Read Iban Luke 14 Bible Online

Luke 14 - Iban bible

Luke 14

¹ Nyadi sekali, lebuh hari Sabat, Iya mansang makai ngagai rumah siku tuai orang Parisi, lalu sida bebendar nengkilaka Iya.

²Lebuh maya nya siku lelaki ke sup kaki jari,[81] bisi di mua Iya.

³ Jesus lalu nanya ngagai sida pengajar Adat enggau orang Parisi, “Kati kitai tau ngeraika orang lebuh hari Sabat, tauka enda?”

⁴Tang sida enda bemunyi. Nya alai Jesus megai orang nya, lalu ngeraika iya. Iya lalu ngasuh orang nya pulai.

⁵ Iya lalu bejaku ngagai sida, “Enti anak kita, tauka jelu sapi kita labuh ngagai telaga lebuh hari Sabat, enda ke kita deka tekala nya narit iya pansut?”

⁶Sida lalu enda ulih nyaut nya.

⁷Lebuh Jesus meda chara sekeda bala pengabang milih endur ti pemadu manah, Iya lalu madahka sempama tu ngagai sida,

⁸ “Lebuh orang ngambi kita ngabang ngagai gawai tikah, anang duduk ba endur ti pemadu manah, enggai ke orang ke tinggi agi pangkat ari kita bisi diambi ngabang,

⁹lalu orang ke ngambi kita ngabang, deka datai lalu nyebut enggau nuan, ‘Awakka iya duduk ditu,’ lalu nuan deka malu, lalu duduk ba endur ti pemadu baruh.

¹⁰Tang lebuh kita diambi orang ngabang, mansang ngagai endur ti pemadu baruh lalu duduk dia, ngambika orang ke empu pengawa datai lalu bejaku ngagai nuan, ‘Unggal, duduk ke atas kitu ke agi.’ Nya baru nuan dibasa semua orang ke sama duduk ba mija nya enggau nuan.

¹¹ Laban semua orang ke ngeninggika diri, deka dikemaruhka, lalu orang ke ngemaruhka diri, deka ditinggika.”

¹² Lalu ku Iya bejaku ngagai orang ke mai Iya makai, “Lebuh nuan ngambi orang ngabang ngagai pengerami makai besai, anang ngambi pangan tauka menyadi lelaki, tauka kaban belayan nuan, tauka pangan nuan ke kaya, enggai ke sida ngambi nuan ngabang, lalu malas pemanah nuan.

¹³ Tang lebuh nuan nyendiaka pengerami makai besai, ambi ngabang orang ke seranta, ke kait-kupit, ke lemi, enggau ke buta.

¹⁴Nya baru nuan deka bulih berekat, laban sida enda ulih malas pemanah nuan. Nuan deka dibayar lebuh orang ke lurus diangkatka ari mati.”

¹⁵ Lebuh siku ari bala pengabang ninga jaku nya, iya lalu bejaku ngagai Jesus, “Beberekat meh orang ke deka makai[82] dalam Perintah Allah Taala!”

¹⁶ Jesus lalu nyebut ngagai iya, “Nyadi sekali siku orang nyendiaka pengerami makai besai, lalu ngambi mayuh amat orang ngabang.

¹⁷Lebuh pengerami nya baru deka belabuh, iya lalu ngasuh bala ulun iya madahka orang ke udah diambi ngabang, ‘Datai meh, laban semua utai udah sedia magang diatu.’

¹⁸Tang semua sida bela belabuh begigaka tegal ngambika sida enda datai. Iya ti keterubah madah ngagai ulun nya, ‘Aku baru udah meli sebidang tanah, lalu aku enda tau enda meda tanah nya. Aku minta ampun, laban aku enda ulih datai.’

¹⁹Ku siku ti bukai bejaku, ‘Aku baru udah meli lima pasang sapi, lalu aku diatu deka ngujika sida. Aku minta ampun, laban aku enda ulih datai.’

²⁰ Ku siku ti bukai bejaku, ‘Aku baru udah bebini, nya alai aku enda ulih datai.’

²¹ Nya alai ulun nya pulai, lalu madah ngagai tuan iya. Tuan iya lalu pedis ati lalu bejaku ngagai ulun iya, ‘Alai nuan mansang ngagai jalai raya, enggau ngagai jalai ti mit di nengeri, lalu bai kitu orang ke seranta, ke kait-kupit, ke buta enggau ke enda ulih bejalai.’

²²Ulun nya lalu madah ngagai tuan iya, ‘Atur nuan udah dipejalaika aku, tuan, tang agi bisi endur.’

²³Tuan nya lalu bejaku ngagai ulun nya, ‘Alai nuan mansang ngagai jalai raya enggau ngagai jalai ti mit, lalu pejalka orang datai, ngambika rumah aku penuh.

²⁴Laban, aku madah ngagai kita,[83] nadai siku orang ke diambi ngabang deka nyepi pemakai aku!’ ”

²⁵Nyadi sekali, mayuh amat orang bejalai enggau Iya. Iya nguing lalu bejaku ngagai sida,

²⁶ “Barang sapa datai ngagai Aku lalu enda lebih agi rindu ke Aku ari iya ke rindu ke apai, indai, bini enggau anak, menyadi lelaki enggau menyadi indu, indah seput iya empu, enda tau nyadi murid Aku.

²⁷ Barang sapa enda ngesan regang diri empu lalu nitihka Aku, enda tau nyadi murid Aku.

²⁸Laban sapa ari bala kita ke deka ngaga sebuah menara, enda dulu ngira ungkus utai nya, ngambika iya nemu sekalika iya bisi duit kena nembuka pengawa nya?

²⁹Enggai ke lebuh batu pemun udah didudukka, iya enda tetembuka pengawa nya, lalu semua orang ke meda nya deka ngeleseka iya

³⁰munyi tu, ‘Ngemunka pengawa, ulih, tang nembuka pengawa, enda ulih!’

³¹Tauka sapa raja ke deka nyerang raja siku, enda dulu duduk lalu ngira enti iya ulih ngalahka dua puluh ribu iku soldadu munsuh ngena sepuluh iku soldadu iya empu?

³²Enti iya enda ulih, iya deka ngasuh bala seruan iya betemu enggau raja nya lebuh iya agi jauh, lalu mai iya bebaik.”

³³ Nya alai, baka nya mega kita: nadai siku kita tau nyadi murid Aku enti kita enda ngelengkaka semua reta tengkira kita.

³⁴“Garam endang manah, tang enti iya nadai agi masin, baka ni ku jalai ngaga iya masin baru?[84]

³⁵Iya enda ulih dikena ngasuh tanah ami, tauka digaga nyadi baja, tang dibuai. Awakka orang ke bisi pending, ninga.”