Read Iban Luke 13 Bible Online

Luke 13 - Iban bible

Luke 13

¹Lebuh maya nya sekeda orang ke bisi dia madah ngagai Jesus pasal darah orang Galili ti udah dichampurka Pilate enggau piring sida.

² Jesus lalu nanya sida, “Kati kita ngumbai orang Galili nya diperinsaka baka nya laban sida balat agi bedosa ari orang Galili ti bukai?

³Aku madah ngagai kita, ukai baka nya; tang enti kita enda nesal ati ke dosa kita, semua kita deka mati baka sida.

⁴Tauka orang ke lapan belas iku ke mati lebuh Menara Siloam runtuh ninggang sida -- kati kita ngumbai sida nya udah balat agi ngereja penyalah ari semua orang bukai ke diau di Jerusalem?

⁵Aku madah ngagai kita, ukai baka nya; tang enti kita enda nesal ati ke dosa kita, semua kita deka mati baka sida.”

⁶ Udah nya Iya lalu madahka sempama tu: “Orang siku nanam sepun kayu ara ba kebun anggur iya. Iya datai deka ngiga buah ba kayu ara nya, tang nadai tetemuka buah dia.

⁷ Nya alai iya lalu bejaku ngagai tukang kebun, ‘Peda nuan, tu ketiga taun aku udah datai begigaka buah ba kayu ara tu, tang aku nadai kala tetemuka buah. Tebang iya! Nama guna nejuka iya masau tanah nya ngapa?’

⁸Tukang kebun nya lalu nyaut, ‘Awakka iya dia setaun da agi, tuan. Aku deka nyangkul ngelingi pun iya, lalu meri iya baja.

⁹Enti iya bebuah taun baru tu ila, manah meh nya. Tang enti iya enda, nuan tau nebang iya.’ ”

¹⁰Nyadi sekali, Jesus ngajar dalam sebuah balai gempuru lebuh hari Sabat.

¹¹Dalam balai gempuru nya bisi siku indu ke dikeduan roh ti jai lapan belas taun. Iya balat amat bungkuk, lalu enda ulih bediri rurus.

¹²Lebuh Jesus meda iya, Jesus lalu ngangauka iya ke mua, lalu bejaku ngagai iya, “Endu, nuan udah dilepaska ari penyakit nuan!”

¹³Lebuh Iya ngengkahka jari atas indu nya, indu nya lalu tekala nya bediri rurus lalu muji Allah Taala.

¹⁴ Tang kepala balai gempuru nya pedis ati laban Jesus udah ngeraika orang nya lebuh hari Sabat, lalu ku iya majak bejaku ngagai orang mayuh, “Kitai bisi enam hari alai kitai gawa. Datai meh kitai lebuh hari nya lalu digeraika, ukai kena hari Sabat.”

¹⁵ Tang Tuhan nyaut iya, “Kita tu orang ke pura-pura ngapa![78] Kati kita enda muka tali jelu sapi tauka keledai kita, mai iya pansut ari bansal, lalu meri iya ngirup lebuh hari Sabat?

¹⁶ Kati indu tu, ke anak Abraham, ke udah ditanchang Sitan lapan belas taun, enda tau dilepaska ari tanchang nya lebuh hari Sabat?”

¹⁷Lebuh Iya nyebut nya, semua orang ke nyakal Iya malu magang. Semua orang lalu rami gaga ati ke semua utai ti nyelai ti udah dikereja Iya.

¹⁸Iya lalu bejaku, “Baka ni ku gaya Perintah Allah Taala? Ngagai apa Aku mandingka iya?

¹⁹Iya baka igi mustard,[79] ti dibai orang siku lalu ditanam iya ba umai iya. Mustard nya tumbuh, lalu nyadi kayu ti besai, lalu burung begagaka tansang ba dan iya.”

²⁰ Jesus lalu bejaku baru, “Ngagai apa Aku mandingka Perintah Allah Taala?

²¹Iya baka ragi ti diambi siku indu lalu dichampurka iya enggau empat puluh liter tepung, datai ke semua tepung nya nyau kembai magang.”

²² Jesus bejalai nengah nengeri enggau genturung pendiau, ngajar orang, lebuh Iya benung mansang ngagai Jerusalem.

²³ Siku orang nanya Iya, “Tuan, kati semina mimit aja orang deka diselamatka?” Ku Iya bejaku ngagai sida,

²⁴“Enggau naka ulih tama nengah pintu ti sempit, laban, Aku madah ngagai kita, mayuh orang deka nguji tama, tang enda ulih.

²⁵ Lebuh orang ke bempu rumah nya udah angkat lalu nikupka pintu, lalu kita belabuh bediri di luar, nekung pintu, lalu bejaku, ‘Tuan, buka pintu ke kami,’ iya deka nyaut kita, ‘Aku enda nemu ari ni penatai kita!’

²⁶ Udah nya kita lalu belabuh nyebut, ‘Kami udah makai ngirup enggau nuan, lalu nuan udah ngajar ba sebelah jalai raya kami!’

²⁷ Tang iya deka nyebut, ‘Aku enda nemu ari ni penatai kita. Rari ari aku, semua kita ke ngereja penyai!’

²⁸ Kita deka nyabak lalu begerit ngeli lebuh kita meda Abraham, enggau Isak enggau Jakop enggau semua sida nabi dalam Perintah Allah Taala, lalu kita empu dibuai ke luar.

²⁹Udah nya orang deka datai ari timur, ari barat, ari utara enggau ari selatan, lalu makai dalam Perintah Allah Taala.

³⁰ Orang ke dudi deka nyadi dulu, lalu orang ke dulu, deka nyadi dudi.”

³¹Lebuh maya nya, sekeda orang Parisi datai ngagai Jesus lalu bejaku ngagai Iya, “Angkat Nuan ari tu, laban Herod deka munuh Nuan.”

³² Jesus lalu bejaku ngagai sida, “Padahka jaku Aku tu ngagai munsang nya: ‘Dinga nuan, Aku muru antu, lalu ngeraika orang ke sakit sehari tu enggau pagila, lalu ba hari ti ketiga, Aku deka nembuka pengawa Aku.’

³³Tang Aku enda tau enda majakka pejalai Aku sehari tu, enggau pagila, enggau lusa, laban nadai nabi kala mati ari luar Jerusalem.

³⁴ “O Jerusalem, Jerusalem, nengeri ti munuh sida nabi, lalu nuku ngena batu bala seruan ke dikirumka Allah Taala ngagai nuan! Berapa penyuah Aku udah deka ngempuruka nembiak nuan, baka indu manuk ti ngempuruka anak di baruh sayap iya, tang nuan enggai!

³⁵ Peda nuan, Rumah Sembiang[80] nuan deka ditinggalka nadai orang nguan. Lalu Aku madah ngagai nuan, nuan nadai agi meda Aku, nyentuk ngagai maya nuan nyebut, ‘Beberekat meh Iya ke datai dalam nama Tuhan!’ ”