida.

¹⁴ Raja Herod[20] bisi ninga pasal nya, laban berita pasal Jesus udah ditemu orang mayuh. Sekeda orang nyebut, “John Pemaptisa udah diangkatka ari mati. Nya kebuah kuasa nya bekereja dalam Iya.”

¹⁵Tang ku sida ti bukai, “Iya nya Elijah.” Lalu ku sekeda sida ti bukai, “Iya nya nabi, baka siku ari sida nabi ke dulu kelia.”

¹⁶Tang lebuh Herod ninga nya, iya lalu bejaku, “John Pemaptisa, ti udah dipumpung aku pala, udah diangkatka ari mati.”

¹⁷ Laban Herod udah ngasuh orang nangkap John, lalu nanchang iya dalam rumah jil, ketegal Herodias, bini menyadi iya Philip, laban Herod udah ngambi Herodias nyadika bini iya empu.

¹⁸Laban John udah bejaku ngagai Herod, “Nuan enda tau ngambi bini menyadi nuan!”

¹⁹ Diatu Herodias bedendam ngagai John, lalu keran deka munuh iya, tang enda ulih

²⁰ laban Herod takutka John, laban iya nemu John endang orang ke lurus sereta kudus. Lebuh iya mendingka John, ati iya beba, tang taja pia iya rindu mendingka John.

²¹Tang siti peluang datai lebuh Herod, kena hari pengada iya, meri pengerami makai besai ke orang ke orang ke gawa dalam istana, bala pemesai enggau bala tuai bansa di menua Galili.

²²Lebuh anak dara Herodias tama lalu betanda, Herod enggau bala pengabang rindu meda iya. Raja lalu bejaku ngagai indu nya, “Pinta ari aku sebarang utai ti dikedekaka nuan, lalu aku deka meri utai nya ngagai nuan.”

²³ Herod lalu besemaya ngena jaku sumpah ngagai indu nya, “Aku deka meri ngagai nuan sebarang utai ti dipinta nuan. Indah setengah ari menua ti dipegai aku deh deka aku beri ngagai nuan!”

²⁴Indu nya pansut, lalu bejaku enggau indai iya, “Nama utai ti patut dipinta aku?” Indai iya lalu nyaut, “Pala John Pemaptisa.”

²⁵Indu nya lalu tekala nya beguai-guai pulai baru ngagai raja, lalu bejaku, “Aku minta nuan meri ngagai aku diatu pala John Pemaptisa ba atas pinggai!”

²⁶Raja lalu balat tusah ati; tang laban iya udah besumpah di mua bala pengabang, iya enggai nulak peminta indu nya.

²⁷Iya lalu tekala nya ngangauka siku jejaga, lalu ngasuh iya ngambi pala John.[21] Jejaga nya mupuk lalu mumpung pala John dalam rumah jil,

²⁸mai pala John ngena pinggai, lalu meri pala nya ngagai indu nya. Indu nya lalu meri pala nya ngagai indai iya.

²⁹Lebuh sida murid John ninga pasal nya, sida datai lalu ngambi bangkai John, lalu nguburka iya.

³⁰Sida rasul pulai lalu begelumu ngelingi Jesus, lalu madah ngagai Iya semua utai ti udah dikereja enggau diajar sida.

³¹Iya lalu bejaku ngagai sida, “Aram kitai mupuk ngagai endur ti sunyi, kediri kitai aja, lalu belelak dia enda lama.” Laban mayuh amat orang datai pulai, datai ke Jesus enggau bala murid Iya nyau nadai peluang alai makai.

³² Sida lalu mupuk, ngena sebuah perau ngagai endur ti sunyi, kediri sida aja.

³³Tang mayuh orang meda sida bekejang, lalu ngelala sida. Nya alai sida berumban-rumban datai ari semua nengeri, lalu datai ba endur nya dulu agi ari sida.

³⁴ Lebuh Jesus niki ke tebing, Iya lalu tepedaka mayuh amat orang, lalu Iya sinu ati ke sida, laban sida baka bedus ti nadai orang ngibun. Iya lalu belabuh ngajar sida mayuh macham utai.

³⁵Lebuh hari nyau udah lemai, sida murid Iya datai ngagai Iya, lalu bejaku, “Menua tu nadai mensia, lalu hari pen nyau jauh udah lemai.

³⁶Asuh sida mupuk ngambika sida ulih bejalai ngagai umai enggau genturung pendiau ti semak ditu, lalu meli pemakai ke diri empu.”

³⁷ Tang ku Jesus nyaut sida, “Kita empu meri sida utai diempa.” Sida lalu nanya, “Kati Nuan ngasuh kami mupuk lalu meli roti rega dua ratus singkap duit pirak[22] ke diempa sida?”

³⁸Iya lalu nanya sida, “Berapa iti tuku roti dikemisi kita? Uji abas dulu.” Lebuh sida udah nemu pemayuh roti, sida lalu madah ngagai Iya, “Lima iti tuku roti, enggau dua iku ikan.”

³⁹Jesus lalu bejaku ngagai sida murid Iya ngasuh semua orang mayuh duduk beraban-raban ba rumput.

⁴⁰Orang mayuh lalu duduk beraban-raban, seratus enggau ngelima puluh iku dalam siti-siti raban.

⁴¹ Iya lalu ngambi lima iti tuku roti, enggau dua iku ikan nya, engkadah ke langit, meri terima kasih[23] lalu mechahka roti nya, lalu nyuaka roti nya ngagai sida murid Iya, ngambika disadung ngagai orang mayuh. Iya mega magi ikan ti dua iku nya ngagai semua sida.

⁴²Semua sida bela makai lalu kenyang magang.

⁴³Sida murid ngumpul dua belas bakul penuh repik[24] roti enggau ikan nya.

⁴⁴Pemayuh orang ke makai roti nya lima ribu iku.

⁴⁵Jesus lalu kemaya nya ngasuh sida murid Iya nepan sebuah perau, lalu mupuk dulu ari Iya ngagai Betsaida, di seberai danau nya, benung Iya ke ngasuh orang mayuh pulai.

⁴⁶Lebuh Iya udah meri selamat tinggal ngagai orang mayuh, Iya lalu niki ngagai bukit sigi, deka besampi.

⁴⁷Lebuh hari nyau lemai, perau ti dikena sida murid Iya benung ba tengah danau, lalu Jesus keDiri ba darat.

⁴⁸ Iya meda sida bebendar amat bedayung nanjak ribut. Kira entara pukul tiga enggau pukul enam pagi, Iya bejalai ba atas ai mansang ngagai sida. Iya baru deka mansa sida,

⁴⁹lalu lebuh sida meda Iya bejalai ba atas ai, sida ngumbai Iya antu, lalu sida nyerauh,

⁵⁰ laban semua sida bela meda Iya lalu takut. Tang Iya tekala nya bejaku ngagai sida, “Anang takut! Aku tu. Anang takut!”

⁵¹Iya lalu nepan ngagai perau sida. Ribut lalu teduh. Semua sida lalu balat alit ati,

⁵² laban sida enda meretika pasal tuku roti, laban ati sida kieh.

⁵³Lebuh sida udah ngelayang ke seberai, sida lalu sangkai di Genesaret, lalu nanchangka perau sida.

⁵⁴Lebuh sida angkat ari perau, orang mayuh lalu tekala nya ngelala Jesus.

⁵⁵Sida lalu berumban nesau orang mayuh di serata menua nya, lalu bebaika orang ke sakit ngena peninduk sida ngagai sebarang endur alai sida ninga Jesus bisi.

⁵⁶ Lalu di sebarang endur ti digagai Jesus, nemuka genturung pendiau, nengeri, tauka di umai, sida ngalika orang ke sakit ba sebelah pasar, lalu minta Iya nejuka sida ke sakit negu puting serayung Iya, lalu semua orang ke negu serayung Iya gerai magang.