Read Iban Luke 3 Bible Online

Luke 3 - Iban bible

Luke 3

¹ Dalam taun ti kelima belas Tiberius nyadi Raja Besai, lalu Pontius Pilate nyadi gabenor menua Judea, lalu Herod merintah di menua Galili, lalu menyadi Herod ke benama Philip merintah di menua Iturea enggau Trikonitis, lalu Laisanias merintah di Abilene,

² lebuh Anas seduai Kaiapas nyadi imam besai, jaku Allah Taala datai ngagai John anak Sekariah, di menua puang.

³ Iya lalu bejalai nengah semua menua ti ngimbai Sungai Jordan, ngajar pasal pemaptisa nesal ati ke pengampun dosa.

⁴ Munyi ti ditulis dalam bup nabi Isaiah: “Siku orang ngangau di menua puang: ‘Sediaka jalai ke Tuhan. ‘Gaga jalai Iya rurus.

⁵Genap lebak deka ditambun, genap bukit enggau munggu deka diruntuhka, jalai ti bingkuk deka digaga rurus, lalu jalai ti kasar deka digaga alus,

⁶ lalu semua mensia deka meda pengelepas Allah Taala!’ ”

⁷ Ku John bejaku ngagai bala orang ke datai minta diri dibaptisa ulih iya, “Kita anak ular! Sapa ngasuh kita rari ari ukum ti deka datai?

⁸ Kereja utai kena nunjukka kita amat udah nesal ati, lalu anang belabuh nyebut ngagai diri empu, ‘Kami tu peturun Abraham’, laban, aku madah ngagai kita, Allah Taala ulih ngaga batu tu nyadi peturun Abraham!

⁹ Indah diatu deh kapak udah sedia deka mungga urat kayu. Semua kayu ti enda mansutka buah ti manah, deka ditebang, lalu dibuai ngagai api.”

¹⁰Orang mayuh lalu nanya iya, “Enti pia, nama utai ti patut dikereja kami?”

¹¹ Ku iya nyaut sida, “Barang sapa bisi dua lambar baju, enda tau enda meri ngagai orang ke nadai, lalu orang ke bisi pemakai, enda tau enda ngereja baka nya mega.”

¹² Indah sida pengumpul chukai deh datai minta iya maptisa sida, lalu ku sida nanya iya, “Pengajar, nama utai ti patut dikereja kami?”

¹³Ku iya nyaut sida, “Anang minta chukai lebih ari ti patut.”

¹⁴Soldadu mega nanya iya, “Baka ni ku kami? Nama utai ti patut dikereja kami?” Ku iya bejaku ngagai sida, “Anang ngerampas duit orang, tauka besaksi bula ngelaban orang. Kita patut nemu puas ati ke gaji diri.”

¹⁵ Orang mayuh lalu belabuh andal ati, lalu betanya dalam ati diri pasal John, ngumbai iya Kristus.

¹⁶ John lalu nyaut semua sida, “Aku maptisa kita ngena ai, tang siku orang ke bekuasa agi ari aku deka datai. Indah muka tali selipar Iya deh aku enda tau. Iya deka maptisa kita ngena Roh Kudus enggau api.

¹⁷Iya bisi utai ti deka dikena Iya nyapu endur alai nungku gandum, lalu Iya deka nyimpan gandum dalam setor Iya, tang Iya deka nunu ampa dalam api ti enda nemu padam.”

¹⁸John meransang orang mayuh ngena mayuh macham jaku lebuh iya nusui Berita Manah ngagai sida.

¹⁹ Tang Raja Herod ke udah dirara John ketegal Herodias, bini menyadi iya, enggau ketegal semua penyai ti udah dikereja iya,

²⁰nambahka semua penyai nya lebuh iya nutup John dalam rumah jil.

²¹ Lebuh semua orang udah dibaptisa magang, lalu Jesus udah mega dibaptisa lalu besampi, langit lalu tebuka,

²² lalu Roh Kudus nurun atas Iya baka burung achang. Munyi nyawa lalu bejaku ari serega, “Nuan tu Anak ke dikesayauka Aku. Aku rinduka Nuan.”

²³ Umur Jesus tiga puluh taun lebuh Iya belabuh ngereja pengawa Iya. Nitihka penemu orang, Iya anak[20] Josep, anak Heli,

²⁴anak Matat, anak Lewi, anak Melki, anak Janai, anak Josep,

²⁵anak Matatias, anak Amos, anak Nahum, anak Esli, anak Naggai,

²⁶anak Mat, anak Matatias, anak Semein, anak Josik, anak Joda,

²⁷anak Joanan, anak Resa, anak Serubabel, anak Sealtiel, anak Neri,

²⁸anak Melki, anak Addi, anak Kosam, anak Elmadam, anak Er,

²⁹anak Josua, anak Elieser, anak Jorim, anak Matat, anak Lewi,

³⁰anak Simeon, anak Judah, anak Josep, anak Jonam, anak Eliakim.

³¹anak Melea, anak Menna, anak Matata, anak Natan, anak David,

³²anak Jesi, anak Obet, anak Boas, anak Salmon, anak Nason,

³³anak Aminadap, anak Admin, anak Arni, anak Hesron, anak Peres, anak Judah,

³⁴anak Jakop, anak Isak, anak Abraham, anak Terah, anak Nahor,

³⁵anak Seruk, anak Reu, anak Pelek, anak Eber, anak Selah,

³⁶anak Kainan, anak Apasat, anak Sem, anak Noah, anak Lamek,

³⁷anak Metuselah, anak Enok, anak Jaret, anak Mahalalel, anak Kenan,

³⁸anak Enos, anak Set, anak Adam, anak Allah Taala.