Read Iban Ulang Adat 12 Bible Online

Ulang Adat 12 - Iban bible

Ulang Adat 12

¹“Tu adat ti enda tau enda dititihka kita seagi-agi kita idup di menua ti diberi TUHAN Allah Taala aki ini kita, ngagai kita. Titihka semua adat nya!

²Rusak semua endur alai orang bansa bukai nyembah petara sida ba sebelah bukit ti tinggi, ba munggu, enggau di baruh kayu, dalam menua ti deka dirampas kita.

³ Runtuhka alta sida, lalu redakka tiang batu keramat sida. Tunu anak patung petara Aserah, lalu tebang engkeramba sida, ngambika sida nadai agi disembah ba endur nya.

⁴“Anang nyembah TUHAN Allah Taala kita ngena chara nya.

⁵TUHAN deka milih siti endur ari semua menua ti diempu raban bansa kita, alai orang deka datai lalu nyembah Iya.

⁶Nya meh endur alai kita deka ngenjuk piring tunu, enggau piring ti bukai, pemeri sepuluh peratus, enggau pemeri kita, pemeri ti disemaya deka diberi kita ngagai TUHAN, piring ti diberi nitihka peneka ati diri, enggau anak tuai jelu sapi enggau jelu bedus kita.

⁷Dia meh kita, enggau kita sebilik deka makai, di mua TUHAN Allah Taala kita, lalu ensepi penyamai semua utai ti manah ti udah diberekatka TUHAN ngagai kita.

⁸Kita enda tau ngereja utai baka ke dikereja kita diatu, nitihka peneka ati diri,

⁹laban kita apin datai di menua ti diberi TUHAN Allah Taala kita ngagai kita, alai kita ke deka diau likun.

¹⁰Lebuh kita meraka Sungai Jordan, lalu diau di menua ti diberi TUHAN Allah Taala kita ngagai kita, lalu lebuh Iya meri kita pemaik ari semua munsuh ti ngelingi kita, ngambika kita diau likun,

¹¹nya baru kita deka mai semua utai ti diasuh aku bai kita ngagai endur ti deka dipilih TUHAN nyadi endur alai Iya deka diau. Utai ti deka dibai kita nya: piring tunu enggau piring ti bukai, pemeri sepuluh peratus kita, enggau pemeri kita, enggau pemeri ti udah disemaya kita enggau TUHAN.

¹²Kita, enggau anak kita, orang gaji kita enggau orang Lewi (ti nadai pesaka tanah) ti diau dalam nengeri kita di menua nya, deka gaga ati magang di mua TUHAN.

¹³Kita enda tau ngenjuk piring kita ba sebarang endur ti dipilih kita.

¹⁴Kita semina ngenjuk piring nya ba siti endur ti deka dipilih TUHAN, dalam menua ti diempu siti ari raban bansa kita. Semina dia aja kita tau ngenjuk piring tunu, lalu ngereja semua utai ti dipadahka aku ngagai kita.

¹⁵“Tang kita tau nyayat lalu makai jelu kita ba endur alai kita diau. Kita tau makai sepemayuh ti diberi TUHAN ngagai kita. Semua kita, nemuka kita nya tuchi tauka enda, tau makai jelu nya, baka ke makai dagin rusa tauka dagin kijang.

¹⁶ Tang kita enda tau makai darah jelu nya. Kita enda tau enda nuang darah nya ngagai tanah baka ke nuang ai.

¹⁷Nadai utai ti diberi kita ngagai TUHAN tau diempa kita ba endur alai kita diau, nemuka utai nya pemeri sepuluh peratus ari gandum kita, ari wain kita, tauka ari minyak kana kita, tauka anak tuai jelu sapi enggau jelu bedus kita, enggau pemeri ti disemaya kita enggau TUHAN, piring ti diberi kita nitihka peneka ati diri, tauka piring ti bukai.

¹⁸Kita enggau anak kita, enggau orang gaji kita, sereta enggau orang Lewi ti diau di nengeri kita, enda tau enda makai piring nya semina di mua TUHAN Allah Taala kita, ba siti endur alai besembiang ti dipilih TUHAN Allah Taala kita. Kita enda tau enda gaga ati dia, di mua TUHAN Allah Taala kita, ke semua utai ti udah dikereja kita.

¹⁹Anang enda nemu ibuhka orang Lewi seagi-agi kita idup di menua kita.

²⁰“Lebuh TUHAN Allah Taala kita ngerembaika rampa menua kita, munyi ti udah disemaya Iya, kita tau makai dagin di sebarang endur kita deka.

²¹Enti endur alai besembiang nya kelalu jauh, kita tau, ba sebarang maya kita deka, nyayat jelu sapi tauka bedus ti udah diberi TUHAN ngagai kita, lalu kita tau makai dagin jelu nya di rumah kita empu, munyi ti udah dipadahka aku ngagai kita.

²²Genap iku orang, nemuka iya nya tuchi tauka enda tuchi, tau makai dagin nya, baka ke makai dagin rusa tauka dagin kijang.

²³ Tang kita enda tau makai dagin ti agi bedarah, laban darah ngundan seput, lalu kita enda tau makai seput sama enggau dagin.

²⁴Anang makai darah, tang tuang darah nya ngagai tanah baka ke nuang ai.

²⁵Enti kita ngasika pesan tu, TUHAN deka gaga ati ke kita, lalu kita, enggau peturun kita deka mujur diau.

²⁶Bai pemeri ti kudus ti udah disemaya kita enggau TUHAN, ngagai siti aja endur alai nyembah TUHAN.

²⁷Beri ba endur nya piring ti deka ditunu ba alta TUHAN. Beri mega piring ti bukai ti diempa kita dagin, lalu tuang darah ba alta.

²⁸Enggau ati ti tetap, titihka semua utai ti udah dipadahka aku ngagai kita. Nya baru kita enggau peturun kita deka lantang senang belama iya, laban kita ngereja utai ti ngena, ti ngerinduka ati TUHAN Allah Taala kita.

²⁹“TUHAN Allah Taala kita deka ngerusak orang bansa bukai lebuh kita nyerang menua sida, lalu kita deka nguan menua nya, lalu ngentapka diri dia.

³⁰Lebuh TUHAN udah ngerusak bansa orang nya, kita enda tau enda nentuka diri enda nitihka atur pengarap sida, laban nya deka munuh kita. Anang betanyaka chara sida nyembah petara sida, enggai ke kita nyembah TUHAN ngena chara nya.

³¹Anang nyembah TUHAN Allah Taala kita ngena chara sida nyembah petara sida, laban lebuh sida nyembah petara sida, sida ngereja semua utai ti jai, ti dipegedika TUHAN. Indah anak sida empu deh diserahka sida nyadika piring ba api ti ba alta sida.

³² “Kereja semua utai ti udah dipadahka aku ngagai kita. Anang nambahka tauka muai utai ari jaku nya.