Read Iban Luke 12 Bible Online

Luke 12 - Iban bible

Luke 12

¹ Lebuh beribu-ribu iku orang begempuru, datai ke sida nyau teindikka kaki pangan diri, Jesus bejaku ngagai sida murid Iya. Ku Iya, “Bejaga kita ari ragi orang Parisi, reti nya ari jaku sida ti pura-pura ngapa.

² Nadai utai ti ditudung enda dikebakka, lalu nadai utai ti dilalaika, enda ditemu.

³Nya alai, utai ti udah disebut kita dalam petang, deka didinga lebuh siang hari, lalu utai ti dipetelaika kita di bilik, deka disadaka ari puchuk perabung.

⁴ “Aku madah ngagai kita, unggal, anang takutka orang ke munuh tubuh, tang udah nya enda ulih ngereja utai lebih ari nya.

⁵ Tang Aku madahka sapa ke patut dikenangika kita: nangika Allah Taala ti bisi kuasa muai kita ngagai neraka[74] lebuh Iya udah munuh kita. Sigi amat. Aku madah ngagai kita: nangika Iya!

⁶Ukai enda lima iku burung pipit dijual ngena rega dua sen aja? Tang taja pia, nadai siku sida nya enda dikingatka Allah Taala.

⁷ Indah semua lambar buk ba pala kita deh udah diitung magang. Nya alai anang takut. Kita lebih agi berega ari burung pipit!

⁸“Lalu Aku madah ngagai kita, genap iku orang ke ngaku Aku di mua orang, deka diaku Anak Mensia di mua bala melikat Allah Taala.

⁹ Tang barang sapa besangkalka Aku di mua orang, deka disangkal Anak Mensia di mua bala melikat Allah Taala.

¹⁰ Lalu genap iku orang ke bejaku ngelaban Anak Mensia, deka diampun, tang barang sapa bejaku busung ngelaban Roh Kudus, enda diampun.

¹¹ Lebuh sida mai kita ngagai balai gempuru, ngambika kita kena pechara di mua raja, di mua orang ke megai perintah, anang irauka jalai kita deka nyaut sida, tauka utai ti deka disebut kita,

¹²laban Roh Kudus deka ngajar kita, ba jam nya, utai ti patut disebut kita.”

¹³Siku orang ari tekang bala mayuh nyebut ngagai Jesus, “Pengajar, asuh menyadi lelaki aku magi reta kami sebilik enggau aku.”

¹⁴Tang ku Jesus bejaku ngagai iya, “Unggal, sapa ngasuh Aku nyadi hakim tauka bekuasa magi reta kita?”

¹⁵ Lalu ku Jesus bejaku ngagai semua sida, “Bejimat kita. Jaga diri ari semua macham pengamu, laban pengidup mensia ukai bepanggai ba pemayuh reta tengkira.”

¹⁶Iya lalu madahka siti sempama ngagai sida. Ku Iya, “Tanah orang siku ke kaya mansutka mayuh amat asil,

¹⁷lalu ku iya berunding, ‘Nama utai ti deka dikereja aku, laban aku nadai endur alai nyimpan gandum aku?’

¹⁸Lalu ku iya bejaku, ‘Tu utai ti deka dikereja aku: Aku deka ngererak setor aku ti lama, lalu ngaga sebuah ti besai agi, alai nyimpan semua gandum enggau reta tengkira aku.

¹⁹ Lalu aku deka bejaku enggau diri empu, ‘Nuan udah besimpanka mayuh utai nyadika penabat ke berapa taun ti deka datai. Badu agi gawa, makai, ngirup lalu ngelantangka diri.’

²⁰ Tang ku Allah Taala bejaku ngagai iya, ‘Nuan tu beli! Malam tu seput nuan deka diambi ari nuan, lalu sapa deka bempu semua utai ti udah disimpan nuan?’

²¹Nya meh gaya utai ti deka nyadi ba orang ke nugungka pengaya ke diri empu, tang enda kaya di mua Allah Taala.”

²²Lalu ku Iya bejaku ngagai sida murid Iya, “Nya alai Aku madah ngagai kita, anang irauka pengidup kita, utai ti deka diempa kita, tauka pasal tubuh, tauka pasal gari.

²³Laban pengidup beguna agi ari pemakai, lalu tubuh beguna agi ari gari.

²⁴ Peratika burung kak: sida nadai nanam utai, tauka ngetau, lalu sida nadai setor tauka pelabuh, tang taja pia, Allah Taala nupi sida! Kita lebih agi berega ari burung!

²⁵Kati pengirau kita ulih nambahka umur kita sejam?

²⁶Enti kita enda ulih ngereja utai ti ngemit nya, nama kebuah kita irauka utai bukai?

²⁷ Peratika bungai bakung, jalai sida tumbuh. Sida enda gawa, tauka betenun. Tang Aku madah ngagai kita, indah Solomon enggau semua pengaya iya, deh nadai gari ti ngemanah sida bungai nya.

²⁸Tang enti Allah Taala meri gari ngagai rumput ti idup sehari tu, lalu pagila dibuai ngagai api, Allah Taala tentu deka lebih agi meri gari ngagai kita, O kita ke mit pengarap!

²⁹Lalu anang irauka utai ti deka diempa tauka diirup kita.

³⁰ Semina orang ke enda nemu Allah Taala aja ke irauka utai nya lalu Apai kita ti di serega nemu kita begunaka utai nya.

³¹Tang giga dulu Perintah Allah Taala, lalu semua utai nya deka mega diberi ngagai kita.

³² “Anang takut, kita ke mimit tu, laban Apai kita endang gaga ati deka meri Perintah ngagai kita.

³³ Jual semua reta tengkira kita, lalu beri sedekah ngagai orang ke seranta. Gaga ke diri empu kambut duit ti enda nemu luya, lalu simpan pengaya ke diri empu di serega, alai penchuri, enggau indu gegat enda ulih ngerusak.

³⁴Laban dia alai pengaya kita, dia meh ati kita.

³⁵ “Seruran besedia, lalu awakka lampu kita seruran menyadi belama,

³⁶ baka orang gaji ke nganti tuan sida pulai ari gawai tikah, ngambika sida ulih muka pintu ke iya, lebuh iya datai lalu nekung pintu.

³⁷ Beberekat meh orang gaji ke ditemu tuan sida enda tinduk lebuh iya datai. Enggau bendar Aku madah ngagai kita, iya deka nyendiaka diri, lalu ngasuh sida belatur duduk, lalu mela sida.

³⁸Beberekat meh orang gaji nya enti tuan sida tetemuka sida udah sedia, lebuh iya datai ba urung tengah malam tauka ba urung dini hari.

³⁹ Tang awakka kita nemu tu: enti orang ke bempu rumah nemu maya penchuri datai, iya tentu deka bejaga enggai ke penchuri tama ngagai rumah iya.

⁴⁰Kita pen enda tau enda mega besedia, laban Anak Mensia deka datai ba maya ti enda disangka kita.”

⁴¹Ku Peter bejaku, “Tuhan, kati Nuan madahka sempama tu ke kami, tauka ke semua orang?”

⁴² Tuhan lalu bejaku, “Sapa ulun ke tetap ati sereta pintar, ke tau diasuh tuan iya ngemataka ulun iya, meri sida pemakai ba maya ti patut?

⁴³Beberekat meh ulun nya ke ditemu tuan iya ngereja pengawa lebuh tuan iya datai!

⁴⁴Enggau bendar Aku madah ngagai kita, tuan iya deka ngasuh iya ngemataka semua reta tengkira iya.

⁴⁵Tang enti ulun nya bejaku dalam ati diri, ‘Tuan aku laun datai,’ lalu enti iya belabuh bepaluka sida ulun ti bukai, ke lelaki enggau ke indu, lalu makai ngirup lalu mabuk,

⁴⁶tuan iya deka datai ba hari ti enda disangka iya, enggau ba jam ti enda ditemu iya, lalu mepat iya [75] lalu ngasuh iya begulai enggau orang ke enda tetap ati.

⁴⁷Ulun nya ke nemu utai ti dikedekaka tuan iya, tang enda nyendiaka diri tauka enda ngereja utai ti dikedekaka tuan iya, deka balat disipat.

⁴⁸Tang ulun ke enda nemu utai ti dikedekaka tuan iya, lalu ngereja utai ti ngasuh iya patut kena sipat, deka disipat enda balat. Orang ke diberi mayuh, dipinta meri mayuh, lalu orang ke dikarapka ngemataka mayuh utai, deka dikarapka meri mayuh agi.

⁴⁹ “Aku datai laban Aku deka nyelup dunya tu ngena api. Naka meh pemanah enti sema dunya endang udah diselup!

⁵⁰ Aku bisi siti pemaptisa ti deka dikena maptisa Aku. Naka meh pemalat pemerinsa Aku sebedau pemaptisa nya tembu!

⁵¹ Kati kita ngumbai Aku datai mai pemaik ngagai dunya? Ukai: Aku ukai datai mai pemaik, tang mai penyerekang.

⁵²Belabuh ari diatu, orang lima iku diri sebilik deka beserekang, tiga ngelaban dua, lalu dua ngelaban tiga.

⁵³ Sida deka beserekang, apai ngelaban anak lelaki, lalu anak lelaki ngelaban apai, indai ngelaban anak indu, lalu anak indu ngelaban indai mentua indu ngelaban menantu indu, lalu menantu indu ngelaban mentua indu.”

⁵⁴ Iya mega nyebut ngagai orang mayuh, “Lebuh kita meda mua hari ayan tunga ke barat, kita lalu tekala nya nyebut, ‘Hari deka ujan,’ lalu hari amat ujan.

⁵⁵Lalu lebuh ribut bepuput ari selatan, kita nyebut, ‘Angat hari sehari tu’, lalu hari amat angat.

⁵⁶Kita tu orang ke pura-pura ngapa![76] Kita nemu nerangka gaya tanah enggau langit. Tang nama kebuah kita enda nemu nerangka tanda ke maya ti diatu?

⁵⁷ “Lalu nama kebuah kita enda nemu ngelala utai ti ngena?

⁵⁸Lebuh kita mansang ngagai kot enggau orang ke deka bedawaka kita, kita enda tau enda, enggau naka ulih, nelesai laya kita enggau orang nya lebuh kita agi di rantau jalai, enggai ke iya ngirit kita ngagai hakim, lalu hakim nyerahka kita ngagai polis, lalu polis nutup kita dalam rumah jil.

⁵⁹Aku madah ngagai kita, kita enda pansut ari rumah jil nya datai ke kita udah mayar semua duit ukum kita.”[77]