Read Iban Luke 2 Bible Online

Luke 2 - Iban bible

Luke 2

¹ Lebuh maya nya, Raja Besai Augustus meri atur ngasuh semua orang di serata dunya ngerejister nama diri.

²Tu keterubah iya pengawa ngitung tubuh dikereja. Pengawa tu dikereja lebuh Kurinius nyadi gabenor menua Siria.

³Semua orang lalu mansang ngagai nengeri sida empu, ngerejister nama diri.

⁴ Josep mega bejalai ari nengeri Nasaret di menua Galili, ngagai menua Judea, ngagai nengeri David, ti dikumbai Betlehem, laban iya ari peturun David.

⁵Iya mansang ngerejister nama diri sama enggau Maria, ke betunang enggau iya, ke benung betubuh-bisi.

⁶Lebuh seduai iya di Betlehem, Maria pen nyau chukup bulan alai beranak.

⁷Iya lalu ngadaka anak tuai iya, medung anak mit nya ngena kain, lalu ngalika iya dalam dulang, laban sida nadai endur dalam rumah numpang.

⁸Di menua nya bisi bala pengibun bedus diau di padang, benung ngibun raban bedus sida lebuh malam hari.

⁹ Siku melikat Tuhan lalu pegari di mua sida, lalu mulia Tuhan manchar ngelingi sida, lalu sida balat amat takut.

¹⁰Tang ku melikat nya bejaku ngagai sida, “Anang takut! Laban aku mai ngagai kita Berita Manah ti ngasuh ati semua mensia gaga:

¹¹ sehari tu, di nengeri David, Juruselamat kita udah ada, iya nya Kristus[12] ti Tuhan!

¹² Tu tanda ti diberi ngagai kita: kita deka nemu siku anak mit dibedung ngena kain, gali dalam dulang.”

¹³Tekala nya bala melikat ari serega lalu pegari sama enggau melikat nya, belagu muji Allah Taala. Ku sida,

¹⁴ “Muliaka Allah Taala di serega ti pemadu tinggi, enggau pemaik di dunya ke orang ke dikerinduka Iya!”

¹⁵Lebuh bala melikat nya udah ninggalka sida lalu pulai ke serega, sida pengibun bedus nya lalu bejaku enggau pangan diri, “Aram kitai mupuk ngagai Betlehem, ngambika kitai meda utai ti udah nyadi, ti udah dipadahka Tuhan ngagai kitai.”

¹⁶Nya alai sida lalu beguai-guai mupuk, lalu tetemuka Maria seduai Josep, enggau anak mit nya gali dalam dulang.

¹⁷Lebuh sida meda nya, sida lalu madahka utai ti udah dipadahka melikat pasal anak mit nya,

¹⁸lalu semua orang ke ninga nya balat alit ati ke utai ti dipadahka sida pengibun bedus.

¹⁹ Tang Maria nyimpan semua jaku nya lalu belematika jaku nya dalam ati iya.

²⁰Sida pengibun bedus lalu pulai, ngemuliaka sereta muji Allah Taala ketegal semua utai ti udah didinga enggau dipeda sida, munyi ti udah dipadahka ngagai sida.

²¹ Lapan hari udah bekau nya, anak mit nya lalu ditutus. Iya lalu diberi nama Jesus, nama ti udah diberi melikat sebedau Iya dikandungka.

²² Lebuh maya nyau datai alai Josep seduai Maria patut nuchi diri nitihka Adat Moses, seduai iya mai anak mit nya ngagai Jerusalem, deka nyerahka Iya ngagai Tuhan,

²³ (munyi ti udah ditulis dalam Adat Tuhan: “Genap iku anak tuai ti lelaki enda tau enda diserahka ngagai Tuhan.”)

²⁴ Lalu seduai iya ngenjuk piring nitihka pesan ti ditulis dalam Adat Tuhan, iya nya “sepasang burung achang tauka dua iku burung puna”.

²⁵ Nyadi di Jerusalem lebuh maya nya bisi siku lelaki benama Simeon.[13] Simeon nya orang ke lurus sereta angkunka Allah Taala, ke nganti pengelepas orang Israel, lalu Roh Kudus bisi enggau iya.

²⁶Roh Kudus udah madahka iya apin mati sebedau iya meda Kristus.[14]

²⁷Nitihka iring Roh Kudus, Simeon lalu mansang ngagai Rumah Sembiang. Lalu lebuh Maria seduai Josep mai Jesus, anak mit nya ngagai Rumah Sembiang, deka ngereja utai ke Iya nitihka atur dalam Adat,

²⁸Simeon merap anak mit nya, lalu muji Allah Taala. Ku iya,

²⁹“Tuhan, awakka nembiak [15] Nuan pulai enggau selamat, nitihka jaku Nuan,

³⁰ laban mata aku udah meda pengelepas Nuan,

³¹ti udah disediaka Nuan di mua semua mensia,

³² penampak ti mandangka peneka Nuan ngagai orang bansa bukai enggau ke mulia nembiak Nuan Israel.”

³³Apai indai anak mit nya lalu balat alit ati ke semua utai ti disebut pasal Iya.[16]

³⁴Udah nya Simeon merekatka sida, lalu bejaku ngagai Maria, indai anak mit nya, “Anak mit tu udah dipilih ngerusak enggau ngelepaska mayuh orang di menua Israel. Lalu Iya deka nyadi tanda ti deka disakal orang,

³⁵ngambika peragam ati mayuh orang dipandangka - lalu ati nuan deka tusah asai ti direjang ngena pedang.”[17]

³⁶ Nyadi dia mega bisi siku nabi indu benama Anna[18] anak Panuel, ari raban bansa Aser. Iya tuai amat umur. Iya semina begulai enggau laki iya tujuh taun aja,

³⁷lalu iya balu nyentuk ngagai umur iya lapan puluh empat taun. Iya enda kala ninggalka Rumah Sembiang, tang nyembah Allah Taala sereta bepasa, lalu besampi siang malam.

³⁸Lebuh maya nya iya datai, belabuh muji Allah Taala, lalu bejakuka pasal anak mit nya[19] ngagai semua orang ke nganti penebus Jerusalem.

³⁹ Lebuh Josep seduai Maria udah tembu ngereja semua utai nitihka Adat Tuhan, sida pulai ngagai menua Galili, ngagai nengeri sida empu, iya nya Nasaret.

⁴⁰ Anak mit nya lalu mansang besai sereta kering, penuh laban penemu-dalam, sereta dikerinduka Allah Taala.

⁴¹ Nyadi genap taun apai indai Jesus mansang ngagai Jerusalem deka ngintu Gawai Paska.

⁴²Lalu lebuh Jesus umur dua belas taun, sida mupuk ngagai Gawai nya baka selama.

⁴³Tembu Gawai nya, lebuh sida mulaika diri, Nembiak nya, iya nya Jesus, ninggalka Diri di Jerusalem, tang apai indai Iya enda nemu nya.

⁴⁴Seduai iya bejalai sehari nya ngumbai Iya bejalai enggau raban sida empu. Udah nya seduai iya lalu belabuh begigaka Iya ba bala kaban belayan enggau pangan sida.

⁴⁵Lebuh seduai iya nadai tetemuka Iya, seduai iya lalu nikal ngagai Jerusalem, ngiga Iya.

⁴⁶Tiga hari udah bekau nya, nya baru seduai iya tetemuka Iya dalam Rumah Sembiang, duduk enggau bala pengajar, mendingka sida, sereta betanyaka utai ngagai sida.

⁴⁷Lalu semua orang ke ninga Iya balat alit ati ninga penalam penemu enggau saut Iya.

⁴⁸ Lebuh apai indai Iya meda Iya, seduai iya balat alit ati, lalu ku indai Iya bejaku enggau Iya, “Anak, nama kebuah Nuan miaka kami duai apai nuan baka tu? Peda Nuan, kami duai apai Nuan udah irau ati begigaka Nuan.”

⁴⁹Iya lalu nyaut, “Nama kebuah seduai begigaka Aku? Kati seduai enda nemu Aku endang enda tau enda diau dalam rumah Apai Aku?”

⁵⁰Tang seduai iya enda meretika utai ti disebut Iya ngagai seduai.

⁵¹ Iya lalu mupuk enggau seduai iya lalu datai di Nasaret. Iya ngasika seduai iya, lalu indai Iya nyimpan semua utai nya dalam ati diri.

⁵² Jesus mansang besai sereta bepenemu-dalam, lalu dikerinduka Allah Taala enggau mensia.