Read Iban Luke 22 Bible Online

Luke 22 - Iban bible

Luke 22

¹ Maya ngintu Gawai Roti Ti Enda Beragi, ti dikumbai Gawai Paska, nyau semak.

²Sida tuai imam enggau sida pengajar Adat begigaka jalai munuh Jesus, laban sida takutka orang mayuh.

³Udah nya Sitan tama ngagai Judas, ke dikumbai Iskariot, siku ari sida ke dua belas.

⁴Judas mupuk lalu berandau enggau sida tuai imam, enggau bala pemesai ke nyaga Rumah Sembiang, pasal jalai iya nyual Jesus ngagai sida.

⁵ Sida gaga amat ati, lalu besetuju deka meri iya duit.

⁶Nya alai Judas besetuju, lalu belabuh begigaka peluang nyual Jesus ngagai sida, lebuh orang mayuh nadai dia.

⁷ Hari Gawai Roti Ti Enda Beragi pen nyau datai, alai anak domba Gawai Paska deka disayat.

⁸ Nya alai Jesus ngasuh Peter seduai John, ku Iya, “Alai seduai mupuk, lalu nyendiaka pemakai Gawai Paska ke kitai, ngambika kitai makai.”

⁹Seduai iya lalu nanya, “Dini alai Nuan ngasuh kami duai nyendiaka nya?”

¹⁰Disaut Jesus, “Dingaka tu: lebuh seduai tama ngagai nengeri, siku lelaki ke mai tepayan[120] ai deka betemu enggau seduai. Titihka iya ngagai rumah ti alai iya tama,

¹¹lalu sebut ngagai orang ke bempu rumah nya, ‘Pengajar nanya ngagai nuan, “Dini alai bilik temuai, alai Aku deka makai pemakai Gawai Paska enggau murid Aku?” ’

¹²Iya deka madahka ngagai seduai siti bilik ti besai di sadau, ti udah dikemas. Sediaka semua utai dia ke kitai.”

¹³Seduai iya mupuk, lalu nemu semua utai munyi ti udah dipadahka Jesus ngagai seduai iya. Seduai iya lalu nyendiaka pemakai Gawai Paska.

¹⁴Lebuh jam nyau chukup, Iya lalu belatur duduk ba mija, sama enggau sida rasul.

¹⁵ Ku Iya bejaku ngagai sida, “Aku bisi amat ati deka makai pemakai Gawai Paska tu enggau kita sebedau Aku kena perinsa,

¹⁶ laban, Aku madah ngagai kita, Aku enda makai[121] pemakai tu datai ke iya dikamatka dalam Perintah Allah Taala.”

¹⁷ Iya lalu ngambi mangkuk, lalu lebuh Iya udah meri terima kasih, Iya lalu bejaku, “Ambi tu, lalu bagi entara bala kita,

¹⁸ laban, Aku madah ngagai kita, belabuh ari diatu Aku enda ngirup wain tu nyentuk ngagai maya Perintah Allah Taala datai.”

¹⁹ Iya lalu ngambi roti, lalu lebuh Iya udah meri terima kasih, Iya mechahka roti nya, lalu nyuaka nya ngagai sida, ku Iya, “Tu tubuh Aku, ti diberi ke kita. Kereja tu kena ngingatka Aku.”

²⁰ Baka nya mega, lebuh sida udah badu makai, Iya ngambi mangkuk, ku Iya, “Mangkuk tu ti dituang ke kita nya sempekat baru Allah Taala ti ditanggam ngena darah Aku.[122]

²¹ Tang, peda kita! Orang ke nyual Aku bisi enggau Aku ba mija tu!

²²Laban Anak Mensia deka mati, nitihka atur Allah Taala, tang tulah orang ke nyual Iya!”

²³Sida lalu belabuh betanya ngagai pangan diri, sapa ari bala sida ke deka ngereja nya.

²⁴ Sida murid mega bekelikuhka sapa ari bala sida ke tau dikumbai pemadu besai.

²⁵ Tang ku Iya bejaku ngagai sida, “Raja orang bansa bukai merintah orang ke dipegai sida, lalu orang ke megai kuasa atas sida ngumbai diri ‘Pangan Orang Mayuh’.

²⁶ Tang utai nya enda baka nya ba bala kita. Orang ke pemadu besai dalam bala kita enda tau enda nyadi baka orang ke pemadu biak, lalu orang ke nyadi kepala enda tau enda nyadi orang ke mela.

²⁷ Laban sapa ke besai agi? Iya ke duduk ba mija, tauka iya ke mela? Tentu orang ke duduk, ukai enda? Tang Aku begulai enggau kita nyadi orang ke mela.

²⁸ “Kita udah begulai enggau Aku lebuh Aku natka semua pemerinsa Aku,

²⁹ lalu Aku meri kita kuasa merintah,[123] baka Apai ti udah meri Aku kuasa kena merintah,[124]

³⁰ ngambika kita ulih makai ngirup ba mija Aku dalam Perintah Aku, lalu kita deka duduk ba kerusi diraja, ngakim dua belas raban bansa orang Israel.

³¹ “Simon, Simon! Dinga nuan! Sitan udah minta Aku ngemendarka iya[125] ngayak semua kita baka ke ngayak gandum,

³² tang Aku udah besampika nuan Peter,[126] ngambika pengarap nuan kering, lalu lebuh nuan udah pulai baru ngagai Aku, keringka sida menyadi nuan.”

³³ Lalu ku Peter bejaku ngagai Iya, “Tuhan, aku sedia deka ditutup dalam rumah jil lalu mati enggau Nuan!”

³⁴Jesus lalu nyebut ngagai iya, “Aku madah ngagai nuan, Peter, sebedau manuk mengkukuk sehari tu, nuan udah besangkalka Aku tiga kali.”

³⁵ Ku Jesus bejaku ngagai sida, “Lebuh Aku ngasuh kita bejalai, lalu enda nyagi kita mai kandi duit, tauka kambut, tauka selipar, kati kita bisi suntuk utai?” “Nadai,” ku sida nyaut.

³⁶ Ku Iya bejaku ngagai sida, “Tang diatu, barang sapa bisi kandi duit, enda tau enda mai kandi nya, lalu baka nya mega orang ke bisi kambut. Lalu orang ke nadai pedang, enda tau enda nyual kelambi iya, lalu meli pedang.

³⁷ Laban Aku madah ngagai kita, jaku ti disebut dalam Bup Kudus, ‘Iya deka begulai enggau orang ke jai,’ enda tau enda dikamatka ba Aku, laban utai ti ditulis pasal Aku endang benung dikamatka diatu.”

³⁸Sida murid Iya lalu bejaku, “Peda Nuan, Tuhan! Tu dua bilah pedang!” Iya lalu nyaut, “Umbas meh nya.”[127]

³⁹ Iya pansut lalu mupuk baka selama ngagai Bukit Kana, lalu sida murid nitihka Iya.

⁴⁰Lebuh Iya datai ba endur nya, Iya lalu nyebut ngagai sida, “Besampi ngambika kita enda kena laban penguji.”

⁴¹Iya lalu bejalai jauh mimit ari sida, kira sepenikau batu ari sida, besugang lalu besampi,

⁴² “Apai, enti Nuan deka, ambi mangkuk tu ari Aku; ukai nitihka peneka Aku, tang awakka peneka Nuan nyadi.”

⁴³Udah nya siku melikat ari serega pegari di mua Iya, lalu ngeringka Iya.

⁴⁴Enggau ati ti balat tusah, Iya bebendar agi besampi, datai ke peluh Iya nyau baka darah neritik ngagai tanah.[128]

⁴⁵Lebuh Iya angkat ari endur Iya ke besampi, Iya pulai ngagai sida murid Iya, lalu nemu sida tinduk, laban sida lelak laban ati ti kelalu balat tusah.

⁴⁶Iya lalu bejaku ngagai sida, “Nama kebuah kita tinduk? Angkat, lalu besampi, ngambika kita enda kena laban penguji.”

⁴⁷Lebuh Iya agi benung bejaku, bala orang lalu ngenyit datai, diuluka Judas, siku ari sida ke dua belas. Judas mansang ngagai Jesus, deka nyium Iya.

⁴⁸Tang ku Jesus bejaku ngagai iya, “Judas, kati nuan nyual Anak Mensia ngena sium?”

⁴⁹ Lebuh sida murid ke sama enggau Jesus meda utai ti deka nyadi, sida lalu nanya, “Tuhan, kati kami tau mantap sida ngena pedang?”

⁵⁰Siku ari bala sida lalu mantap ulun imam besai, mutuska pending kanan iya.

⁵¹Tang ku Jesus bejaku, “Badu agi!” Iya lalu negu pending orang nya, lalu ngeraika iya.

⁵²Jesus lalu bejaku ngagai sida tuai imam enggau bala polis ke nyaga Rumah Sembiang, enggau sida tuai bansa ke udah datai nangkap Iya, “Kati Aku tu penyamun alai kita datai mai pedang enggau pemalu?”

⁵³ Lebuh Aku begulai enggau kita tiap hari dalam Rumah Sembiang, kita enda nangkap Aku. Tang tu endang maya kita, maya kuasa pemetang merintah.”

⁵⁴ Sida lalu nangkap Jesus lalu mai Iya ari endur nya ngagai rumah imam besai. Tang Peter nitih ari jauh.

⁵⁵Lebuh sida udah nungkunka api ba tengah laman nya lalu duduk, Peter mega duduk enggau sida.

⁵⁶ Siku indu ke ulun lalu tepedaka Peter duduk nunga api. Iya lalu merening ngagai Peter, lalu bejaku, “Orang tu pen udah meh enggau Iya!”

⁵⁷Tang Peter besangkalka nya, ku iya, “Indu, aku enda ngelala Iya!”

⁵⁸Enda lama udah nya, siku agi orang meda Peter lalu bejaku, “Nuan pen siku ari bala sida!” Tang ku Peter nyaut, “Ukai!”

⁵⁹Kira sejam udah bekau nya, siku agi orang bejaku, “Orang tu tetap udah enggau Jesus, laban iya orang Galili!”

⁶⁰Tang ku Peter nyaut, “Aku enda nemu utai ti ku nuan.” Tekala nya, lebuh Peter agi benung bejaku, manuk mengkukuk.

⁶¹ Tuhan nguing lalu merening ngagai Peter. Peter lalu ingatka jaku Tuhan, jalai Iya nyebut ngagai Peter, “Sebedau manuk mengkukuk sehari tu, nuan udah besangkalka Aku tiga kali.”

⁶²Peter pansut lalu duie-duie nyabak.

⁶³Orang ke nyaga Jesus beduan Iya, lalu belabuh ngelese sereta malu Iya.

⁶⁴Sida mega mampul mata Iya ngena kain, lalu majak nanya Iya, “Uji sangka! Sapa malu Nuan?”

⁶⁵Sida majak nyebut mayuh macham utai bukai kena sida ngeleseka Iya.

⁶⁶ Lebuh hari nyau tawas, sida tuai bansa, tuai imam, enggau sida pengajar Adat begempuru, lalu sida mai Jesus ngagai Kunsil.

⁶⁷ Ku sida, “Padahka ngagai kami, enti Nuan tu Kristus?”[129] Iya lalu nyaut, “Enti Aku madah ngagai kita, kita enggai arap,

⁶⁸lalu enti Aku nanya kita, kita enggai nyaut.

⁶⁹Tang belabuh ari diatu, Anak Mensia deka duduk muak ari kanan Allah Taala ti Bekuasa.”

⁷⁰ Semua sida lalu nanya, “Enti pia, kati Nuan tu Anak Allah Taala?” Lalu ku Iya bejaku ngagai sida, “Kita ngumbai Aku Anak Allah Taala.”

⁷¹Sida lalu bejaku, “Kitai enda ibuh begunaka saksi bukai. Kitai empu udah ninga nya ari mulut Iya Empu!”