Read Iban Ulang Adat 16 Bible Online

Ulang Adat 16 - Iban bible

Ulang Adat 16

¹ “Kemesaika TUHAN Allah Taala kita ngena Gawai Paska dalam bulan Abip, laban Iya udah mai kita pansut ari menua Ejip lebuh malam hari dalam bulan nya.

²Mansang kita ngagai siti endur alai nyembah TUHAN, lalu sayat dia siku jelu bedus kita, tauka jelu sapi kita, ke Gawai Paska, kena ngemesaika TUHAN Allah Taala kita.

³Lebuh kita makai pemakai nya, anang makai roti ti beragi. Tujuh hari kita deka makai roti ti enda beragi, baka ke dikereja kita lebuh kita beguai-guai angkat ari menua Ejip. Empa roti nya. Roti nya deka dikumbai roti pemerinsa, ngambika, seagi-agi kita meruan idup, kita deka ingatka hari kita pansut ari menua Ejip, alai kita ke udah kena perinsa.

⁴Dalam kandang tujuh hari, nadai orang di menua kita tau nyimpan ragi dalam rumah sida. Lalu jelu ti disayat ba lemai ti keterubah, enda tau enda abis diempa kita malam nya.

⁵“Sayat jelu ke Gawai Paska nya ba siti endur alai kita besembah, ukai ba endur bukai di menua ti deka diberi TUHAN Allah Taala kita ngagai kita. Kereja pengawa nya lebuh padam mata panas, laban nya jam kita angkat ari menua Ejip.

⁷Panduk dagin nya, lalu empa iya ba siti endur alai kita besembiang. Pagi hari siti baru kita pulai ngagai rumah kita empu.

⁸Dalam enam hari lepas nya kita deka makai roti ti enda beragi. Ba hari ti ketujuh kita enda tau enda besembiang bebala mayuh nyembah TUHAN Allah Taala kita, lalu enda gawa sehari nya.

⁹ “Itung tujuh minggu ari maya kita belabuh ngetau gandum kita,

¹⁰lalu udah nya intu Gawai Ngetau kena ngemesaika TUHAN Allah Taala kita, lebuh kita mai ngagai Iya piring ti diberi nitihka peneka ati diri setipak enggau berekat ti udah diberi Iya ngagai kita.

¹¹Kita, anak kita, orang gaji kita, enggau orang Lewi, orang kampar, orang ke patu balu ti diau dalam nengeri kita, enda tau enda gaga ati ngintu Gawai nya di mua TUHAN. Kereja nya ba siti endur alai kita besembiang.

¹²Kita enda tau enda ngasika pesan tu. Anang enda ingatka diri ti udah nyadi ulun di menua Ejip.

¹³ “Lebuh kita udah tembu ngindik semua gandum kita, lalu udah tembu mitan semua buah anggur kita, kita enda tau enda ngintu Gawai Belangkau tujuh hari.

¹⁴Kita, anak kita, orang gaji kita, enggau orang Lewi, orang kampar, orang ke patu balu ti diau dalam nengeri kita, enda tau enda semua gaga ati ngerami Gawai nya.

¹⁵Intu Gawai nya tujuh hari ba siti endur alai besembiang kena kita ngemesaika TUHAN Allah Taala kita. Kita enda tau enda gaga ati, laban TUHAN udah merekatka utai ti diketau kita, sereta merekatka pengawa kita.

¹⁶“Semua lelaki dalam bansa kita enda tau enda datai nyembah TUHAN tiga kali setaun ba siti endur ti deka dipilih TUHAN, iya nya, lebuh Gawai Paska, Gawai Ngetau, enggau Gawai Belangkau. Genap iku sida enda tau enda meri pemeri

¹⁷naka ti ulih diberi sida, nitihka pemayuh berekat ti udah diberi TUHAN ngagai sida siku-siku.

¹⁸“Pilih orang nyadi hakim, enggau nyadi pemesai bukai, dalam semua nengeri ti diberi TUHAN Allah Taala kita ngagai kita. Orang tu enda tau enda ngatur pechara enggau enda bepilih mata.

¹⁹ Sida enda tau meri atur ti enda lurus, lalu enda tau bepilih mata. Sida enda tau makai suap, laban makai suap ngasuh orang ke bepenemu-dalam enda meda utai ti betul, lalu ngasuh sida meri atur ti salah.

²⁰Kita enda tau enda seruran meri atur ti lurus, ngambika kita ulih ngalahka lalu diau dalam menua ti diberi TUHAN Allah Taala kita ngagai kita.

²¹ “Lebuh kita ngaga alta ke TUHAN Allah Taala kita, anang nirika alta nya ngimbai tiang petara indu Aserah.

²² Lalu anang mega nirika tiang ti dipegedika TUHAN.