Read Iban Luke 9 Bible Online

Luke 9 - Iban bible

Luke 9

¹Jesus lalu ngempuruka murid Iya ke dua belas, lalu meri sida kuasa muru[40] semua antu, enggau ngeraika penyakit,

²lalu ngasuh sida madahka berita pasal Perintah Allah Taala, sereta ngeraika orang ke sakit

³Ku Iya bejaku ngagai sida, “Anang mai utai lebuh kita bejalai: anang mai tungkat, tauka kambut, tauka pemakai, tauka duit. Baju kena besilih pen enda meh tau mai.

⁴Sebarang rumah alai kita tama, diau dia, datai ke kita mupuk ari endur nya.

⁵ Di sebarang endur orang enda nerima kita, tesai abus ari kaki kita nyadika saksi kena ngelaban sida lebuh kita angkat ari endur nya.”

⁶Sida murid mupuk, lalu bejalai nengah semua genturung pendiau, nusui Berita Manah, sereta ngeraika orang di semua endur.

⁷ Lebuh Herod[41] ninga pasal semua utai ti nyadi, iya beba runding, laban sekeda orang madahka John Pemaptisa udah angkat idup baru.

⁸Sekeda madahka Elijah udah pegari, lalu sekeda madahka siku ari bala nabi ke dulu kelia udah angkat idup baru.

⁹ Ku Herod, “John udah dipumpung aku pala; tang sapa orang tu ke didinga aku tu?” Lalu iya keran deka betemu enggau Jesus.

¹⁰Lebuh sida rasul pulai bejalai, sida lalu madah ngagai Jesus semua utai ti udah dikereja sida. Iya mai sida kediri enggau Iya ngagai sebuah nengeri ti dikumbai Betsaida.

¹¹ Lebuh orang mayuh ninga nya, sida lalu nitihka Iya. Iya lalu ngelaluka penatai sida lalu bejaku ngagai sida pasal Perintah Allah Taala, lalu ngeraika orang ke sakit.[42]

¹²Lebuh hari nyau udah lemai, murid ke dua belas datai ngagai Iya, lalu bejaku, “Asuh bala orang tu pulai, ngambika sida bejalai ngagai genturung pendiau enggau ngagai menua ti ngelingi tu, lalu ngiga pemakai enggau rumah alai bemalam, laban menua tu nadai mensia.”

¹³ Tang ku Jesus bejaku ngagai sida, “Kita meri sida utai diempa.” Disaut sida, “Kami semina bisi lima iti tuku roti, enggau dua iku ikan--enti kami enda mupuk lalu meli pemakai ke semua orang tu.”

¹⁴Laban orang lelaki ke bisi dia kira lima ribu iku. Iya lalu bejaku ngagai sida murid Iya, “Asuh sida duduk beraban-raban, kira lima puluh iku dalam siti-siti raban.”

¹⁵Sida murid lalu ngasuh semua orang dia duduk magang.

¹⁶ Jesus lalu ngambi lima iti tuku roti enggau dua iku ikan nya, engkadah ke langit, merekat lalu mechahka roti enggau ikan nya, lalu nyuaka utai nya ngagai sida murid ngambika sida nyadung ngagai orang mayuh.

¹⁷Semua sida bela makai magang lalu kenyang. Teda pemakai nya lalu digumpul, dua belas bakul penuh.

¹⁸ Nyadi sekali, lebuh Jesus benung besampi keDiri, lalu semina sida murid Iya aja bisi semak Iya, Iya nanya sida, “Sapa Aku tu ku orang?”

¹⁹ Ku sida nyaut, “Sekeda ngumbai Nuan John Pemaptisa. Sekeda ngumbai Nuan Elijah. Lalu sekeda ti bukai ngumbai Nuan siku ari sida nabi ke dulu kelia, ke udah angkat idup baru.”

²⁰ Iya lalu bejaku ngagai sida, “Tang sapa Aku tu ku kita?” Peter lalu nyaut, “Nuan tu Kristus[43] Allah Taala.”

²¹Iya lalu berat-rat enda nyagi sida madahka nya ngagai orang,

²² ku Iya, “Anak Mensia enda tau enda balat diperinsa, lalu ditulak sida tuai bansa, sida tuai imam, enggau sida pengajar Adat, lalu dibunuh, lalu ba hari ti ketiga diangkatka idup baru.”

²³ Lalu ku Iya bejaku ngagai semua sida, “Enti orang deka nitihka Aku, awakka iya badu agi berundingka diri empu, ngesan regang iya tiap hari, lalu nitihka Aku.

²⁴ Laban barang sapa deka ngidupka nyawa diri, deka ngelenyauka iya, lalu barang sapa deka ngelenyauka nyawa diri ketegal Aku, deka ngidupka iya.

²⁵Nama penguntung orang, enti iya bempu semua dunya, tang ngelenyauka nyawa diri?

²⁶ Orang ke malu ke Aku, sereta malu ke ajar Aku, Anak Mensia deka mega malu ke orang nya lebuh Iya datai dalam mulia Iya, enggau dalam mulia Apai Iya, enggau dalam mulia bala melikat Iya ti kudus.

²⁷ Tang enggau bendar Aku madah ngagai kita, sekeda orang ke bediri ditu apin mati sebedau sida meda Perintah Allah Taala.”

²⁸ Kira lapan hari udah bekau Iya nyebut nya, Iya mai Peter, John enggau James niki ngagai bukit sigi, deka besampi.

²⁹Lebuh Iya benung besampi, mua Iya berubah, lalu gari Iya bebali beperenching burak.

³⁰ Tekala nya dua iku orang bejaku enggau Iya. Seduai nya Moses enggau Elijah,

³¹ke pegari ngena mulia lalu bejakuka pasal pemati Iya, ti baru deka dikereja Iya di Jerusalem.

³² Nyadi Peter enggau pangan iya jenak amat tinduk, lalu lebuh sida dani, sida meda mulia Iya, sereta meda orang ke dua iku nya bediri enggau Iya.

³³ Lebuh orang ke dua iku nya ninggalka Jesus, Peter lalu bejaku enggau Jesus, “Pengajar, manah amat kitai diau ditu; awakka kami ngaga tiga buah langkau, sebuah ke Nuan, sebuah ke Moses, lalu sebuah ke Elijah.” (Peter enda nemu utai ti disebut diri.)

³⁴Lebuh Peter agi benung nyebut nya, siti remang datai lalu ngelindung sida, lalu sida murid takut dibalut remang nya.

³⁵ Nyawa lalu bejaku ari dalam remang nya, ku iya, “Tu Anak Aku ke dipilih Aku.[44] Pendingka Iya!”

³⁶ Lebuh nyawa nya udah badu bejaku, semina Jesus aja bisi dia. Sida murid lalu enda bemunyi, lalu nadai madah ngagai orang lebuh maya nya, pasal utai ti udah dipeda sida.

³⁷Hari siti, lebuh sida udah nurun ari bukit nya, mayuh amat orang betemu enggau Jesus.

³⁸Siku lelaki lalu ngangau ari bala mayuh, “Pengajar! Aku minta Nuan meda anak aku! Iya anak tunggal aku!

³⁹Lebuh roh ti jai nyerang iya, iya nyerauh. Roh nya lalu ngusak iya, datai ke nyawa iya nyau bepupu. Roh nya merinsaka iya, lalu enggai ninggalka iya!

⁴⁰Aku udah minta sida murid Nuan muru roh nya, tang sida enda ulih.”

⁴¹Jesus lalu nyaut, “Kita tu orang ke enda arap sereta jai! Ni pengelama Aku enda tau enda begulai enggau kita, lalu sabar enggau kita? Bai anak nuan kitu.”

⁴²Lebuh nembiak nya mansang ngagai Jesus, antu nya lalu ngempaska iya ke tanah, lalu ngusak iya. Tang Jesus ngerara roh ti jai nya, ngeraika nembiak nya, lalu meri iya ngagai apai iya.

⁴³ Semua orang balat alit ati ke pemesai kuasa Allah Taala. Lebuh semua orang mayuh agi alit ati ke semua utai ti udah dikereja Jesus, Iya lalu bejaku ngagai sida murid Iya,

⁴⁴“Kingatka jaku tu: Anak Mensia deka dijual[45] ngagai jari mensia.”

⁴⁵Tang sida murid enda nemu reti jaku Iya nya. Reti jaku Iya nya udah dilalaika ari sida, ngambika sida enda nemu reti utai nya. Lalu sida takut nanyaka reti jaku nya ngagai Iya.

⁴⁶ Sida murid betalatka enggau pangan diri pasal sapa ari bala sida ke pemadu besai.

⁴⁷Tang Jesus nemu peragam ati sida, lalu Iya ngambi siku anak mit, ngasuh iya bediri ngimbai Iya,

⁴⁸ lalu bejaku ngagai sida, “Barang sapa nerima anak mit tu dalam nama Aku, nerima Aku, lalu barang sapa nerima Aku, nerima Iya ke ngirumka Aku. Laban orang ke pemadu mit ba bala kita, nya meh orang ke pemadu besai.”

⁴⁹ John lalu nyaut, “Pengajar, kami bisi udah meda orang siku muru antu dalam nama Nuan, lalu kami nguji nagang iya, laban iya enda nitihka kitai.”[46]

⁵⁰Tang ku Jesus bejaku ngagai iya, “Anang nagang iya, laban orang ke enda ngelaban kita, setanah enggau kita.”

⁵¹ Lebuh Jesus nyau deka dibai niki ke serega, Iya mutuska runding deka mansang ngagai Jerusalem.

⁵² Iya lalu ngasuh bala seruan bejalai dulu ari Iya. Di rantau jalai sida tama ngagai sebuah genturung pendiau di menua Samaria, deka nyendiaka semua utai ke Iya.

⁵³Tang orang dia enggai nerima Iya, laban Iya endang semina deka mansang ngagai Jerusalem.

⁵⁴ Lebuh murid Iya, James seduai John meda nya, seduai iya lalu bejaku, “Tuhan, kati Nuan dekaka kami ngangauka api nurun ari langit lalu nganguska sida?” [47]

⁵⁵Tang Iya nguing lalu ngerara seduai iya. [48]

⁵⁶Sida lalu mansang ngagai siti agi genturung pendiau.

⁵⁷ Lebuh sida benung di rantau jalai, siku orang bejaku ngagai Jesus, “Aku deka nitihka Nuan, ngagai sebarang endur Nuan bejalai.”

⁵⁸Jesus lalu bejaku ngagai iya, “Munsang bisi lubang, lalu burung bisi tansang, tang Anak Mensia nadai endur alai ngalika Diri.”

⁵⁹Ku Iya bejaku ngagai siku ti bukai, “Titihka Aku.” Tang ku orang nya bejaku, “Tuan, awakka aku pulai dulu lalu nguburka apai aku.”

⁶⁰Tang ku Jesus bejaku ngagai iya, “Awakka orang ke mati, nguburka bala sida empu ke mati. Tang nuan empu enda tau enda bejalai lalu nusui pasal Perintah Allah Taala.”

⁶¹ Siku ti bukai bejaku, “Aku deka nitihka Nuan, Tuhan, tang awakka aku meri selamat tinggal ngagai kami sebilik dulu.”

⁶²Ku Jesus bejaku ngagai iya, “Orang ke belabuh ngeradu tanah lalu malik kebelakang, enda tau nyadi nembiak Perintah Allah Taala.”