Read Iban Ulang Adat 15 Bible Online

Ulang Adat 15 - Iban bible

Ulang Adat 15

¹“Ba genap ujung taun ti ketujuh, kita enda tau enda muai semua utang orang ke berutang ba kita.

²Baka tu ku chara kita ngereja nya: genap iku kita ke udah nyali duit ngagai orang Israel, enda tau enda muai utang nya. Kita enda tau minta duit nya ari sida, laban TUHAN Empu udah madahka utang nya dibuai.

³Kita tau minta orang bansa bukai mayar utang diri, tang kita enda tau minta bayar utang ari bansa kita empu.

⁴“TUHAN Allah Taala kita deka merekatka kita di menua ti diberi Iya ngagai kita. Nadai siku kita deka seranta

⁵enti kita ngasika TUHAN Allah Taala kita, lalu bejimat ngereja semua pesan ti diberi aku ngagai kita sehari tu.

⁶Lebuh TUHAN Allah Taala kita merekatka kita, munyi ti udah disemaya Iya, kita deka nyali duit ngagai mayuh bengkah bansa, tang kita enda nginjau duit ari orang. Kita deka merintah mayuh bengkah bansa, tang sida enda merintah kita.

⁷ “Enti orang Israel bisi suntuk dalam nengeri ti diberi TUHAN Allah Taala kita ngagai kita, anang rangka lalu enggai nyaup sida.

⁸Kita patut, enggau ati ti gerah mudah, nyali sida sebarang utai ti dipeguna sida.

⁹Anang rangka, lalu berunding, “Taun ti ketujuh alai muai utang, nyau semak,” lalu kita jai enggau pangan diri, lalu enggai meri iya utai, lalu pangan nuan nya ngangauka TUHAN ngelaban kita, lalu kita deka dikumbai salah.

¹⁰Beri enggau ati ti gerah mudah lebuh kita meri utai ngagai sida, lalu TUHAN deka merekatka kita dalam semua pengawa kita enggau dalam semua utai ti dikereja kita.

¹¹ Laban orang ke suntuk endang seruran bisi di dunya tu, nya alai aku meri pesan tu ngagai kita, “Beri enggau ati ti gerah mudah ngagai pangan diri ke suntuk di menua kita.”

¹² “Enti orang Israel, nemuka lelaki tauka indu, nyual diri [16] ngagai kita nyadi ulun, kita enda tau enda ngelepaska sida lebuh sida udah bekereja ke kita enam taun. Masuk taun ti ketujuh, kita enda tau enda ngelepaska sida.

¹³Lebuh kita ngelepaska sida, anang ngasuh sida pulai puang.

¹⁴Beri sida utai ti udah diberekatka TUHAN ngagai kita: jelu bedus, gandum enggau wain.

¹⁵Kingatka diri ti udah nyadi ulun di menua Ejip, lalu TUHAN Allah Taala kita udah ngelepaska kita. Nya kebuah aku ngasuh kita ngereja nya.

¹⁶“Tang ulun kita nyangka enggai ninggalka kita. Nyangka iya rinduka kita enggau ke kita sebilik, lalu keran deka diau enggau kita.

¹⁷Enti pia, bai iya ngagai pintu rumah kita, lalu achuk rambing pending iya dia. Nya baru iya nyadi ulun kita seumur idup. Kereja baka nya mega ngagai ulun kita ti indu.

¹⁸Anang pedis ati ketegal kita ngelepaska ulun kita. Sida udah bekereja ke kita enam taun, ngena setengah gaji. [17] Lepaska sida, nya baru TUHAN Allah Taala kita deka merekatka kita dalam semua utai ti dikereja kita.

¹⁹ “Serahka ngagai TUHAN Allah Taala kita semua anak tuai ti lelaki ari jelu sapi enggau jelu bedus kita. Anang ngena jelu nya ngereja pengawa, lalu anang ngukur bedus nya.

²⁰Kita, enggau kita sebilik, enda tau enda makai jelu nya di mua TUHAN genap taun, ba endur ti deka dipilih TUHAN Allah Taala kita.

²¹Tang enti jelu nya enda tentu menyana, enti sida nya kait-kupit, tauka buta, tauka bisi penimpang bukai, kita enda tau ngaga sida nyadika piring ti diberi ngagai TUHAN Allah Taala kita.

²²Kita tau makai jelu nya di rumah kita empu. Semua kita, nemuka kita nya tuchi tauka enda tuchi, tau makai jelu nya, baka ke makai dagin rusa tauka dagin kijang.

²³ Tang anang makai darah sida. Tuang darah sida ngagai tanah baka ke nuang ai.