Read Iban Ulang Adat 10 Bible Online

Ulang Adat 10 - Iban bible

Ulang Adat 10

¹“Udah nya TUHAN bejaku ngagai aku, ‘Tingkuh dua igi lampang batu baka ti keterubah, lalu gaga siti peti kayu alai nyimpan batu nya. Udah nya niki ke atas ngagai Aku ba bukit tu.

²Aku deka nulis ba lampang batu dua iti nya leka jaku ti udah ditulis ba lampang batu ti udah dipechahka nuan. Udah nya nuan enda tau enda nyimpan lampang batu nya dalam peti nya.’

³“Nya alai aku ngaga Peti nya ari kayu akasia, lalu ningkuh dua iti lampang batu baka ke keterubah, lalu mai lampang batu nya niki ngagai bukit nya.

⁴Udah nya TUHAN lalu nulis ba lampang batu nya leka jaku baka ke ditulis Iya ba lampang batu ti keterubah, iya nya Sepuluh Pesan ti diberi Iya ngagai kita, lebuh Iya bejaku ari dalam api lebuh kita begempuru ba bukit nya. TUHAN lalu meri lampang batu nya ngagai aku.

⁵Aku nguing lalu nurun ari bukit nya. Udah nya, nitihka pesan TUHAN, aku lalu nyimpan lampang batu nya dalam Peti ti udah digaga aku, lalu lampang batu nya mengkang dia datai ke sehari tu.” (

⁶ Orang Israel lalu angkat ari telaga orang Jakan, sereta mansang ngagai Moserah. Aron mati dia lalu dikuburka. Anak iya Eleasar lalu nganti iya nyadi imam.

⁷Ari nya sida mansang ngagai Gutgodah, lalu udah nya ngagai Jotbatah, alai ti mayuh ai.

⁸ Lebuh sida ba bukit nya [13] TUHAN milih orang ke lelaki ari raban bansa Lewi ngesan Peti Lampang Batu Adat nya, bekereja nyadi imam, enggau merekatka orang dalam nama TUHAN, nyentuk ngagai diatu.

⁹Nya alai raban bansa Lewi enda diberi pesaka tanah baka raban bansa orang Israel ti bukai, laban sida deka nerima semua utai ti disemaya TUHAN Allah Taala kita, ngagai sida.)

¹⁰ “Aku diau ba bukit nya empat puluh hari empat puluh malam, baka ke terubah. TUHAN mendingka aku baru, lalu besetuju enda nyadi munuh kita.

¹¹Udah nya Iya ngasuh aku mupuk, lalu nguluka kita, ngambika kita ulih ngerampas menua ti udah disemaya deka diberi Iya ngagai aki ini kita.

¹²“Nya alai diatu, kita orang Israel, nama utai ti dipinta TUHAN Allah Taala kita, ari kita? Semina nangika TUHAN Allah Taala kita, idup nitihka jalai Iya, rinduka Iya, nyembah Iya enggau pengabis ati, enggau pengabis semengat kita,

¹³lalu ngasika semua pesan enggau adat TUHAN, ti diberi aku ngagai kita sehari tu, ke penguntung kita.

¹⁴Taja pen langit enggau serega, enggau dunya sereta enggau semua utai ti di dunya, diempu TUHAN Allah Taala kita,

¹⁵tang TUHAN balat rinduka aki ini kita, datai ke Iya milih kita, ke peturun sida, ari semua bansa, baka ke sehari tu.

¹⁶Nya alai, ngasi meh kita ke TUHAN, [14] lalu badu agi kieh.

¹⁷ Laban TUHAN Allah Taala kita endang Allah Taala ari atas semua petara, TUHAN ari atas semua tuhan, Allah Taala ti bekuasa, ti kering ti diketakutka, ti enda bepilih mata, lalu enda makai suap,

¹⁸ ti meri atur ti lurus ngagai orang ke patu balu, ti rinduka orang kampar, lalu meri sida pemakai enggau gari.

¹⁹Nya alai kita mega enda tau enda rinduka orang kampar, laban kita empu udah nyadi orang kampar di menua Ejip.

²⁰Kita enda tau enda nangika TUHAN Allah Taala kita; sembah Iya siku aja. Seruran bepegai teguh ba Iya, lalu sebut sumpah kita atas nama Iya.

²¹Iya aja ti dipuji kita, laban semina Iya aja ti Allah Taala kita, ti udah ngereja utai ti besai sereta nyelai, baka ke udah dipeda kita.

²² Lebuh bala aki ini kita mansang ngagai menua Ejip, sida semina tujuh puluh iku aja. Tang diatu TUHAN Allah Taala kita udah ngasuh kita mayuh tubuh ngemayuh bintang ti di langit.