Read Iban Ulang Adat 11 Bible Online

Ulang Adat 11 - Iban bible

Ulang Adat 11

¹“Rinduka TUHAN Allah Taala kita, lalu seruran ngasika semua adat Iya.

²Kingatka sehari tu utai ti udah ditemu kita pasal TUHAN ari utai ti udah diasaika kita enggau Iya. Kita empu, ukai anak kita, ke ngasaika utai nya. Kita udah meda pemesai kuasa Iya, pengering Iya,

³ enggau kereja ajih Iya. Kita udah meda utai ti dikereja Iya ngagai raja di menua Ejip, enggau ngagai menua Ejip empu.

⁴ Kita udah meda chara TUHAN munaska semua bala soldadu orang Ejip, sama enggau kuda, kerita perang, lebuh Iya ngasuh sida lemas ba Tasik Mirah, lebuh sida begagaika kita.

⁵Kita nemu utai ti udah dikereja TUHAN ti kita di menua puang sebedau kita datai ditu.

⁶ Kita tentu ingatka utai ti udah dikereja Iya ngagai Datan seduai Abiram, anak Eliap ke ari peturun Reuben. Dipeda orang mayuh tanah merekah lalu nelan seduai iya, enggau sida sebilik, langkau kain sida, enggau semua kuli seduai iya, enggau jelu tupi sida.

⁷Kita nya meh orang ke meda semua utai ti besai ti udah dikereja TUHAN.

⁸“Titihka semua pesan ti dipadahka aku ngagai kita sehari tu. Nya baru kita ulih ngelayang sungai lalu nguan menua ti baru deka dipasuk kita.

⁹Lalu kita deka diau lama di menua ti kaya sereta ami ti udah disemaya deka diberi TUHAN ngagai aki ini enggau ngagai peturun sida.

¹⁰Menua ti baru deka dialahka kita nya enda baka menua Ejip, alai kita ke diau menya. Di menua Ejip, lebuh kita nanam benih, kita bebendar bekereja meri ai ngagai umai kita.

¹¹Tang menua ti deka dipasuk kita nya menua ti bebukit enggau mayuh lebak, menua ti seruran bisi ujan.

¹²TUHAN Allah Taala kita deka ngintu sereta ngemataka menua nya sepemanjai taun.

¹³ “Nya alai, titihka semua pesan ti diberi aku ngagai kita sehari tu. Rinduka TUHAN Allah Taala kita, lalu sembah Iya enggau pengabis ati kita, enggau pengabis semengat kita.

¹⁴Enti kita ngereja nya, Iya deka ngasuh hari ujan di menua kita, lebuh kita begunaka ujan lebuh musin ruruh daun enggau lebuh musin bungai, ngambika kita bisi gandum, wain enggau minyak kana.

¹⁵Iya deka meri kita rumput ke pemakai jelu tupi kita. Kita deka bisi semua pemakai ti dikedekaka kita.

¹⁶Anang nejuka diri dibai orang limpang ari TUHAN besembah sereta betuaika petara bukai.

¹⁷Enti kita ngereja, TUHAN deka ringat ngagai kita. Iya deka nagang hari ujan, lalu tanah kita deka nyadi kelalu rangkai, lalu utai ti ditanam kita enggai tumbuh. Ketegal nya kita jampat parai, taja pen menua ti diberi Iya ngagai nya ami.

¹⁸ “Kingatka pesan tu, lalu simpan sida dalam ati kita. Tuliska sida, lalu tanchangka sida ba lengan kita. Lekatka sida ba kening kita kena ngingatka sida.

¹⁹Ajar sida ngagai anak kita. Kenang sida tu lebuh kita di rumah, enggau lebuh kita bejalai kebukai, lebuh kita gali, enggau lebuh kita gawa.

²⁰Tuliska sida ba tiang pintu rumah kita, enggau ba pintu kuta kita.

²¹Nya baru kita enggau anak kita deka diau lama ba menua ti udah disemaya deka diberi TUHAN Allah Taala kita ngagai aki ini kita. Kita deka diau dia, seagi-agi langit map dunya.

²²“Titihka enggau ati ti tetap semua pesan ti udah dipadahka aku ngagai kita: Rinduka TUHAN Allah Taala kita, kereja semua utai ti diasuh Iya, lalu bepegai teguh ba Iya.

²³Nya baru Iya deka muru semua bansa ari mua kita, lalu kita deka ngalahka menua ti diempu bansa bukai ti besai agi sereta kering agi ari kita.

²⁴ Semua endur ti ditengah kita deka diempu kita. Rampa menua kita deka berengkah ari menua puang di selatan ngagai Bukit Lebanon di utara, enggau ari Sungai Eupratis di timur ngagai Tasik Tengah di barat.

²⁵Di sebarang endur alai kita bejalai di menua nya, TUHAN Allah Taala kita deka ngasuh orang takutka kita, munyi ti udah disemaya Iya, lalu nadai orang ulih nagang kita.

²⁶“Pilih sehari tu entara berekat enggau sumpah.

²⁷Kita deka diberekatka enti kita ngasika pesan TUHAN Allah Taala kita ke dipadahka aku ngagai kita sehari tu.

²⁸Tang kita deka kena sumpah, enti kita enda ngasika pesan TUHAN Allah Taala kita, lalu limpang ari jalai TUHAN, lalu nyembah petara bukai ti enda kala disembah kita.

²⁹ Lebuh TUHAN mai kita ngagai menua ti deka dialahka kita, kita enda tau enda nyada madahka berekat ari Bukit Gerisim, enggau madahka sumpah ari Bukit Ebal. (

³⁰Bukit dua igi tu ba tebing barat Sungai Jordan, di menua orang Kanaan ti diau ba Lebak Jordan. Bukit dua igi tu tunga ke barat, enda jauh ari kayu keramat di Moreh, semak nengeri Gilgal.)

³¹Kita baru deka meraka Sungai Jordan, lalu ngalahka menua ti diberi TUHAN Allah Taala kita ngagai kita. Lebuh kita ngerampas menua nya, lalu ngentapka diri dia,

³²kita enda tau enda ngasika semua adat ti diberi aku ngagai kita sehari tu.