Read Iban Mark 7 Bible Online

Mark 7 - Iban bible

Mark 7

¹Lebuh orang Parisi enggau sekeda pengajar Adat ke datai ari Jerusalem begelumu ngelingi Iya,

²sida meda sekeda murid Jesus makai ngena jari ti enda tuchi, reti nya, enda dibasu.

³(Laban orang Parisi, enggau semua orang Judah, enda makai enti sida apin masu jari sida nitihka ajar aki ini sida;

⁴ lalu sida enda makai utai ti udah dibeli ari pasar, enti utai nya apin dibasu.[25] Lalu sida mayuh adat asal ti bukai ti dititihka sida, baka bebasuka mangkuk, periuk enggau pekekas bukai ti digaga ari temaga.[26])

⁵ Nya alai orang Parisi enggau sida pengajar Adat lalu nanya Iya, “Nama kebuah murid Nuan enda nitihka adat sida ke tuai,[27] tang makai ngena jari ti enda tuchi?”

⁶ Jesus lalu nyaut sida, “Betul jaku nabi Isaiah lebuh iya benabika pasal kita ke pura-pura ngapa tu, munyi ti udah ditulis: ‘Orang tu ngemesaika Aku ngena mulut sida, tang ati sida jauh ari Aku.

⁷Sida ngelebuka diri nyembah Aku, laban sida meri ajar mensia lalu ngumbai nya adat Aku.’

⁸Kita ngelengkaka pesan Allah Taala, lalu bepegai ba ajar mensia.”

⁹Lalu ku Iya bejaku ngagai sida, “Kita pintar nulak pesan Allah Taala, ngambika kita nitihka ajar kita empu.

¹⁰ Laban ku Moses, ‘Bebasaka apai enggau indai kita.’ Lalu iya mega nyebut, ‘Barang sapa bejai apai indai diri, enda tau enda dibunuh.’

¹¹Tang ku kita, enti orang madah ngagai apai tauka indai iya, ‘Utai ti patut diberi aku ngagai nuan, udah diberi aku ngagai Allah Taala,’[28]

¹²iya enda ibuh ngereja sebarang utai ke apai tauka indai iya.

¹³Nya jalai kita muai jaku Allah Taala lalu nukar iya ngena ajar kita empu, ti diberi kita ngagai orang. Lalu kita ngereja mayuh utai bukai ti baka nya.”

¹⁴Iya lalu ngangauka orang mayuh ngagai Iya baru, lalu bejaku ngagai sida, “Pendingka Aku, semua kita, lalu mereti:

¹⁵Nadai utai ti tama ngagai mensia tau ngasuh iya enda tuchi. Utai ti ngasuh mensia enda tuchi nya utai ti pansut ari mensia.”

¹⁶Awakka orang ke bisi pending, ninga!

¹⁷ Lebuh Iya ninggalka orang mayuh, lalu tama ngagai rumah, sida murid Iya lalu nanya Iya pasal jaku sempama nya.

¹⁸ Ku Iya bejaku ngagai sida, “Kati kita lalu enda mereti? Kati kita enda nemu, utai ti tama ari luar ngagai mensia, enda ulih ngasuh iya enda tuchi?

¹⁹Laban utai nya ukai tama ngagai ati, tang tama ngagai perut, lalu udah nya pansut ari tubuh.”[29] (Lebuh Iya nyebut nya, Iya madahka semua pemakai tau diempa magang.)[30]

²⁰Lalu ku Iya, “Utai ti pansut ari mensia, nya utai ti ngasuh iya enda tuchi.

²¹Laban ari dalam mensia, ari ati mensia pansut runding ti jai: bambai, ngenchuri, munuh orang,

²² butang, amu, ulah ti jai, nipu orang, ulah ti kamah, kepapas, bejakuka orang, sumbung, enggau pemeli.

²³Semua utai ti jai nya pansut ari ati mensia; nya utai ti ngasuh iya enda tuchi.”[31]

²⁴ Jesus angkat ari endur nya, lalu mupuk ngagai menua Tire.[32] Iya lalu tama ngagai sebuah rumah, lalu enggai nejuka orang nemu Iya bisi dia. Tang Iya enda ulih belalai ari sidai.

²⁵Siku indu, ke bisi anak indu ke dirasuk antu, tekala nya ninga pasal Jesus. Iya lalu datai lalu nyungkurka diri di kaki Jesus.

²⁶Nyadi indu nya orang bansa Gerika,[33] asal ari menua Poenisia, di menua Siria. Lalu iya minta Jesus muru antu ari anak indu iya.

²⁷Ku Jesus bejaku ngagai iya, “Awakka sida ke mit diberi makai dulu, laban kitai enda patut ngambi pemakai ari sida ke mit lalu nibarka pemakai nya ngagai ukui.”

²⁸Tang ku indu nya nyaut Iya, “Sigi amat, Tuan. Indah ukui ti di baruh mija deh makai repik pemakai sida anak mit!”

²⁹Lalu ku Jesus bejaku ngagai iya, “Laban nuan udah nyebut nya, nuan tau mupuk. Antu nya udah pansut ari anak indu nuan!”

³⁰Indu nya lalu pulai, lalu nemu anak iya gali ba katil, lalu antu nya nadai agi ba anak iya.

³¹ Udah nya Jesus mulaika Diri ari menua Tire, lalu bejalai nengah menua Sidon mansang ngagai Danau Galili, ngerenchah menua Sepuluh Buah Nengeri.

³² Orang lalu mai ngagai Iya siku lelaki ke bengal sereta bisu; sida lalu minta Jesus ngengkahka jari Iya atas orang nya.

³³ Jesus lalu mai orang nya ke tisi, ngejang ari bala mayuh. Iya ngachukka tunjuk Iya ngagai lubang pending orang nya, ngeludah dilah iya lalu negu dilah iya nya,

³⁴engkadah ke langit, meresu ngesuhka seput, lalu bejaku ngagai orang nya, “Epata,” reti nya, “Tebuka meh!”

³⁵Tekala nya orang nya lalu ulih ninga, dilah iya ulih engkebut, lalu iya ulih bejaku enggau terang.

³⁶ Jesus lalu enda nyagi sida nusui pasal nya ngagai orang. Tang makin balat Iya enda nyagi sida, makin balat agi ga sida nusui utai nya.

³⁷Sida balat amat alit ati. Ku sida, “Semua utai ti dikereja Iya manah magang! Iya ngasuh orang ke bengal ulih ninga, lalu ngasuh orang ke bisu ulih bejaku!”