Read Iban Luke 15 Bible Online

Luke 15 - Iban bible

Luke 15

¹ Nyadi semua pengumpul chukai enggau orang ke bedosa, datai ngagai Jesus, deka mendingka Iya.

²Orang Parisi enggau sida pengajar Adat lalu belabuh mut-mut. Ku sida, “Orang tu nyambut orang ke bedosa, lalu makai enggau sida!”

³Nya alai Iya madahka sempama tu ngagai sida:

⁴ “Enti sema siku ari bala kita bisi seratus iku bedus, lalu siku bedus nya lenyau, enda ke iya deka ninggalka semilan puluh semilan iku bedus ti bukai ba padang, lalu ngiga siku ti lenyau, datai ke iya nyau tetemuka iya?

⁵Lebuh iya udah tetemuka bedus nya, iya ngesan iya enggau ati ti gaga.

⁶Lalu lebuh iya datai di rumah, iya ngangauka bala pangan iya enggau orang ke berimbai pendiau enggau iya, lalu bejaku ngagai sida, ‘Aram rami gaga enggau aku, laban aku udah tetemuka bedus aku ti lenyau.’

⁷ Nya alai Aku madah ngagai kita, orang di serega din deka lebih agi rami gaga ati lebuh siku ari orang ke bedosa tu nesal ati, ari ke gaga ke semilan puluh semilan iku orang ke lurus ke enda ibuh nesal ati.

⁸“Tauka, enti sema siku indu bisi sepuluh singkap duit pirak,[85] lalu sesingkap lenyau, enda ke iya deka nungkun lampu, nyapu rumah nya, lalu bebendar ngiga duit nya datai ke iya nyau tetemuka duit nya?

⁹Lebuh iya udah tetemuka duit nya, iya lalu ngangauka bala pangan iya enggau orang ke berimbai pendiau enggau iya, ku iya, ‘Aram rami gaga ati enggau aku laban aku udah tetemuka duit aku ti lenyau.’

¹⁰Nya alai Aku madah ngagai kita, baka nya meh bala melikat Allah Taala deka rami gaga ati ke siku orang ke bedosa ke nesal ati.”

¹¹ Lalu ku Iya bejaku, “Orang siku bisi dua iku anak lelaki.

¹² Anak iya ke biak bejaku enggau apai iya, ku iya, ‘Apai, beri aku semua ungkup aku ari reta tengkira kitai.’ Orang nya lalu bedua reta tengkira iya ngagai anak iya ke dua iku nya.

¹³Dua tiga hari udah bekau nya, anak iya ke biak ngempuruka semua reta tengkira iya, lalu bejalai ngagai menua ti jauh, lalu masau reta tengkira iya idup ngena chara ti enda menuku.

¹⁴Lebuh semua reta iya udah abis, lapar pungkang lalu nyadi di serata menua nya, lalu iya belabuh suntuk.

¹⁵Nya alai iya makai gaji ba orang siku di menua nya. Orang nya lalu ngasuh iya gawa ba umai iya, engkani babi.

¹⁶Iya tetenguk amat deka ngisi perut iya ngena asi babi, tang nadai ga orang meri iya utai diempa.

¹⁷Tang lebuh iya nyau sedarka pemeli diri, iya lalu bejaku, ‘Semua orang gaji apai aku diberi pemakai lebih ari chukup, tang aku ditu mati lapar!

¹⁸Aku deka angkat lalu pulai ngagai apai aku, lalu bejaku ngagai iya, “Apai, aku udah bedosa ngelaban serega enggau ngelaban nuan.[86]

¹⁹Aku enda patut agi dikumbai anak nuan. Gaga aku nyadi orang gaji nuan.” ’

²⁰Nya alai iya angkat lalu pulai ngagai apai iya. Tang lebuh iya agi jauh ari rumah, apai iya tepedaka iya, lalu sinu ati ke iya. Iya belanda lalu merap iya, lalu nyium iya.

²¹Anak iya nya lalu bejaku ngagai iya, ‘Apai, aku udah bedosa ngelaban serega enggau ngelaban nuan.[87] Aku enda patut agi dikumbai anak nuan.’ [88]

²² Tang ku apai iya bejaku ngagai bala ulun iya, ‘Bai jampat baju panjai ti pemadu manah, lalu rasukka ba iya. Rasukka tinchin ba tunjuk iya, enggau selipar ba kaki iya.

²³Ambi lalu sayat anak sapi ti pemadu gemu. Kitai deka makai selamat!

²⁴ Laban anak aku tu udah mati, tang diatu iya idup baru. Iya udah lenyau, tang diatu iya udah ditemu.’ Sida lalu makai selamat.

²⁵“Lebuh maya nya, anak tuai iya agi di umai. Lebuh iya pulai ari umai, lalu datai semak rumah, iya ninga munyi musik enggau munyi orang ke betanda.

²⁶Iya lalu ngangauka siku ulun, lalu nanyaka reti utai nya.

²⁷Ku ulun nya nyaut, ‘Menyadi nuan udah datai, lalu apai nuan udah nyayat anak sapi ti pemadu gemu, laban menyadi nuan udah pulai enggau selamat.’

²⁸Iya lalu ringat lalu enggai tama. Apai iya pansut, lalu belabuh ngumbuk iya.

²⁹Tang ku iya nyaut apai iya, ‘Dinga nuan! Betaun-taun aku udah gawa ke nuan baka ulun, lalu aku nadai udah kala enda ngasika nuan. Taja pia, nuan nadai kala meri aku anak kambin, siku pen nadai, kena aku makai selamat enggau pangan aku.

³⁰Tang lebuh anak nuan tu datai ditu, ke udah masau semua reta tengkira nuan enggau indu sundal, nuan nyayat anak sapi ti gemu ke iya!’

³¹Ku apai iya bejaku ngagai iya, ‘Anak, nuan endang seruran enggau aku, lalu semua utai ti dikemisi aku endang enggi nuan magang.

³²Tang kitai enda tau enda makai selamat lalu rami gaga ati, laban menyadi nuan tu udah mati, lalu diatu iya udah idup baru. Iya udah lenyau, lalu diatu iya udah ditemu.’ ”