Read Iban Ulang Adat 13 Bible Online

Ulang Adat 13 - Iban bible

Ulang Adat 13

¹“Enti nabi tauka orang ke nemu nerangka mimpi bisi ba bala kita, lalu besemaya deka ngereja kereja ajih tauka kereja ti nyelai,

²lalu kereja ajih tauka kereja ti nyelai nya bisi nyadi, lalu sida nyebut ngagai kita, “Aram kitai nitihka petara bukai,” (petara ti enda ditemu kita), “lalu nyembah sida,”

³anang bedulika jaku sida nabi nya, tauka jaku orang ke nemu nerangka mimpi; laban TUHAN Allah Taala kita deka ngabas ati kita, deka nemu enti kita amat rinduka TUHAN Allah Taala kita enggau pengabis ati, enggau pengabis semengat kita.

⁴Titihka TUHAN, lalu kemesaika Iya. Kita enda tau enda ngasika Iya, sereta nitihka pesan Iya. Sembah Iya, lalu seruran tetap ati ngagai Iya.

⁵Tang bunuh sida nabi nya, tauka orang ke nerangka mimpi, laban sida udah bejaku busung ngelaban TUHAN Allah Taala kita ke udah mai kita pansut ari menua Ejip, lalu udah nebus kita ari pengidup kita ke nyadi ulun. Orang nya jai, lalu sida nguji mai kita limpang ari jalai pengidup ti udah diasuh TUHAN titihka kita. Sida nya enda tau enda dibunuh, ngambika penyai nya dibuai ari bala kita.

⁶“Indah menyadi kita, tauka anak lelaki tauka anak indu, tauka bini ke dikesayauka kita, tauka pangan kita deh deka nguji, ngena chara belalai, meransang kita nyembah petara bukai ti enda kala disembah kita tauka disembah aki ini kita.

⁷Sekeda sida nyangka deka meransang kita nyembah petara orang ke diau semak kita, tauka petara orang ke diau jauh ari kita.

⁸Tang anang nejuka sida mujuk kita. Mendingka sida pen kita enda tau. Anang kasihka sida, tauka sinu ati ke sida, lalu anang nyaga sida.

⁹Bunuh sida! Kita patut dulu agi ari orang bukai nuku sida ngena batu. Udah nya baru kita tau nejuka orang bukai nuku sida ngena batu.

¹⁰Tuku sida ngena batu datai ke sida mati! Sida udah nguji mai kita limpang ari TUHAN Allah Taala kita ke udah mai kita pansut ari menua Ejip, alai kita ke udah nyadi ulun.

¹¹Nya baru semua orang Israel deka ninga berita pasal utai ti nyadi. Sida deka takut, lalu nadai agi orang berani ngereja utai ti ngenyai nya.

¹²“Lebuh kita diau di nengeri ti diberi TUHAN Allah Taala kita ngagai kita, kita nyangka bisi ninga

¹³pasal sekeda orang ke nadai guna ari bansa kita empu ti udah mai orang dalam nengeri sida limpang lalu nyembah petara ti nadai kala disembah kita.

¹⁴Enti kita bisi ninga berita ti baka nya, pansik berita nya enggau silik, lalu enti utai ti jai nya amat udah nyadi,

¹⁵bunuh semua orang dalam nengeri nya, enggau semua jelu tupi sida. Rusak abis nengeri nya.

¹⁶Gempuruka semua reta tengkira orang ke diau dalam nengeri nya, lalu tugungka utai nya ba padang nengeri nya. Udah nya tunu nengeri nya, sama enggau utai ti dalam nengeri nya nyadika piring ti diserahka ngagai TUHAN Allah Taala kita. Nengeri nya enda tau enda ditejuka rusak belama iya, lalu enda tau digaga baru.

¹⁷Anang nyimpan ke diri empu utai ti udah diletak deka dirusak. Nya baru TUHAN deka badu agi ringat, tang deka ngayanka pengasih Iya ngagai kita. Iya deka kasihka kita, lalu ngaga kita nyadi bansa ti besai, munyi ti udah disemaya Iya ngagai aki ini kita,

¹⁸enti kita deka ngasika semua pesan Iya ti udah diberi aku ngagai kita sehari tu, lalu ngereja utai ti dikedekaka Iya.