Read Iban Luke 10 Bible Online

Luke 10 - Iban bible

Luke 10

¹ Udah nya Tuhan lalu milih tujuh puluh iku[49] sida ti bukai, lalu ngasuh sida bejalai dulu ari Iya, dua-dua iku begulai, ngagai genap buah nengeri enggau endur ti deka digusung Iya Empu.

² Ku Iya bejaku ngagai sida, “Utai ti diketau mayuh, tang orang ke ngetau[50] mimit. Nya alai besampi minta orang ke bempu umai ngirumka mayuh agi orang ngetau[51] umai Iya.

³ Mupuk meh kita! Ingat, Aku ngasuh kita bejalai baka anak domba ngagai raban ukui kampung.

⁴ Anang mai kandi duit, tauka kambut, tauka selipar. Lalu anang nabi orang di rantau jalai.

⁵ Sebarang rumah alai kita tama, sebut dulu, ‘Awakka pemaik meruan dalam rumah tu.’

⁶Enti orang ke rinduka pemaik bisi dalam rumah nya, pemaik kita deka mengkang ba orang nya. Enti enda pia, pemaik nya deka pulai baru ngagai kita.

⁷ Diau ba rumah nya, lalu empa irup sebarang utai ti diberi sida ngagai kita, laban orang ke gawa endang patut diberi gaji. Anang mindah ari rumah sebuah ngagai rumah sebuah.

⁸Genap kali kita datai ba sebuah nengeri, lalu sida nerima kita, empa sebarang utai ti diberi ngagai kita.

⁹Geraika orang ke sakit dalam nengeri nya, lalu sebut ngagai sida, ‘Perintah Allah Taala udah datai semak kita.’

¹⁰ Tang genap kali kita tama ngagai nengeri, lalu sida enda nerima kita, bejalai kita nengah jalai raya di nengeri nya lalu sebut,

¹¹‘Indah abus ari nengeri kita empu, ti lekat ba kaki kami, deh ditesai kami, kena ngelaban kita. Tang awakka kita nemu tu: Perintah Allah Taala udah datai semak!’

¹² Aku madah ngagai kita, lebuh Hari Pechara[52] ila, Allah Taala deka lebih agi kasihka Sodom ari ke kasihka nengeri nya!

¹³ “Tulah meh nuan, Korasin! Tulah meh nuan, Betsaida! Laban enti kereja ajih ti dikereja dalam seduai, udah dikereja di Tire enggau di Sidon, sida tentu lama udah nesal ati, lalu ngerasuka kain guni, lalu ngerabu pala diri enggau amau. [53]

¹⁴Tang lebuh Hari Pechara ila Tire enggau Sidon deka nyamai agi ari kita.

¹⁵ Lalu nuan, Kapernaum! Kati nuan deka diangkat ke serega? Enda. Nuan deka dibuai ngagai neraka!”[54]

¹⁶ Barang sapa mendingka kita, mendingka Aku, lalu barang sapa nulak kita, nulak Aku. Lalu barang sapa nulak Aku, nulak Iya ke ngirumka Aku.”

¹⁷Sida tujuh puluh [55] iku pulai enggau ati ti gaga. Ku sida, “Tuhan, indah antu deh ngasika[56] kami dalam nama Nuan!”

¹⁸ Ku Jesus bejaku ngagai sida, “Aku meda Sitan labuh ari langit baka kilat.

¹⁹ Dinga kita! Aku udah meri kita kuasa ngindik ular enggau kala, sereta ngalahka[57] kuasa munsuh, lalu nadai utai ulih ngemediska kita.

²⁰ Tang anang kita gaga ati ketegal antu nunduk ngagai[58] kita, tang awakka ati kita gaga laban nama kita ditulis di serega.”

²¹ Iya lalu gaga ati dalam roh[59] lalu bejaku, “Aku meri terima kasih[60] ngagai Nuan Apai, Tuhan ti bekuasa di serega enggau di dunya, laban Nuan udah ngelalaika utai nya ari orang ke bepenemu-dalam sereta bepelajar, lalu udah mandangka utai nya ngagai bala anak mit. Sigi amat, Apai, laban nya endang peneka Nuan.[61]

²² Semua utai udah diserahka Apai Aku ngagai Aku, lalu nadai orang nemu sapa Anak, semina Apai aja; tauka nemu sapa Apai, tang semina Anak aja, enggau sebarang orang ke dipilih Anak alai Iya mandangka Apai.”

²³ Jesus lalu nguing ngagai sida murid Iya, lalu bejaku ngagai sida kediri, “Beberekat meh mata ke meda utai ti dipeda kita!

²⁴Laban, Aku madah ngagai kita, mayuh nabi enggau raja udah keran deka meda utai ti dipeda kita, tang nadai meda utai nya; keran deka ninga utai ti didinga kita, tang nadai ninga utai nya.”

²⁵ Siku pengajar Adat lalu bediri, deka nguji Jesus. Ku iya, “Pengajar, nama utai ti enda tau enda dikereja aku ngambika aku bulih pengidup ti meruan belama iya?”

²⁶Jesus lalu nyaut iya, “Nama utai ti ditulis dalam Adat? Nama utai ti dibacha nuan dia?[62]

²⁷ Orang nya lalu nyaut, “Rinduka Tuhan Allah Taala nuan enggau pengabis ati nuan, enggau pengabis semengat nuan, enggau pengabis pengering nuan, enggau pengabis runding nuan, lalu rinduka pangan nuan baka nuan ke rinduka diri empu.”

²⁸ Jesus lalu bejaku ngagai iya, “Betul saut nuan; kereja nya, nya baru nuan deka idup.”

²⁹Tang pengajar Adat nya ingin deka mandangka diri nemu utai ti disebut diri, nya alai iya lalu nanya Jesus, “Sapa pangan aku?”

³⁰Jesus lalu nyaut, “Nyadi sekali orang siku nurun ari Jerusalem mansang ngagai Jeriko. Bala penyamun ngamuk iya, nelanjaika iya, malu iya, lalu ninggalka iya setengah mati.

³¹Seninjik bendar siku imam bejalai nengah jalai nya, lalu lebuh iya tepedaka orang nya, iya lalu ngelaung nengah tisi sepiak.

³²Baka nya mega siku orang Lewi, lebuh iya datai ba endur nya lalu tepedaka orang nya, iya mega ngelaung nengah tisi sepiak.

³³ Tang lebuh siku orang Samaria bejalai nengah jalai nya, iya tepedaka orang nya, lalu kasihka iya.

³⁴Iya mansang ngagai orang nya, nuang minyak enggau wain ba bakal orang nya, lalu malut bakal iya. Udah nya iya nepanka orang nya ba jelu iya empu, mai iya ngagai rumah numpang, lalu ngintu iya.

³⁵Hari siti, iya mantaika dua singkap duit pirak,[63] lalu meri duit nya ngagai orang ke bempu rumah numpang nya. Ku iya, ‘Intu iya. Lebuh aku pulai kitu baru, aku deka mayar nuan ungkus ti lebih ari nya ti dikena nuan ngintu iya.’ ”

³⁶Dalam penemu nuan, sapa ari sida tiga nya pangan orang ke diamuk penyamun nya?”

³⁷Ku pengajar Adat nya nyaut, “Orang ke kasihka iya.” Jesus lalu bejaku ngagai iya, “Mupuk meh nuan lalu kereja baka nya.”

³⁸ Lebuh Jesus enggau sida murid Iya benung di rantau jalai, Iya datai ba sebuah genturung pendiau, alai siku indu ke benama Marta ngelaluka Iya tama ngagai rumah iya.

³⁹Nyadi Marta bisi menyadi indu siku benama Maria, ke duduk semak kaki Tuhan, mendingka utai ti disebut Iya.

⁴⁰Tang Marta nejuka diri dikelimpangka mayuh macham pengawa. Nya alai iya mansang ngagai Jesus lalu nanya, “Tuhan, kati Nuan enda ibuhka menyadi aku ninggalka aku kediri mela utai? Asuh iya nulung aku!”

⁴¹ Tang ku Tuhan nyaut iya, “Marta, Marta! Nuan irau sereta nejuka diri dikelimpangka mayuh macham utai.

⁴²Semina siti aja utai ti beguna. Maria udah milih utai ti manah agi, lalu utai nya enda ulih dirampas ari iya.”