Read Iban Luke 18 Bible Online

Luke 18 - Iban bible

Luke 18

¹ Iya lalu madahka siti sempama ngagai sida kena Iya madahka sida enda tau enda seruran besampi, lalu enda lemi semengat.

²Ku Iya, “Dalam sebuah nengeri bisi siku hakim ke enda nangika Allah Taala, sereta enda bebasaka orang.

³Lalu dalam nengeri nya mega bisi indu balu siku, ke seruran datai lalu bejaku ngagai iya, ‘Tulung aku ngelaban munsuh aku.’

⁴Hakim nya lama enggai nulung iya, tang udah nya iya lalu berunding, ‘Taja pen aku enda nangika Allah Taala, sereta enda bebasaka orang,

⁵tang laban indu tu balat ngiruh aku, aku deka nulung iya, enggai ke iya seruran datai kitu lalu ngelelakka aku ngapa!’ ”[101]

⁶ Lalu ku Tuhan bejaku, “Dingaka utai ti disebut hakim ti jai nya.

⁷ Enda ka Allah Taala deka nulung bala nembiak Iya, ke nyabak ngangauka Iya siang malam? Kati Iya deka ngerindang diri datai nulung sida?

⁸Aku madah ngagai kita, Iya deka nulung sida enggau jampat. Tang lebuh Anak Mensia datai, kati Iya deka tetemuka orang ke arap[102] di dunya tu?”

⁹Iya mega madahka sempama tu ngagai orang ke ngumbai diri lurus lalu mechat orang bukai.

¹⁰“Dua iku orang mansang ngagai Rumah Sembiang deka besampi, siku orang Parisi, lalu siku pengumpul chukai.

¹¹ Orang Parisi bediri kediri, lalu besampi[103] munyi tu, ‘Allah Taala, aku meri terima kasih ngagai Nuan, laban aku enda baka orang bukai ke penchuri, ke jai, ke butang, tauka baka pengumpul chukai nyin.

¹² Aku bepasa dua hari dalam seminggu. Aku meri sepuluh peratus ari semua utai ti ulih aku.’

¹³ Tang pengumpul chukai nya bediri ari jauh, enda berani engkadah ke langit, tang mandam dada diri, ku iya, ‘Allah Taala, kasihka aku ke bedosa tu!’

¹⁴ Aku madah ngagai kita, lebuh seduai iya pulai ke rumah, ukai orang Parisi nya ke lurus, tang pengumpul chukai nya ke lurus di mua Allah Taala. Laban semua orang ke ngeninggika diri deka dikemaruhka, lalu orang ke ngemaruhka diri deka ditinggika.”

¹⁵Sekeda orang mai sida ke mit ngagai Jesus ngambika Iya negu sida. Lebuh sida murid meda nya, sida lalu balat amat ngerara orang nya.

¹⁶Tang Jesus ngangauka sida anak mit nya ngagai Iya, lalu bejaku, “Awakka sida anak mit datai ngagai Aku lalu anang nagang sida, laban Perintah Allah Taala diempu orang ke baka sida tu.

¹⁷Enggau bendar Aku madah ngagai kita, barang sapa enda nerima Perintah Allah Taala baka anak mit, enda ulih tama ngagai Perintah nya.”

¹⁸ Siku tuai orang Judah lalu nanya Iya, “Pengajar ti badas, nama utai ti enda tau enda dikereja aku ngambika aku bulih pengidup ti meruan belama iya?”

¹⁹Jesus lalu bejaku ngagai iya, “Nama kebuah nuan ngumbai Aku badas? Nadai siku ti badas, kelimpah ari Allah Taala siku aja.

²⁰ Nuan nemu pesan: ‘Anang butang. Anang munuh orang. Anang ngenchuri. Anang besaksi bula. Bebasaka apai enggau indai nuan.’ ”

²¹Orang nya lalu nyaut, “Aku udah nitihka semua pesan nya kenyau ari aku agi biak.”

²² Lebuh Jesus ninga nya, Iya lalu bejaku ngagai orang nya, “Siti agi utai apin dikereja nuan. Jual semua reta tengkira nuan, lalu beri duit nya[104] ngagai orang ke seranta. Nya baru nuan deka bisi pengaya di serega. Udah nya baru nuan datai lalu nitihka Aku.”

²³Tang lebuh orang nya ninga nya, iya tusah ati, laban iya kaya bendar.

²⁴ Jesus merening ngagai iya, lalu bejaku, “Mar amat meh orang ke kaya tama ngagai Perintah Allah Taala!

²⁵Nyamai agi jelu unta tama nengah lubang jarum, ari orang ke kaya tama ngagai Perintah Allah Taala.”

²⁶Orang ke ninga nya lalu bejaku, “Enti pia, sapa ulih diselamatka?”

²⁷ Jesus lalu nyaut, “Utai ti enda ulih dikereja mensia, ulih dikereja Allah Taala.”

²⁸ Peter lalu bejaku, “Peda Nuan! Kami udah ninggalka rumah kami lalu nitihka Nuan.”

²⁹Jesus lalu bejaku ngagai sida, “Enggau bendar Aku madah ngagai kita, nadai orang ke udah ninggalka rumah, tauka bini, tauka menyadi lelaki, tauka apai indai, tauka anak, ketegal Perintah Allah Taala,

³⁰enda nerima berapa kali lipat mayuh agi di dunya tu, enggau dunya ti deka datai, pengidup ti meruan belama iya.”

³¹ Jesus lalu mai murid ke dua belas iku ke tisi, lalu bejaku ngagai sida, “Dinga kita! Kitai deka mansang ngagai Jerusalem, lalu semua utai ti ditulis sida nabi pasal Anak Mensia deka dikamatka.

³²Laban Iya deka diserahka ngagai orang bansa bukai, lalu dikeduan, dipechat, lalu diludah.

³³Lebuh sida udah nyipat Iya, sida deka munuh Iya, lalu ba hari ti ketiga Iya deka angkat idup baru.”

³⁴Tang sida enda meretika utai nya. Iya ti bendar, utai ti disebut Iya udah dipelalaika ari sida, lalu sida enda nemu utai ti disebut Jesus.

³⁵ Lebuh Jesus datai semak Jeriko, siku orang ke buta bisi duduk ba tisi jalai raya, minta sedekah.

³⁶Lebuh iya ninga bala orang mansa, iya lalu nanyaka utai ti nyadi.

³⁷Sida lalu madah ngagai iya, “Jesus orang Nasaret benung mansa.”

³⁸Iya lalu manjung, “Jesus! Anak David! Kasihka aku!”

³⁹Orang ke di mua lalu balat amat ngasuh iya badu agi ragak. Tang iya manjung inggar agi, “Anak David! Kasihka aku!”

⁴⁰Jesus lalu ngetu, lalu ngasuh orang mai orang ke buta nya ngagai Iya. Lebuh orang ke buta nya datai semak, Jesus lalu nanya iya,

⁴¹“Nama utai ti diasuh nuan kereja Aku ke nuan?” Iya lalu nyaut, “Tuhan, awakka aku ulih meda baru.”

⁴² Jesus lalu bejaku ngagai iya, “Awakka nuan ulih meda! Pengarap nuan udah ngeraika nuan.”

⁴³Orang nya lalu tekala nya ulih meda baru, lalu nitihka Jesus, ngemuliaka Allah Taala. Lebuh orang mayuh meda nya, semua sida lalu muji Allah Taala.