Read Iban Luke 7 Bible Online

Luke 7 - Iban bible

Luke 7

¹Lebuh Jesus udah nyebut semua utai nya ngagai orang mayuh, Iya lalu mupuk[30] ngagai Kapernaum.

²Siku pemesai soldadu Rome bisi siku ulun. Ulun nya balat dikesayauka iya. Nyadi ulun nya sakit lalu nyau deka mati.

³Lebuh pemesai nya ninga pasal Jesus, iya lalu ngasuh sekeda tuai orang Judah betemu enggau Jesus, minta Jesus datai lalu ngeraika ulun iya.

⁴Lebuh bala tuai orang Judah betemu enggau Jesus, sida bebendar amat minta Iya datai. Ku sida, “Orang tu patut disaup Nuan,

⁵ laban iya angkunka bansa kitai, lalu iya udah ngaga sebuah balai gempuru ke kami.”

⁶Jesus lalu mupuk enggau sida, tang lebuh Iya nyau ka datai ba rumah nya, pemesai nya lalu ngasuh pangan iya madah ngagai Jesus, “Tuan, anang ngiruh Diri, laban aku enda chukup badas alai Nuan datai.

⁷Nya kebuah aku enda datai ngagai Nuan. Tak sebut aja jaku, lalu geraika nembiak aku.

⁸Laban aku empu mega bekereja di baruh pemesai, lalu aku mega bisi soldadu dipegai aku. Aku bejaku ngagai siku, ‘Mupuk nuan!’ lalu iya mupuk. Ngagai siku ti bukai aku bejaku, ‘Kitu ke nuan,’ lalu iya datai. Lalu aku bejaku ngagai ulun aku, ‘Kereja tu!’ lalu iya ngereja utai nya.”

⁹Lebuh Jesus ninga nya, Iya balat alit ati ke pemesai nya. Jesus nguing ngagai bala orang mayuh ke nitihka Iya, lalu bejaku “Aku madah ngagai kita, Indah di menua Israel deh Aku nadai udah kala tetemuka pengarap ti baka tu.”

¹⁰Lebuh orang ke udah diasuh mai pesan pulai ngagai rumah pemesai nya, sida nemu ulun nya udah gerai.

¹¹ Enda lama udah bekau nya,[31] Jesus bejalai ngagai sebuah nengeri ti dikumbai Nain, disempulang sida murid Iya, enggau orang mayuh.

¹²Lebuh Iya datai semak pintu nengeri nya, bala orang ke nganjung siku lelaki ti udah mati, pansut ari nengeri nya. Nyadi lelaki ke mati nya anak tunggal siku indu balu. Mayuh amat orang ari nengeri nya bejalai enggau indu nya.

¹³ Lebuh Tuhan meda indu nya, Iya sinu ati ke iya, lalu bejaku ngagai iya, “Anang nyabak.”

¹⁴Iya mansang lalu negu sentubung nya, lalu orang ke ngesan sentubung nya ngetu. Jesus lalu bejaku, “Bujang! Aku bejaku ngagai nuan: angkat nuan!”

¹⁵Orang ke mati nya lalu duduk, lalu belabuh bejaku. Jesus lalu nyerahka iya ngagai indai iya.

¹⁶ Semua sida nangi lalu ngemuliaka Allah Taala. Ku sida, “Nabi ke besai udah pegari ba bala kitai! Allah Taala udah datai nulung nembiak Iya!”

¹⁷Berita pasal Jesus lalu ngelekai di semua menua Judea enggau di serata menua ti ngelingi menua nya.

¹⁸Sida murid John madahka semua utai nya ngagai John. Nya alai John ngangauka dua iku murid iya

¹⁹lalu ngasuh seduai iya betemu enggau Tuhan, ngambika seduai iya nanya, “Kati Nuan tu orang ke deka datai, tauka kami nganti orang bukai?”

²⁰Lebuh seduai iya betemu enggau Jesus, seduai iya lalu bejaku, “John Pemaptisa udah ngasuh kami duai betemu enggau Nuan lalu nanya Nuan, ‘Kati Nuan tu orang ke deka datai, tauka kami nganti orang bukai?’ ”

²¹ Lebuh maya nya Jesus baru udah ngeraika mayuh orang ari penyakit, ari pemedis, enggau ari keduan roh ti jai, lalu mayuh orang ke buta ulih meda.

²² Lalu ku Iya nyaut seduai iya, “Mupuk meh seduai, lalu padahka ngagai John pasal utai ti udah dipeda enggau didinga seduai: orang ke buta meda, orang ke lemi bejalai, orang ke sakit lan, dituchi,[32] orang ke bengal ninga, orang ke mati diangkatka idup baru, lalu Berita Manah dipadahka ngagai orang ke seranta.

²³Beberekat meh orang ke enda nulak Aku.”

²⁴Lebuh seruan John udah mupuk, Jesus lalu belabuh bejaku ngagai orang mayuh pasal John: “Nama utai ti deka dipeda kita di menua puang? Buluh ti beguyat laban ribut?

²⁵Nama utai ti deka dipeda kita? Deka meda orang ke ngena gari ti manah? Orang ke ngena gari ti manah lalu diau lantang senang, diau di istana!

²⁶Nama utai ti deka dipeda kita? Siku nabi? Amat. Tang, Aku madah ngagai kita, kita meda lebih agi ari nabi.

²⁷ Tu meh orang ke dikenang dalam Bup Kudus: ‘Aku ngasuh seruan Aku bejalai dulu ari Nuan, ngambika iya nyendiaka jalai ke Nuan.’

²⁸Aku madah ngagai kita, ari semua orang ke diadaka indu, nadai siku ke besai agi ari John. Tang Iya ke pemadu mit dalam Perintah Allah Taala, besai agi ari iya.”

²⁹ (Semua orang ke ninga nya, nyengkaum sida pengumpul chukai, bela ngumbai Allah Taala amat lurus, laban sida udah dibaptisa ngena baptisa John.

³⁰Tang orang Parisi enggau sida pengajar Adat ke enggai dibaptisa ulih John, nulak tuju Allah Taala dalam pengidup sida.)

³¹Ku Jesus nampung jaku Iya, “Ngagai apa Aku mandingka orang ke rebak diatu? Baka apa sida nya?

³²Sida nya baka bala anak mit ke duduk ba sebelah pasar, ke bekangauka pangan diri, ‘Kami nyepu kesuling, tang kita enda betanda! Kami bekeduie nyabak, tang kita enda nyabak!’

³³ Laban John pemaptisa udah datai, nadai makai utai, nadai ngirup wain, lalu ku kita, ‘Iya dirasuk antu!’

³⁴ Anak Mensia udah datai makai enggau ngirup, lalu ku kita, ‘Peda orang nya! Iya bam sereta pemabuk, pangan sida pengumpul chukai, enggau orang ke bedosa!’

³⁵Tang taja pia, penemu-dalam diayanka amat ngena, ulih orang ke nerima iya.”

³⁶ Siku orang Parisi mai Jesus makai enggau iya. Jesus lalu mansang ngagai rumah orang nya, lalu belatur deka makai.

³⁷ Nyadi di nengeri nya bisi siku indu ke bedosa. Lebuh iya ninga Jesus bisi makai dalam rumah orang Parisi nya, iya lalu mai sebutul minyak wangi.

³⁸Iya bediri ari belakang Jesus ngimbai kaki Iya, nyabak, lalu belabuh ngemasahka kaki Jesus ngena ai mata iya. Iya lalu ngendas kaki Jesus ngena buk iya, nyium lalu nata kaki Jesus ngena minyak wangi nya.

³⁹ Lebuh orang Parisi ke mai Jesus makai, meda nya, iya lalu bejaku dalam ati diri, “Enti orang tu amat nabi, Iya tentu nemu indu ke negu Iya nya orang ke bedosa.”

⁴⁰Jesus lalu bejaku ngagai iya, “Simon, Aku bisi utai ti deka dipadahka ngagai nuan.” Simon lalu nyaut, “Padahka ngagai aku, Pengajar.”

⁴¹Jesus lalu madah ngagai iya, ku Iya, “Siku orang ke bejalika duit ngagai orang, bisi dua iku orang berutang ba iya. Siku berutang lima ratus singkap duit pirak,[33] lalu siku berutang lima puluh singkap.

⁴² Lebuh seduai iya enda tebayarka utang diri, iya muai utang seduai iya. Sapa ari seduai nya ke deka lebih agi rinduka iya?”

⁴³ Simon lalu nyaut, “Nyangka iya ke mayuh agi utang, ke enda ibuh mayar utang.” Jesus lalu nyaut, “Betul sangka nuan.”

⁴⁴Jesus lalu nguing ngagai indu nya, lalu bejaku ngagai Simon, “Kati nuan bisi meda indu tu? Aku tama ngagai rumah nuan, tang nuan nadai meri Aku ai kena Aku masu kaki, tang iya udah masu kaki Aku ngena ai mata iya, lalu ngendas kaki Aku ngena buk iya.

⁴⁵Nuan enda nyium Aku, tang kenyau ari Aku tama tadi iya enda ngetu-ngetu nyium kaki Aku.

⁴⁶Nuan enda nata pala Aku ngena minyak, tang iya udah nata kaki Aku ngena minyak wangi.

⁴⁷Nya alai, Aku madah ngagai nuan, dosa iya ti mayuh, udah diampun, nya kebuah iya balat rindu; tang orang ke diampun mimit, deka rindu mimit aja.”

⁴⁸ Jesus lalu bejaku ngagai indu nya, “Dosa nuan diampun.”

⁴⁹Tang orang ke duduk makai enggau Iya ba mija nya lalu belabuh bejaku enggau pangan diri, “Sapa orang tu, datai ke Iya berani ngampun dosa?”

⁵⁰ Lalu ku Jesus bejaku ngagai indu nya, “Pengarap nuan udah nyelamatka nuan. Pulai meh nuan enggau selamat.”