Read Iban Luke 4 Bible Online

Luke 4 - Iban bible

Luke 4

¹Jesus penuh laban Roh Kudus pulai ari Jordan, lalu Iya dibai[21] Roh Kudus ngagai menua puang,

² alai Iya ke diuji Sitan empat puluh hari. Iya nadai makai utai dalam kandang empat puluh hari nya, lalu ba ujung empat puluh hari nya, Iya lapar.

³Sitan lalu bejaku ngagai Iya, “Enti Nuan amat Anak Allah Taala, asuh batu tu nyadi roti.”

⁴ Disaut Jesus, “Endang udah ditulis, ‘Mensia enda ulih idup makai roti aja.’ ”

⁵Sitan lalu mai Iya ngagai siti endur ti tinggi, lalu mandangka ngagai Iya dalam sekejap mata semua menua di dunya

⁶ lalu bejaku ngagai Iya, “Aku deka meri semua kuasa enggau semua pengaya nya ngagai Nuan, laban semua utai nya udah diberi ngagai aku, lalu aku deka meri utai nya ngagai sebarang orang ke dipilih [22] aku.

⁷Nya alai, enti Nuan deka nyembah aku, semua utai nya deka diempu Nuan magang.”

⁸ Jesus lalu nyaut iya, “Endang udah ditulis, ‘Sembah Tuhan Allah Taala nuan, lalu betuaika Iya siku aja!’ ”

⁹Sitan lalu mai Jesus ngagai Jerusalem, lalu ngengkahka Iya ba legit perabung Rumah Sembiang, lalu bejaku ngagai Iya, “Enti Nuan amat Anak Allah Taala, terejun Nuan ari tu,

¹⁰ laban endang udah ditulis, ‘Allah Taala deka ngasuh melikat Iya nyaga Nuan.’

¹¹Lalu tu mega udah ditulis, ‘Sida deka nyambut Nuan ngena jari sida, ngambika kaki Nuan enda terempas ba batu.’ ”

¹² Ku Jesus nyaut iya, “Endang udah disebut,[23] ‘Anang nguji Tuhan Allah Taala nuan,’ ”

¹³ Lebuh Sitan udah tembu nguji Jesus ngena genap macham chara, iya ninggalka Jesus, nganti maya ti manah.[24]

¹⁴Jesus, penuh laban kuasa Roh Kudus, pulai ngagai menua Galili, lalu berita pasal Iya ngelekai di serata menua nya.

¹⁵ Iya lalu belabuh ngajar dalam balai gempuru, lalu semua orang bela muji Iya.

¹⁶Lebuh Iya datai di Nasaret, alai Iya ke diau kenyau ari mit, Iya mansang ngagai balai gempuru baka selama lebuh hari Sabat. Iya bediri, deka macha ari Bup Kudus.

¹⁷Bup[25] nabi Isaiah lalu disuaka ngagai Iya. Iya muka bup nya, lalu tetemuka siti endur alai jaku tu ditulis,

¹⁸ “Roh Tuhan bisi ba Aku, laban Iya udah nata Aku ngambika Aku nusui Berita Manah ngagai orang ke seranta. Iya udah ngasuh Aku madahka pengelepas ke orang ke kena tangkap enggau pengerai ke orang ke buta, pengelepas ke orang ke kena tekan

¹⁹lalu madahka maya udah datai alai Tuhan deka ngelepaska nembiak Iya.”

²⁰Iya lalu ngulungka bup nya baru, lalu nyuaka bup nya pulai baru ngagai orang ke udah nyuaka bup nya ngagai Iya. Iya lalu duduk. Semua orang dalam balai gempuru nya bela merening ngagai Iya magang.

²¹Iya lalu madah ngagai sida, “Sehari tu ayat dalam Bup Kudus tu udah dikamatka munyi ti udah didinga kita.”

²² Semua sida bela bejaku muji Iya, sereta balat alit ati ke pemanah jaku Iya. Ku sida, “Ukai enda Iya tu anak Josep?”

²³ Iya lalu bejaku ngagai sida, “Kita tentu deka nyebut jaku-dalam tu ngagai Aku, ‘Lutur, geraika diri empu.’ Llalu kita deka nyebut, ‘Kereja mega di menua Nuan Empu ditu utai ti udah didinga kami kereja Nuan di Kapernaum.’ ”

²⁴ Lalu ku Iya bejaku ngagai sida, “Enggau bendar Aku madah ngagai kita, nadai siku nabi kala diterima di menua iya empu.

²⁵ Tang iya ti bendar: indu ke balu endang mayuh di menua Israel lebuh rambau Elijah menya, lebuh hari enda ujan tiga taun setengah, lalu lapar pungkang nyadi di serata menua tu.

²⁶ Tang Elijah ukai diasuh datai ngagai sida, tang semina ngagai siku indu ke balu ke diau di Sarepat, di menua Sidon.

²⁷ Lalu orang ke sakit lan mega mayuh di menua Israel lebuh rambau nabi Elisa menya, tang nadai siku sida digeraika, kelimpah ari Naaman orang Siria.”

²⁸Lebuh sida ninga nya, semua sida ke dalam balai gempuru nya lalu balat amat pedis ati.

²⁹ Sida angkat, lalu muru Iya ari nengeri nya, mai Iya ngagai tuchung bukit ti alai nengeri nya bediri, deka nikauka Iya ari pala tingkah.

³⁰ Tang Iya enselit pansut nengah bala sida, lalu mupuk ari endur nya.

³¹Iya lalu mupuk ngagai Kapernaum, sebuah nengeri di menua Galili, lalu ngajar orang dia lebuh hari Sabat.

³² Sida alit ati ninga ajar Iya, laban Iya bejaku ngena kuasa.

³³Dalam balai gempuru nya bisi siku lelaki ke dirasuk antu. Iya nyerauh inggar amat, ku iya,

³⁴“Nama utai ti deka dikereja Nuan ngagai kami, Jesus orang Nasaret? Kati Nuan deka ngerusak kami? Aku ngelala Nuan. Nuan tu Iya ti Kudus ari Allah Taala!”

³⁵Tang Jesus ngerara iya, “Anang bejaku; pansut nuan ari iya!” Lebuh antu nya udah ngempaska lelaki nya di mua orang mayuh, iya lalu pansut ari orang nya, tang enda ngemediska iya.

³⁶Semua orang mayuh balat alit ati, lalu bejaku enggau pangan diri, “Jaku nama tu? Iya bisi kuasa merintah sereta muru roh ti jai, lalu sida pansut!”

³⁷ Berita pasal Jesus lalu ngelekai ngagai semua endur di menua nya.

³⁸Lebuh Jesus udah ninggalka balai gempuru nya, Iya tama ngagai rumah Simon. Nyadi mentua indu Simon balat amat sakit chelap angat, lalu sida nanya Jesus pasal iya.

³⁹Jesus lalu meremi ari atas indu nya, lalu muru[26] penyakit nya. Indu nya lalu gerai. Tekala nya Iya lalu angkat, lalu mela sida.

⁴⁰Lebuh padam mata panas, semua orang ke bisi pangan ke sakit laban mayuh macham penyakit, mai pangan sida ngagai Jesus. Iya lalu ngengkahka jari Iya atas genap iku sida, lalu ngeraika sida.

⁴¹Antu mega pansut ari mayuh orang, lalu nyerauh, “Nuan tu Anak Allah Taala!” Tang Iya ngerara sida, lalu enda nyagi sida bejaku, laban sida nemu Iya endang Kristus.

⁴²Ba urung rerak tawas, Iya angkat lalu mupuk ngagai endur siti ti sunyi. Orang mayuh lalu begigaka Iya. Lebuh sida udah tetemuka Iya, sida lalu enda nyagi Iya ninggalka sida.

⁴³Tang ku Iya bejaku ngagai sida, “Aku enda tau enda mega nusui Berita Manah pasal Perintah Allah Taala ngagai nengeri bukai, laban nya kebuah Aku dikirumka.”

⁴⁴ Nya alai Iya majak nusui Berita Manah dalam balai gempuru di serata menua Judea.