Read Iban Mark 8 Bible Online

Mark 8 - Iban bible

Mark 8

¹ Lebuh maya nya, mayuh amat orang begempuru, lalu sida nadai utai diempa. Nya alai Iya ngangauka sida murid Iya, lalu bejaku ngagai sida,

²“Aku sinu ati ke bala orang tu, laban sida udah enggau Aku tiga hari, lalu nadai utai diempa.

³Enti Aku ngasuh sida pulai lapar, sida deka lepi di rantau jalai, lalu sekeda sida datai ari jauh.”

⁴Ku sida murid nyaut Iya, “Baka ni ku kitai meri bala orang tu makai di menua puang tu?”

⁵Iya lalu nanya sida, “Berapa iti tuku roti dikemisi kita?” “Tujuh,” ku sida nyaut.

⁶Iya lalu ngasuh orang mayuh duduk ba tanah. Iya ngambi tujuh iti tuku roti nya, lalu lebuh Iya udah meri terima kasih, Iya mechahka roti nya, lalu nyuaka roti nya ngagai sida murid Iya, ngambika sida nyadung utai nya ngagai orang mayuh. Sida lalu nyadung roti nya.

⁷Sida mega bisi dua tiga iku ikan ti mit. Lebuh Iya udah merekatka ikan nya, Iya mega ngasuh sida murid nyadung ikan nya.

⁸Semua sida makai, lalu kenyang magang. Sida lalu ngumpul tujuh bakul penuh teda repik pemakai nya.

⁹Orang ke makai nya kira empat ribu iku. Iya lalu ngasuh orang mayuh pulai.

¹⁰Iya nepan perau enggau sida murid Iya, lalu mupuk ngagai pelilih menua Dalmanuta.[34]

¹¹ Orang Parisi datai lalu belabuh betalat enggau Jesus, minta Iya ngayanka tanda ari serega, kena sida nguji Iya.

¹² Iya lalu meresu ngesuhka seput, lalu bejaku, “Nama kebuah orang ke rebak diatu minta tanda? Enggau bendar Aku madah ngagai kita, nadai tanda deka diberi ngagai rebak ti diatu!”

¹³ Iya lalu ninggalka sida, nepan perau nya baru, lalu ngelayang ke seberai.

¹⁴Nyadi sida murid enda ingat mai roti. Sida semina bisi setuku aja dibai sida dalam perau nya.

¹⁵ Lalu Jesus nangkan sida enggau jaku, “Bejimat kita, sereta bejaga ari ragi orang Parisi, enggau ragi Herod.”

¹⁶Sida lalu berandauka nya enggau pangan diri, “Laban kitai nadai roti.”

¹⁷ Jesus nemu utai ti dikerandauka sida, lalu ku Iya bejaku ngagai sida, “Nama kebuah kita berandauka pasal nadai roti? Kati kita lalu apin nemu tauka mereti? Nama kebuah ati kita kieh?

¹⁸ Kita bisi mata, lalu kita enda meda? Kita bisi pending, lalu kita enda ninga? Kati kita enda ingat?

¹⁹ Lebuh Aku mechahka lima iti tuku roti ke lima ribu iku orang, berapa bakul teda digumpul kita?” “Dua belas,” ku sida nyaut.

²⁰ “Lalu tujuh iti tuku roti ke empat ribu iku orang, berapa bakul teda digumpul kita?” “Tujuh,” ku sida nyaut.

²¹Iya lalu bejaku ngagai sida, “Lalu kita mengkang enda mereti?”

²² Sida lalu datai di Betsaida. Sekeda orang lalu mai ngagai Iya siku orang ke buta, minta Iya negu orang nya.

²³ Iya lalu megai jari orang nya, lalu nguluka iya pansut ari nengeri nya. Lalu lebuh Iya udah ngeludah mata orang nya, lalu ngengkahka jari Iya ba orang nya, Iya lalu nanya, “Kati nuan bisi meda utai?”

²⁴Orang nya engkadah, lalu bejaku, “Aku meda orang, tang sida baka kayu bejalai.”[35]

²⁵Jesus lalu ngengkahka jari Iya baru ba mata orang nya. Orang nya lalu merening enggau naka ulih, lalu mata iya pulai suman baru sereta lansik.

²⁶Jesus lalu ngasuh iya pulai ke rumah, ku Iya, “Anang tama ngagai nengeri nya.”[36]

²⁷Udah nya Jesus enggau sida murid Iya mupuk ngagai mayuh bengkah genturung pendiau di Siseria Pilipi, lalu di rantau jalai Iya nanya sida murid Iya, “Sapa Aku tu ku orang?”

²⁸ Sida lalu nyaut Iya, “John Pemaptisa. Orang bukai ngumbai Nuan Elijah, lalu sida ti bukai ngumbai Nuan siku ari sida nabi.”

²⁹ Iya lalu nanya sida, “Kati ku kita? Sapa Aku tu ku kita?” Peter lalu nyaut, “Nuan tu Kristus.”[37]

³⁰ Jesus lalu berat-rat enda nyagi sida madahka pasal Iya ngagai orang.

³¹Iya lalu belabuh ngajar sida murid Iya, madahka Anak Mensia enda tau enda balat diperinsa, lalu ditulak sida tuai bansa, sida tuai imam, enggau sida pengajar Adat, lalu dibunuh, lalu tiga hari udah bekau nya Iya deka angkat idup baru.

³²Iya madahka tu enggau terang ngagai sida. Peter lalu mai Iya ke tisi, lalu belabuh ngerara Iya.

³³ Tang Jesus nguing lalu merening ngagai sida murid Iya, lalu ngerara Peter. Ku Iya, “Rari nuan ari Aku, Sitan. Laban nuan berundingka utai mensia, ukai utai Allah Taala.”

³⁴ Iya lalu ngangauka orang mayuh sereta enggau sida murid Iya, lalu bejaku ngagai sida, “Enti orang deka nitihka Aku, awakka sida badu agi berundingka diri empu, ngesan regang diri, lalu nitihka Aku.

³⁵ Laban barang sapa deka ngidupka nyawa diri, deka ngelenyauka iya, lalu barang sapa ngelenyauka nyawa diri ketegal Aku, enggau ketegal Berita Manah, deka ngidupka iya.

³⁶Laban nama penguntung orang, enti iya bempu semua dunya tang ngelenyauka nyawa diri?

³⁷Laban nama utai ti ulih diberi orang kena iya nyilih nyawa diri?

³⁸ Barang sapa malu ke Aku sereta malu ke ajar Aku di mua rebak ti jai sereta bedosa tu, Anak Mensia deka mega malu ke orang nya lebuh Iya datai dalam mulia Apai Iya sama enggau bala melikat Iya ti kudus.”