Read Iban Luke 1 Bible Online

Luke 1 - Iban bible

Luke 1

¹Tabi Teopilus: Laban mayuh orang udah nguji ngena jalai ti betusun nuliska cherita pasal utai ti udah nyadi ba bala kami,

² nitihka cherita ti udah ditusui ngagai kami ulih orang ke meda utai nya nyadi kenyau ari pun, lalu udah nusui pesan nya,

³ nya alai, lebuh aku udah enggau bejimat mansik semua utai nya kenyau ari pun, aku mega berunding deka nuliska utai nya ngena chara ti betusun, ke nuan, Tuan ti dipebasaka,

⁴ ngambika nuan nemu utai ti bendar pasal semua utai ti udah diajar ngagai nuan.

⁵ Lebuh Herod nyadi raja di menua Judea,[1] bisi siku imam benama Sekariah.[2] Iya peturun Imam Abijah. Bini iya peturun Aron, lalu nama iya Elisabet.

⁶Seduai iya sama lurus di mua Allah Taala, ngasika semua pesan enggau adat Tuhan.

⁷Tang seduai iya nadai anak, laban Elisabet mandul, lalu seduai iya pen nyau tuai amat umur.

⁸Nyadi sekali, lebuh Sekariah benung bekereja nyadi imam di mua Allah Taala, lebuh raban iya bekereja dalam Rumah Sembiang sehari nya,

⁹ iya kena pilih ngena chara bechabut undi, nitihka adat asal sida imam, lalu iya tama ngagai Rumah Sembiang Tuhan lalu nunu menyan.

¹⁰Lebuh maya menyan benung ditunu, semua orang mayuh besampi di luar.

¹¹ Siku melikat Tuhan lalu pegari di mua Sekariah, bediri muak ari kanan alta ti alai nunu menyan.

¹²Lebuh Sekariah meda melikat nya, iya tekenyit sereta balat amat takut.

¹³ Tang ku melikat nya bejaku ngagai iya, “Anang takut, Sekariah, laban sampi nuan udah didinga Allah Taala,[3] lalu bini nuan Elisabet deka ngadaka anak lelaki siku, lalu nuan deka meri iya nama John.

¹⁴Nuan deka gaga sereta lantang ati, lalu mayuh orang deka rami gaga ati lebuh iya ada,

¹⁵ laban iya deka nyadi orang ke besai di mua Tuhan. Iya enda tau ngirup wain tauka ai ti bisa. Indah sebedau iya ada deh Iya deka dipenuhka enggau Roh Kudus.

¹⁶Iya deka nguingka mayuh orang Israel ngagai Tuhan Allah Taala sida.

¹⁷ Ngena roh enggau kuasa Elijah iya deka bejalai dulu ari Tuhan, nguingka ati apai indai ngagai anak sida, enggau nguingka orang ke enda ngasi ngagai penemu-dalam orang ke lurus, nyendiaka bala nembiak Tuhan, ke udah disedia ke Tuhan.”

¹⁸ Sekariah lalu bejaku ngagai melikat nya, “Baka ni ku aku nemu utai tu deka nyadi? Laban aku nyau tuai, lalu bini aku mega nyau tuai.”

¹⁹ Melikat nya lalu nyaut, “Aku tu Gabriel, ke bediri di mua Allah Taala, lalu aku udah diasuh bejaku ngagai nuan, lalu mai Berita Manah tu ngagai nuan.

²⁰Tang diatu laban nuan enda arapka jaku aku, ti deka dikamatka ba maya ti patut, nuan deka bisu, enda ulih bejaku nyentuk ngagai hari semua utai nya nyadi.”

²¹Lebuh utai nya benung nyadi, orang ke di luar nganti Sekariah, lalu sida iranka kebuah iya lama amat dalam Rumah Sembiang.

²²Lebuh iya pansut, iya enda ulih bejaku ngagai sida. Nya baru sida nemu iya bisi udah meda genera dalam Rumah Sembiang. Iya majak ngaga tanda ngena jari iya, lalu mengkang enda ulih bejaku.

²³Lebuh iya udah nembuka pengawa iya dalam Rumah Sembiang, iya pulai ke rumah.

²⁴Udah bekau nya, bini iya Elisabet lalu betubuh-bisi, lalu iya enda pansut ari rumah lima bulan. Ku Elisabet bejaku,

²⁵ “Tu meh utai ti udah dikereja Tuhan ke aku, lebuh Iya kasihka aku, lalu muai pemalu ti udah ditatka aku di mua orang mayuh!”

²⁶Dalam bulan ti keenam Elisabet betubuh-bisi, Allah Taala ngasuh melikat Gabriel datai ngagai sebuah nengeri ti dikumbai Nasaret di menua Galili,

²⁷ ngagai siku dara bungas ke betunang enggau lelaki siku ke benama Josep ke ari peturun David. Nama dara bungas nya Maria.

²⁸Melikat nya datai ngagai iya, lalu bejaku, “Tabi ke nuan, ke dikerinduka Allah Taala! Tuhan bisi enggau nuan!”[4]

²⁹Tang Maria beba runding ninga jaku melikat nya, lalu belematika reti jaku tabi nya.

³⁰ Lalu ku melikat nya bejaku ngagai iya, “Anang takut, Maria, laban nuan dikerinduka Allah Taala.

³¹ Lalu diatu nuan deka betubuh-bisi, lalu ngadaka anak lelaki siku, lalu nuan deka meri iya nama Jesus.

³² Iya deka nyadi orang ke tinggi pangkat, lalu Iya deka dikumbai Anak Allah Taala ti Pemadu Tinggi, lalu Tuhan Allah Taala deka meri Iya kerusi diraja aki Iya David.[5]

³³ Iya deka merintah peturun Jakop belama iya, lalu Perintah Iya enda nemu abis!”

³⁴ Maria lalu bejaku ngagai melikat nya, “Baka ni ku utai tu tau nyadi, laban aku dara bungas?”[6]

³⁵ Ku melikat nya bejaku enggau iya, “Roh Kudus deka datai atas nuan, lalu kuasa Allah Taala ti Pemadu Tinggi deka ngayung nuan. Nya alai anak mit ti deka diadaka[7] nya kudus. Iya deka dikumbai Anak Allah Taala.

³⁶Lalu diatu petunggal nuan Elisabet benung betubuh-bisi taja pen iya nyau tuai. Tu keenam bulan iya betubuh-bisi, taja pen iya dikumbai mandul.

³⁷ Laban nadai utai enda ulih dikereja Allah Taala.”

³⁸Maria lalu bejaku, “Aku tu nembiak Tuhan. Awakka utai nya nyadi ba aku nitihka jaku nuan.” Melikat nya lalu ninggalka iya.

³⁹Maria angkat lalu beguai-guai mupuk ngagai sebuah nengeri di menua Judah ti bebukit,

⁴⁰tama ngagai rumah Sekariah, lalu meri tabi basa ngagai Elisabet.

⁴¹Lebuh Elisabet ninga jaku tabi Maria, anak mit ti dalam kandung Elisabet lalu engkebut. Penuh laban Roh Kudus, Elisabet

⁴² lalu bejaku enggau nyawa ti inggar, “Beberekat meh nuan ari semua indu bukai, lalu beberekat meh anak ke dikandungka nuan!

⁴³Lalu nama kebuah utai tu nyadi ba aku, datai ke indai Tuhan aku nyau nemuai ngagai aku?

⁴⁴Laban lebuh aku ninga jaku tabi nuan tadi, anak mit ke dalam kandung aku engkebut gaga ati.

⁴⁵Beberekat meh iya ke arapka jaku Tuhan deka dikamatka!”

⁴⁶ Maria[8] lalu bejaku, “Semengat aku[9] ngemesaika Tuhan,

⁴⁷lalu ati aku gaga ke Allah Taala ti Juruselamat aku,

⁴⁸ laban Iya udah kasihka[10] nembiak Iya ke baruh ati. Belabuh ari diatu semua serak deka ngumbai aku beberekat

⁴⁹laban Allah Taala ti bekuasa udah ngereja utai ti besai ke aku. Kudus meh nama Iya.

⁵⁰Iya mandangka pengasih Iya ngagai orang ke nangika Iya, ari serak siti ngagai serak siti.

⁵¹Iya udah mandangka pengering Iya ngena lengan Iya lalu udah mambarka orang ke sumbung enggau semua pelan sida.

⁵² Iya udah muai raja ti bekuasa ari kerusi diraja sida, lalu ngeninggika orang ke baruh ati.

⁵³Iya udah ngenyangka orang ke lapar enggau utai ti manah, lalu muru sida ke kaya pulai puang.

⁵⁴Iya udah nulung nembiak Iya Israel, kena Iya ngingatka pengasih Iya,

⁵⁵ nitihka semaya ti digaga Iya enggau aki ini kitai, ngagai Abraham enggau ngagai peturun iya belama iya.”

⁵⁶Maria lalu diau enggau Elisabet kira tiga bulan. Udah nya iya pulai ngagai rumah iya empu.

⁵⁷Maya pen datai alai Elisabet deka beranak. Iya lalu ngadaka anak lelaki siku.

⁵⁸Orang ke berimbai pendiau enggau iya, enggau kaban belayan iya ninga Tuhan udah ngayanka pengasih ti besai ngagai iya, lalu sida sama rami gaga ati enggau iya.

⁵⁹ Ba hari ti kelapan sida lalu datai deka nutus anak mit nya, lalu sida deka meri iya nama Sekariah, ngangkatka nama apai iya.

⁶⁰Tang ku indai iya bejaku, “Ukai nya! Nama iya John.”

⁶¹Sida lalu bejaku ngagai iya, “Nadai kaban belayan nuan bisi nama nya!”

⁶²Sida lalu bejaku ngena jari enggau apai iya, nanyaka nama ti deka diberi iya ngagai nembiak nya.

⁶³ Sekariah lalu minta papan tulis, lalu nulis, “Nama iya John.” Semua sida lalu balat alit ati.

⁶⁴Tekala nya mulut Sekariah tebuka, dilah iya ulih engkebut, lalu iya belabuh bejaku muji Allah Taala.

⁶⁵Semua orang ke berimbai pendiau enggau sida bela takut magang. Lalu semua utai nya dikenang orang magang di serata menua ti bebukit di menua Judea.

⁶⁶Semua orang ninga nya lalu belematika utai nya. Ku sida, “Namaka penyadi nembiak tu ila?” Laban kuasa[11] Tuhan amat bisi enggau iya.

⁶⁷Apai iya Sekariah, ke penuh laban Roh Kudus, lalu benabi.

⁶⁸“Pujika Tuhan Allah Taala ke disembah orang Israel, laban Iya udah kasihka nembiak Iya lalu nebus sida.

⁶⁹Iya udah nyendiaka siku Juruselamat ti bekuasa ke kitai, ari peturun nembiak Iya David,

⁷⁰munyi ti disebut Iya dulu kelia ngena sida nabi Iya ti kudus

⁷¹madahka kitai deka diselamatka ari munsuh kitai, enggau ari jari semua orang ke begedika kitai.

⁷²Nya meh jalai Iya udah ngayanka pengasih ti udah disemaya Iya ngagai aki ini kitai lalu udah ngingatka sempekat Iya ti kudus,

⁷³semaya ti digaga Iya ngena sumpah enggau aki kitai Abraham ngambika

⁷⁴ngelepaska kitai ari jari munsuh kitai, ngambika kitai betuaika Iya enggau nadai penakut,

⁷⁵dalam pengudus enggau pengelurus di mua Iya sepemanjai umur kitai.

⁷⁶ Lalu nuan, anak, deka dikumbai nabi Allah Taala ti Pemadu Tinggi, laban nuan deka bejalai dulu ari Tuhan nyendiaka jalai ke Iya,

⁷⁷ meri penemu pasal pengelepas ngagai nembiak Iya lebuh dosa sida diampun.

⁷⁸ Ulih pengasih Allah Taala kitai, penampak ari serega deka manchar ngagai kitai,

⁷⁹ ngambika meri penampak ngagai orang ke diau dalam pemetang enggau dalam kelemayang pemati, lalu ngiring kaki kitai ngagai jalai pemaik.”

⁸⁰ Anak mit nya mansang besai, kering dalam tubuh enggau roh, lalu iya diau di menua puang nyentuk ngagai maya iya ngayanka diri ngagai orang Israel.