Read Iban Luke 24 Bible Online

Luke 24 - Iban bible

Luke 24

¹Tang tumu pagi hari Minggu, sida indu nya mansang ngagai kubur, mai rempah ti udah disediaka sida.

²Sida lalu nemu batu nya udah dibaringka ari mua kubur nya,

³tang lebuh sida tama ke dalam kubur nya, sida nadai nemu bangkai Tuhan Jesus dia.[139]

⁴Lebuh sida agi beba ati berundingka nya, dua iku orang ke ngena gari ti beperenching, tekala nya bediri ngimbai sida.

⁵Sida lalu takut, lalu nyungkurka diri ke tanah, tang orang dua iku nya bejaku ngagai sida, “Nama kebuah kita begigaka orang ke idup ba bala orang ke mati? Iya nadai ditu tang udah angkat idup baru.[140]

⁶ Kingatka utai ti udah dipadahka Iya ngagai kita lebuh Iya agi di Galili,

⁷madahka Anak Mensia enda tau enda diserahka ngagai orang ke bedosa, lalu diregang, lalu ba hari ti ketiga, angkat idup baru.”

⁸Sida lalu ingatka jaku Iya,

⁹pulai ari kubur nya, lalu madahka semua utai nya ngagai murid ke sebelas iku, enggau ngagai semua sida ti bukai.

¹⁰ Nyadi orang ke nusui pasal utai nya ngagai sida rasul nya Maria Magdalin enggau Joana, enggau Maria indai James enggau indu ke bukai ke sama enggau sida.

¹¹Tang sida rasul ngumbai nya cherita ngapa, lalu sida enda arapka utai ti dipadahka sida indu nya.

¹²Tang Peter angkat lalu belanda ngagai kubur. Iya engkenduk lalu nilik ke dalam, lalu tepedaka semina kain linin aja bisi dia. Iya lalu pulai ke rumah, balat alit ati ke utai ti udah nyadi.[141]

¹³Sehari nya mega dua iku murid mansang ngagai sebuah genturung pendiau ke benama Emaus, kira sebelas kilometer[142] ari Jerusalem.

¹⁴Seduai iya berandauka pasal semua utai ti udah nyadi.

¹⁵Lebuh seduai iya benung berandau, Jesus Empu datai semak lalu bejalai enggau seduai iya,

¹⁶tang seduai iya enda ngelala Iya.

¹⁷Iya lalu bejaku ngagai seduai iya, “Nama utai ti dikerandauka seduai lebuh seduai bejalai tadi?” Seduai iya lalu ngetu[143] sereta berupai tusah ati.

¹⁸Siku ari seduai iya, ke benama Kliopas, lalu nyaut Iya, “Kati Nuan tu siku temuai di Jerusalem ke enda nemu utai ti udah nyadi dua tiga hari tu ti udah?”

¹⁹ Iya lalu nanya, “Utai nama?” Seduai iya lalu nyaut, “Pasal Jesus orang Nasaret, nabi ti bekuasa dalam pengawa enggau jaku di mua Allah Taala enggau di mua semua orang,

²⁰enggau chara bala tuai imam kami enggau bala tuai kami nyerahka Iya ngambika Iya diukum bunuh, lalu sida ngeregang Iya.

²¹Tang kami udah ngarapka Iya deka ngelepaska Israel! Sigi amat, lalu nambahka nya, tu ketiga hari utai nya udah nyadi.

²²Nambahka nya, sekeda indu ari bala kami udah ngasuh kami balat amat alit ati. Sida mansang ngagai kubur tumu pagi tadi,

²³lalu lebuh sida nadai nemu bangkai Iya dia, sida pulai ari kubur lalu madahka diri udah begenera meda melikat, ke madahka Jesus idup.

²⁴ Sekeda orang ke enggau kami lalu mansang ngabas kubur, lalu nemu utai dia munyi ti dipadahka sida indu, tang sida nadai meda Jesus.”

²⁵Jesus lalu bejaku ngagai seduai iya, “Kita amat beli. Lubah amat meh kita arapka semua jaku ti udah disebut sida nabi!

²⁶Kati Kristus[144] enda patut natka semua pemerinsa nya, lalu udah nya dimuliaka?”

²⁷ Jesus lalu nerangka ngagai seduai iya utai di udah disebut dalam semua Bup Kudus pasal Iya Empu, belabuh ari bup Moses enggau semua bup sida nabi.

²⁸ Lebuh sida nyau datai semak genturung pendiau ti digagai seduai iya, Jesus lalu ngaga Diri baka ke deka majakka pejalai Iya.

²⁹Tang seduai iya bebendar ngumbuk Iya. Ku seduai iya bejaku, “Bemalam enggau kami duai, laban hari nyau lemai, hari nyau ka malam.” Iya lalu bemalam enggau seduai iya.

³⁰ Lebuh Iya belatur deka makai enggau seduai iya, Iya ngambi roti, merekat lalu mechahka roti, lalu nyuaka roti nya ngagai seduai iya.

³¹Nya baru mata seduai iya tebuka, lalu ngelala orang nya Jesus. Iya lalu lesap, nadai dipeda seduai iya agi.

³²Ku seduai iya bejaku enggau pangan diri, “Enda ka ati tua asai ke disar api lebuh Iya bejaku enggau tua ba jalai raya tadi, lebuh Iya nerangka Bup Kudus ngagai tua?”

³³Seduai iya lalu tekala nya angkat, lalu pulai ngagai Jerusalem, lalu nemu murid ke sebelas iku begempuru enggau sida murid ti bukai.

³⁴ Ku sida bejaku, “Tuhan amat udah angkat idup baru, lalu Iya udah pegari di mua Simon!”

³⁵Udah nya seduai iya lalu madahka pasal utai ti udah nyadi di rantau jalai, enggau pasal seduai iya ke ngelala Iya lebuh Iya mechahka roti.

³⁶Lebuh seduai iya benung nusui nya, Jesus Empu lalu tekala nya bediri ba tengah-tengah sida, lalu bejaku ngagai sida, “Awakka pemaik meruan enggau kita.”[145]

³⁷Tang sida tekenyit sereta balat takut, lalu ngumbai diri meda antu.

³⁸Iya lalu bejaku ngagai sida, “Nama kebuah kita takut? Lalu nama kebuah ati kita kakang?

³⁹ Peda jari enggau kaki Aku. Aku meh tu. Tegu Aku, lalu peda, laban antu nadai isi tauka tulang baka Aku.”

⁴⁰Lebuh Iya udah nyebut nya, Iya lalu mandangka jari enggau kaki Iya ngagai sida.[146]

⁴¹Lebuh sida agi mengkang enda arap laban sida balat gaga sereta alit ati, Iya lalu bejaku ngagai sida, “Kati kita bisi utai diempa ditu?”

⁴²Sida lalu nyuaka ngagai Iya sekerat ikan ti udah dipanduk.

⁴³Iya ngambi lalu makai ikan nya di mua sida.

⁴⁴ Udah nya Iya lalu bejaku ngagai sida, “Tu meh utai ti udah dipadahka Aku ngagai kita lebuh Aku agi begulai enggau kita -- madahka semua utai ti udah ditulis pasal Aku dalam Adat Moses, dalam bup sida nabi, enggau dalam Masmur, enda tau enda dikamatka.”

⁴⁵Udah nya Iya lalu muka runding sida, ngambika sida meretika Bup Kudus,

⁴⁶ lalu ku Iya bejaku ngagai sida, “Tu meh utai ti udah ditulis: Kristus[147] enda tau enda natka pemerinsa, lalu angkat ari mati ba hari ti ketiga,

⁴⁷ lalu pesan pasal nesal ati, enggau pasal pengampun dosa dipadahka dalam nama Iya ngagai semua bansa, berengkah ari Jerusalem.

⁴⁸Kita tu meh orang ke besaksika semua utai tu.

⁴⁹ Lalu Aku deka ngirumka ngagai kita utai ti udah disemaya Apai; nya alai diau kita di nengeri tu nyentuk ngagai maya kita diberi kuasa ari atas.”

⁵⁰ Udah nya Iya mai sida pansut ngagai Betani. Dia Iya ngangkatka jari Iya lalu merekatka sida.

⁵¹ Lebuh Iya benung merekatka sida, Iya ninggalka sida lalu dibai niki ke serega, [148]

⁵²Sida lalu nyembah Iya,[149] lalu pulai ngagai Jerusalem enggau ati ti gaga,

⁵³lalu sida seruran diau dalam Rumah Sembiang muji[150] Allah Taala.[151]