Read Iban Luke 6 Bible Online

Luke 6 - Iban bible

Luke 6

¹ Nyadi sekali lebuh Jesus bejalai nengah umai gandum kena hari Sabat, sida murid Iya ngambi tangkai gandum, ngusuk lalu makai leka gandum nya.

² Tang ku sekeda orang Parisi, “Nama kebuah kita ngereja utai ti enda disagi lebuh hari Sabat?”

³ Jesus lalu nyaut, “Kati kita nadai udah kala macha pasal utai ti dikereja David lebuh iya enggau bala iya lapar?

⁴ Iya tama ngagai rumah Allah Taala, ngambi lalu makai roti ti udah dienjuk ngagai Allah Taala, roti ti enda tau diempa mensia, kelimpah ari sida imam, lalu meri roti nya ngagai bala iya?”

⁵Iya lalu bejaku ngagai sida, “Anak Mensia Tuhan ke hari Sabat.”[28]

⁶Nyadi sekali lebuh hari Sabat ti bukai, Iya tama ngagai balai gempuru, lalu ngajar, lalu siku lelaki ke mati jari kanan, bisi dia.

⁷Sida pengajar Adat enggau orang Parisi lalu nengkilaka Jesus, deka meda enti Iya deka ngeraika orang nya lebuh hari Sabat tauka enda, ngambika sida ulih besalahka Iya.

⁸Taja pen nemu runding sida, tang Iya bejaku ngagai orang ke mati jari nya, “Datai kitu, lalu bediri ditu.” Orang nya angkat, lalu bediri.

⁹Jesus lalu bejaku ngagai sida, “Aku nanya ngagai kita: Kati kitai tau ngereja utai ti manah tauka ngemedis lebuh hari Sabat, ngidupka nyawa, tauka munuh?”

¹⁰Lebuh Iya udah merening ngagai semua sida, Iya lalu bejaku ngagai orang ke mati jari nya, “Unjurka jari nuan.” Orang nya lalu ngunjurka jari iya, lalu jari iya gerai.

¹¹Tang sida balat pedis ati, lalu berandau enggau pangan diri pasal utai ti deka dikereja sida ngagai Jesus.

¹² Lebuh maya nya, Iya niki ngagai bukit sigi, deka besampi, lalu Iya besampi semalam-malam nya ngagai Allah Taala.

¹³Ba urung rerak tawas, Iya ngangauka sida murid Iya, lalu milih dua belas iku ari bala sida, lalu Iya ngumbai sida nya rasul:

¹⁴Simon (ke digelar Iya Peter) enggau menyadi iya Andrew; James seduai John, Philip enggau Bartolomew,

¹⁵Matthew seduai Thomas, James anak Alpius, enggau Simon (ke digelar Bujang Berani),

¹⁶Judas anak James, enggau Judas Iskariot, ke nyual Iya.

¹⁷Iya lalu nurun ari bukit nya enggau sida, lalu bediri ba tanah ti rata, sama enggau mayuh sida murid Iya, sereta enggau mayuh amat orang ari semua menua Judea, Jerusalem, enggau ari Tire enggau ari Sidon ti ba tebing tasik.

¹⁸Sida udah datai deka mendingka Iya, sereta minta diri digeraika ari penyakit. Lalu orang ke dikeduan antu digeraika.

¹⁹ Semua orang dalam bala mayuh nya nguji negu Iya, laban kuasa pansut ari Iya lalu ngeraika semua sida.

²⁰Iya lalu merening ngagai sida murid Iya, lalu bejaku, “Beberekat meh kita ke seranta, laban kita deka bempu Perintah Allah Taala!

²¹“Beberekat meh kita ke lapar diatu, laban kita deka dikenyangka! “Beberekat meh kita ke nyabak diatu, laban kita deka ketawa!

²² “Beberekat meh kita lebuh orang begedika kita, lebuh sida nulak kita, ngeleseka kita, lalu bejai kita ketegal Anak Mensia!

²³ Rami gaga ati meh kita lebuh hari nya, lalu merejuk gaga ati, laban upah ti besai disedia ke kita di serega. Laban nya meh utai ti udah dikereja aki ini sida kelia ngagai sida nabi.

²⁴ “Tang tulah meh kita ke kaya; laban kita udah nyamai diau!

²⁵“Tulah meh kita ke kenyang diatu, laban kita deka lapar! “Tulah meh kita ke ketawa diatu, laban kita deka ngulit sereta nyabak!

²⁶“Tulah meh kita lebuh semua orang muji kita, laban nya utai ti udah dikereja aki ini sida ngagai sida nabi ti pelesu.

²⁷“Tang Aku madah ngagai kita ke mending: Rinduka munsuh kita. Kereja utai ti manah ngagai orang ke begedika kita.

²⁸Berekatka orang ke nyumpah kita, besampika orang ke merinsaka kita.

²⁹Enti orang nampar kuyu kita sepiak, awakka iya mega nampar kuyu kita sepiak. Enti orang ngambi kelambi kita, awakka iya mega ngambi baju kita.

³⁰Beri ngagai semua orang ke minta utai ari kita, lalu lebuh orang ngambi utai kita, anang minta utai nya dipulaika baru.

³¹ Kereja ngagai orang baka ke dikedekaka kita kereja sida ngagai kita.

³² “Enti kita rinduka orang ke rinduka kita, baka ni ku nya tau nyadika berekat kita? Indah orang ke bedosa deh nemu rinduka orang ke rinduka sida!

³³Lalu enti kita manah enggau orang ke manah enggau kita, baka ni ku nya tau nyadika berekat kita? Indah orang ke bedosa deh nemu ngereja nya!

³⁴Enti kita nyali utai semina ngagai orang ke dikarapka ulih mulaika utai nya ngagai kita, baka ni ku nya tau nyadika berekat kita? Indah orang ke bedosa deh nemu nyali utai ngagai pangan diri, lalu ngarapka diri ulih nerima utai nya pulai baru!

³⁵ Tang rinduka munsuh kita, lalu kereja utai ti manah ngagai sida. Jali utai ngagai orang, lalu anang ngarapka diri nerima bayar. Nya baru upah kita besai, lalu kita deka nyadi anak Allah Taala ti Pemadu Tinggi; laban Iya manah enggau orang ke enda nemu beterima kasih, sereta enggau orang ke jai.

³⁶Kasihka orang, baka Apai kita ti kasih.

³⁷“Anang ngakim, nya baru kita enda diakim. Anang ngukum, nya baru kita enda diukum. Ampun, nya baru kita diampun.

³⁸ Beri, lalu kita deka diberi. Takar ti chukup, ti dienyak, digusak, ti meruap lalu lilih, deka diberi ngagai kita; laban takar ti dikena kita nakar deka dikena nakar utai ke kita.”

³⁹ Jesus mega madahka sempama tu ngagai sida: “Kati orang ke buta ulih ngiring orang ke buta? Enda ka seduai iya deka sama labuh ngagai lubang kebung?

⁴⁰ Murid endang nadai kala lebih ari pengajar iya; tang semua murid, lebuh sida udah tembu belatih, deka nyadi sebaka enggau pengajar sida.

⁴¹ “Nama kebuah kita betilikka empeleman ba mata pangan kita, tang enda tepedaka lumpung kayu ti ba mata kita empu?

⁴²Tauka, baka ni ku kita nyebut ngagai menyadi kita, ‘Menyadi, awakka aku muai empeleman ari mata nuan,’ tang kita enda meda lumpung kayu ti ba mata kita empu? Kita tu orang ke pura-pura ngapa![29] Buai dulu lumpung kayu ari mata kita empu, nya baru mata kita lansik lalu kita ulih muai empeleman ari mata menyadi kita.

⁴³“Kayu ti manah enda mansutka buah ti jai. Lalu kayu ti jai enda mansutka buah ti manah.

⁴⁴ Laban genap batang kayu dikelala ari buah iya. Buah ara ukai diambi ari unak, lalu buah anggur ukai diambi ari madang emperingat.

⁴⁵ Orang ke manah mansutka utai ti manah ari ati iya, lalu orang ke jai mansutka utai ti jai ari ati iya. Laban iya nyebut utai ti ngemenuhka ati iya.

⁴⁶ “Nama kebuah kita ngumbai Aku, ‘Tuhan, Tuhan,’ tang enda ngereja utai ti diasuh Aku?

⁴⁷ Aku deka madah ngagai kita gaya orang ke datai ngagai Aku, ke mending lalu ngasika jaku Aku.

⁴⁸Iya baka orang siku ke ngaga rumah. Iya numbak lubang ti dalam lalu nudukka pugu rumah iya ba atas batu. Sungai bah ngampuhka tebing, lalu mangka ngagai rumah nya, tang enda ulih nguyat rumah nya, laban rumah nya udah tegap digaga.

⁴⁹Tang orang ke ninga tang enda ngasika jaku Aku, nya baka orang siku ke ngaga rumah ti nadai batu pemun. Lebuh ai bah mangka ngagai rumah nya, rumah nya tumbang tekala nya. Balat amat rumah nya rusak!”