Read Iban Luke 19 Bible Online

Luke 19 - Iban bible

Luke 19

¹ Jesus lalu datai di Jeriko, tang Iya enda bemalam dia.

²Nyadi di nengeri nya bisi siku orang benama Sakius. Iya tu kepala orang ke ngumpul chukai, lalu iya orang ke kaya.

³Iya nguji meda sapa orang ke benama Jesus, tang laban orang kelalu mayuh, iya enda ulih meda Jesus, laban iya baruh.

⁴Nya alai iya lalu belanda dulu ari bala mayuh, lalu niki sepun kayu, deka meda Jesus, ke deka mansa.

⁵Lebuh Jesus datai ba endur nya, Iya engkadah, lalu bejaku enggau Sakius, “Nurun jampat, Sakius, laban aku enda tau enda diau ba rumah nuan sehari tu.”

⁶Nya alai Sakius lalu beguai-guai nurun, lalu gaga ati ngelaluka Jesus.

⁷ Semua orang ke meda nya lalu belabuh mut-mut. Ku sida, “Iya nyadi temuai orang ke bedosa!”

⁸ Sakius bediri lalu bejaku ngagai Tuhan, “Tuhan, aku deka meri setengah ari semua reta tengkira aku ngagai orang ke seranta, lalu enti aku bisi udah ngakal orang, aku deka mulaika utai nya empat kali lipat.”

⁹ Jesus lalu bejaku ngagai iya, “Sehari tu pengelepas udah datai ba rumah tu, laban iya mega peturun Abraham.

¹⁰ Laban Anak Mensia datai ngambika Iya ngiga lalu nyelamatka orang ke tesat.”

¹¹ Lebuh orang mayuh agi benung mendingka Iya bejaku, Iya lalu madahka siti sempama ngagai sida, laban Iya nyau datai semak Jerusalem, enggau laban sida ngumbai Perintah Allah Taala baru deka pegari.

¹² Nya alai ku Iya bejaku, “Siku orang ke tinggi pangkat bejalai ngagai menua ti jauh, ngambika iya dichiri nyadi raja, lalu udah nya pulai baru ngagai menua iya empu.

¹³Iya ngangauka sepuluh iku orang gaji iya, lalu meri sida sepuluh singkap duit emas.[105] lalu bejaku ngagai sida, ‘Aku ngasuh kita bedagang ngena duit tu nyentuk ngagai maya aku pulai kitu baru.’

¹⁴Tang bala nembiak iya begedika iya, lalu sida ngasuh bala seruan nitihka iya, ku sida, ‘Kami enggai meda orang tu nyadi raja kami.’

¹⁵Lebuh iya pulai, udah bekau iya ke dichiri nyadi raja, iya lalu ngasuh orang manggil orang gaji ke udah alai iya nyuaka duit, deka nemu untung ti udah ulih sida bedagang.

¹⁶Iya ke terubah datai lalu bejaku, “Tuan, sesingkap duit nuan udah bulih sepuluh singkap.’

¹⁷ Lalu ku iya bejaku ngagai orang nya, ‘Manah pengawa nuan. Nuan tu orang gaji ti manah! Laban nuan tau dikarapka ngemataka utai ti mimit, aku deka ngasuh nuan ngemataka sepuluh buah nengeri.’

¹⁸Iya ti kedua datai lalu bejaku, ‘Tuan, sesingkap duit nuan udah bulih lima singkap.’

¹⁹Lalu ku tuan iya bejaku ngagai iya, ‘Nuan deka ngemataka lima buah nengeri.’

²⁰Iya ti siku datai lalu bejaku, ‘Tuan, tu duit nuan. Aku mungkus duit tu ngena perecha,

²¹laban aku takutka nuan, laban nuan orang ke terit. Nuan ngambi utai ti ukai disimpan nuan, lalu ngetau utai ti ukai ditanam nuan.’

²²Ku tuan nya bejaku ngagai orang gaji nya, ‘Aku deka ngakim nuan ngena leka jaku nuan empu, nuan orang gaji ti jai! Nuan nemu aku endang terit, ngambi utai ti ukai disimpan aku, lalu ngetau utai ti ukai ditanam aku.

²³Nya alai nama kebuah nuan enda nyimpan duit aku dalam bank, ngambika lebuh aku pulai kitu baru, aku ulih nerima iya sama enggau bungai iya?’

²⁴Udah nya iya lalu bejaku ngagai orang ke bediri semak dia, ‘Ambi duit nya ari iya, lalu beri ngagai iya ke bisi sepuluh singkap.’

²⁵(Tang ku sida bejaku ngagai iya, ‘Tuan, iya udah bisi sepuluh singkap!’)

²⁶ ‘Aku madah ngagai kita, genap iku orang ke bisi utai deka diberi mayuh agi, tang orang ke nadai utai, indah utai ti mimit ti dikemisi sida deh deka diambi ari sida.

²⁷Nyadi pasal bala munsuh aku ke enggai nerima aku nyadi raja sida, bai sida kitu, lalu bunuh sida di mua aku!’ ”

²⁸ Lebuh Iya udah nyebut nya, Iya lalu bejalai dulu ari sida ngagai Jerusalem.

²⁹ Lebuh Iya datai semak Betpagi enggau Betani, ba bukit sigi ti dikumbai Bukit Kana, Iya ngasuh dua iku murid Iya bejalai dulu ari sida,

³⁰ku Iya, “Alai seduai bejalai ngagai nengeri ti di mua nyin. Lebuh seduai tama ngagai nengeri nya, seduai deka nemu siku anak keledai ditanchang dia, ti nadai udah kala ditepan orang. Buka tali iya, lalu bai iya kitu.

³¹Enti orang nanya seduai, ‘Nama kebuah seduai muka tali jelu nya?’ sebut aja jaku tu, ‘Tuhan begunaka iya.’ ”

³² Seduai iya mupuk, lalu nemu semua utai munyi ti udah dipadahka Jesus ngagai seduai iya.

³³Lebuh seduai iya muka tali anak keledai nya, orang ke bempu jelu nya lalu bejaku ngagai seduai iya, “Nama kebuah seduai muka tali anak keledai nya?”

³⁴ Seduai iya lalu nyaut, “Tuhan begunaka iya.”

³⁵Seduai iya lalu mai anak keledai nya ngagai Jesus, ngelempaika serayung seduai iya ba belakang jelu nya, lalu nulung Jesus nepan ba jelu nya.

³⁶ Lebuh Iya nepan keledai nya, orang mayuh lalu nganchau serayung sida ba jalai raya.

³⁷Lebuh Iya nyau datai semak jalai ti nurun ari Bukit Kana, semua bala murid Iya belabuh gaga ati muji Allah Taala enggau nyawa ti inggar ketegal semua utai ti besai ti udah dipeda sida,

³⁸ ku sida, “Beberekat meh Raja ke datai dalam nama Tuhan! Pemaik di serega, enggau mulia di serega ti pemadu tinggi!”

³⁹ Sekeda orang Parisi ke dalam tekang bala mayuh lalu bejaku ngagai Iya, “Pengajar, asuh murid Nuan badu agi inggar!”

⁴⁰Disaut Iya, “Aku madah ngagai kita, enti sida enda bemunyi, batu deka manjung.”

⁴¹ Lebuh Iya nyau datai semak lalu meda nengeri nya, Iya nyabakka nengeri nya,

⁴²ku Iya, “Naka meh pemanah, enti sehari tu nuan ngelala utai ti ulih mai pemaik ngagai nuan! Tang diatu utai nya dilalaika ari mata nuan!

⁴³ Maya deka datai alai bala munsuh nuan deka ngaga kuta tanah ngelingi nuan kena ngelulung nuan, lalu mekulka nuan.

⁴⁴ Sida deka ngerusak nuan, enggau orang ke diau dalam nuan, lalu sigi pen nadai mega batu ditejuka mengkang betusun dalam nuan, laban nuan enda ngelala maya Allah Taala datai ngagai nuan.”

⁴⁵Iya lalu tama ngagai Rumah Sembiang, lalu belabuh muru orang ke bejual dia.

⁴⁶ Ku Iya bejaku ngagai sida, “Endang udah ditulis, ‘Rumah Aku deka nyadi rumah sembiang.’ Tang kita udah ngaga iya nyadi sarang perumpak.”

⁴⁷ Tiap hari Iya ngajar dalam Rumah Sembiang. Sida tuai imam, sida pengajar Adat, enggau bala tuai orang Judah majak begigaka jalai munuh Iya,

⁴⁸tang sida nadai tetemuka jalai ngereja nya, laban semua orang mayuh majak mendingka Iya.