Read Iban Luke 8 Bible Online

Luke 8 - Iban bible

Luke 8

¹ Enda tentu lama udah bekau nya, Jesus bejalai nengah nengeri enggau genturung pendiau, nusui Berita Manah pasal Perintah Allah Taala. Murid ke dua belas iku bisi enggau Iya,

²lalu pia mega sekeda indu ke udah digeraika Jesus ari antu enggau ari penyakit: Maria (ke dikumbai Magdalin) alai Jesus ke udah muru tujuh iku antu;

³enggau Joana, (bini Chusa, siku pemesai dalam opis Herod), enggau Susana, enggau mayuh indu ke bukai, ke ngena duit sida empu nulung Jesus enggau sida murid Iya.

⁴Lebuh mayuh amat orang begempuru, lalu orang ari mayuh bengkah nengeri datai ngagai Jesus, Iya bejaku ngena jaku sempama:

⁵“Orang siku mansang naburka benih. Lebuh iya naburka benih, sekeda benih nya labuh ba jalai raya lalu kena indik kaki mensia, lalu burung makai leka benih nya.

⁶Sekeda labuh ba batu, lalu lebuh iya tumbuh, iya layu, laban iya nadai ai.

⁷Sekeda labuh ba madang duri. Duri nya tumbuh sama enggau leka benih nya, lalu ngalahka iya.

⁸ Lalu sekeda labuh ba tanah ti ami, lalu tumbuh, lalu bebuah seratus kali lipat.” Lebuh Iya udah nyebut nya, Iya lalu ngangau, “Awakka orang ke bisi pending, ninga.”

⁹ Sida murid Iya lalu nanya ngagai Iya reti jaku sempama nya,

¹⁰ Ku Iya, “Kita udah diberi penemu pasal misteri Perintah Allah Taala, tang ngagai sida ti bukai, Aku bejaku ngena jaku sempama, ngambika ‘sida merening, tang enda meda; mending, tang enda mereti.’

¹¹ “Tu reti sempama nya: benih nya jaku Allah Taala.

¹²Benih ti labuh ba jalai raya nya orang ke ninga. Udah nya Sitan datai lalu ngerampas pesan nya ari ati sida, ngambika sida enda arap lalu enda diselamatka.

¹³Benih ti labuh ba batu nya orang ke ninga pesan nya, lalu nerima iya enggau ati ti gaga. Tang sida nadai urat. Sida arap enda lama, lalu lebuh penguji datai, sida badu agi arap.

¹⁴Benih ti labuh ba madang duri nya orang ke ninga, tang lebuh sida mupuk ari endur nya, sida alah laban pengirau, pengaya, enggau pengelantang dunya, lalu buah sida enda mansau.

¹⁵Tang benih ti labuh ba tanah ti ami nya orang ke ninga pesan, lalu ngingatka iya dalam ati ti manah sereta ngasi, lalu sida bebuah enggau ati ti liat sereta tan.

¹⁶ “Nadai orang nungkun lampu, lalu ngerungkup iya ngena bisin, tauka ngengkahka iya di baruh katil, tang ngengkahka lampu nya ba penuduk lampu, ngambika orang ke tama ulih meda penampak nya.

¹⁷ “Laban nadai utai ti dilalai, enda dikebakka, lalu nadai utai ti resia, enda ditemu.

¹⁸ “Nya alai, pendingka enggau manah; laban orang ke bisi utai, deka diberi mayuh agi, tang orang ke nadai utai, indah utai ti mimit ti dikemisi sida, deh deka dirampas ari sida.”

¹⁹Udah nya indai enggau sida menyadi lelaki Jesus datai ngagai Iya, tang sida enda ulih betemu enggau Iya laban orang kelalu mayuh.

²⁰Orang lalu madah ngagai Iya, “Indai Nuan enggau sida menyadi lelaki Nuan bisi di luar, deka betemu enggau Nuan.”

²¹ Tang ku Iya bejaku ngagai sida, “Indai Aku enggau menyadi lelaki Aku nya orang ke ningaka jaku Allah Taala, lalu ngereja iya.”

²²Nyadi sekali Iya nepan sebuah perau enggau sida murid Iya, lalu ku Iya bejaku ngagai sida, “Aram kitai ngelayang ke seberai danau tu.” Sida lalu bekejang.

²³Lebuh sida belayar, Jesus tinduk. Ribut biaubalai lalu mangka ba danau nya, lalu ai belabuh tama ngagai perau sida, datai ke perau sida nyau deka karam.

²⁴ Sida mansang ngagai Iya lalu ngerak Iya enggau panjung, “Pengajar, Pengajar! Mati kitai tu!” Iya lalu dani, lalu ngerara ribut enggau gelumbang. Ribut enggau gelumbang lalu badu, lalu semua utai teduh magang.

²⁵Ku Iya bejaku ngagai sida, “Kini ke tunga pengarap kita?” Sida takut sereta balat alit ati, lalu bejaku enggau pangan diri, “Sapa orang tu, datai ke Iya bejaku ngagai ribut enggau ai, lalu sida ngasika Iya?”

²⁶Sida lalu datai di menua Gerasenes,[34] di seberai Danau Galili.

²⁷Lebuh Iya niki ke tebing, siku orang ari nengeri nya ke dirasuk antu, betemu enggau Iya. Orang nya lama udah telanjai, lalu iya enda diau di rumah, tang diau ba sebelah pendam.

²⁸ Lebuh iya meda Jesus, iya nyungkurka diri di mua Jesus lalu nyerauh enggau pengabis penginggar nyawa iya, “Nama utai ti deka dikereja Nuan ngagai aku, Jesus, Anak Allah Taala ti Pemadu Tinggi? Aku minta Nuan, anang merinsaka aku!”

²⁹Laban Jesus udah muru antu nya pansut ari orang nya. (Antu nya suah udah ngerasuk orang nya. Iya ditutup dalam rumah jil, lalu ditanchang ngena rantai, tang iya mutuska rantai nya, lalu dibai antu nya ngagai menua puang.)

³⁰Jesus lalu nanya iya, “Sapa nama nuan?” Iya lalu nyaut, “Nama aku Bala”; laban mayuh antu udah ngerasuk iya.

³¹Sida antu nya lalu minta Jesus enda muai sida ngagai lubang kebung ti dalam.[35]

³²Nyadi semak endur nya bisi raban babi benung makai ba munggu. Sida antu nya lalu minta Jesus ngemendarka sida tama ngagai raban babi nya. Jesus lalu ngemendarka sida.

³³Sida antu nya lalu pansut ari orang nya, lalu tama ngagai babi. Semua babi nya lalu belanda nurun tebiang, terejun ngagai danau nya, lalu lemas.

³⁴Lebuh bala orang ke ngibun raban babi meda utai nya, sida rari lalu madahka pasal utai nya ngagai orang ke di nengeri enggau di menua pesisir.

³⁵Orang mayuh lalu datai deka meda utai ti udah nyadi. Lebuh sida datai ngagai Jesus, sida nemu orang ke udah dilepaska ari antu nya duduk semak kaki Jesus, udah begari, lalu enda agi gila. Semua sida lalu takut.

³⁶Orang ke udah meda utai nya nyadi lalu madah ngagai sida jalai orang ke dirasuk antu nya digeraika.

³⁷Udah nya semua orang di menua nya lalu minta Jesus mupuk ari menua sida, laban sida balat takut. Jesus lalu nepan perau lalu pulai.

³⁸Orang ke udah dilepaska ari rasuk antu nya minta Jesus mai iya, ngambika iya ulih enggau Jesus. Tang Jesus ngasuh iya pulai. Ku Jesus bejaku,

³⁹“Pulai nuan ke rumah, lalu padahka utai ti udah dikereja Allah Taala ke nuan.” Orang nya mupuk lalu madah ngagai semua orang di nengeri nya pasal utai ti udah dikereja Jesus ke iya.

⁴⁰Lebuh Jesus udah mulaika Diri ke seberai, orang mayuh nyambut penatai Iya, laban semua sida bela nganti Iya.

⁴¹Siku lelaki ke benama Jairus lalu datai. Jairus tu siku pemesai ke ngemataka balai gempuru. Iya nyungkurka diri di kaki Jesus, lalu minta Jesus datai ngagai rumah iya,

⁴²laban anak indu iya ke tunggal, ke umur dua belas taun, nyau deka mati. Lebuh Jesus benung bejalai, orang mayuh nyau besedul ngelingi Iya.

⁴³Nyadi dia bisi siku indu ke udah sakit begetah dua belas taun. Taja pen duit iya nyau abis kena iya berubat ngagai lutur,[36] tang nadai siku orang ulih ngeraika iya.

⁴⁴Iya datai ari belakang Jesus lalu negu puting gari Jesus. Tekala nya iya lalu badu agi begetah.

⁴⁵ Jesus lalu nanya, “Sapa negu Aku?” Lebuh semua orang bela madahka diri nadai negu Iya, Peter[37] lalu bejaku, “Pengajar, semua bala orang tu nyau besedul ngelingi Nuan.”

⁴⁶ Tang ku Jesus, “Bisi orang udah negu Aku, laban Aku ngasaika kuasa bisi udah pansut ari Aku.”

⁴⁷Lebuh indu nya nemu diri enda ulih ngelalaika diri, iya lalu datai getar-getar, nyungkurka diri di mua Jesus, lalu madah ngagai Jesus di mua orang mayuh, kebuah iya negu Jesus, enggau pasal iya ke udah digeraika tekala nya.

⁴⁸ Jesus lalu bejaku ngagai iya, “Anak, pengarap nuan udah ngeraika nuan. Pulai meh nuan enggau selamat.”

⁴⁹Lebuh Jesus benung bejaku, siku orang datai ari rumah Jairus, lalu bejaku, “Anak indu nuan udah mati. Anang agi ngiruh Pengajar.”

⁵⁰Lebuh Jesus ninga nya, Iya lalu nyaut, “Anang takut. Arap aja. Iya deka idup.”[38]

⁵¹Lebuh Iya datai ba rumah Jairus, Iya enda nyagi orang tama enggau Iya, kelimpah ari Peter, John, enggau James, enggau apai indai anak mit nya.

⁵²Semua orang nyau bekeduie nyabakka anak mit nya. Tang ku Jesus bejaku, “Anang nyabak, laban iya ukai mati, tang tinduk!”

⁵³Sida lalu ketawaka Iya, laban sida nemu anak mit nya endang udah mati.

⁵⁴Tang Jesus megai jari anak mit nya, lalu ngangau. “Anak, angkat nuan!”

⁵⁵Roh[39] iya lalu pulai baru ngagai iya, lalu iya angkat tekala nya. Jesus lalu ngasuh sida meri iya utai diempa.

⁵⁶ Apai indai indu nya balat amat alit ati, tang Jesus enda nyagi seduai iya madah ngagai orang pasal utai ti udah nyadi.