Read Iban Ulang Adat 17 Bible Online

Ulang Adat 17 - Iban bible

Ulang Adat 17

¹“Anang meri jelu sapi tauka jelu bedus ti bisi penimpang nyadika piring ngagai TUHAN Allah Taala kita. TUHAN begedika utai nya.

²“Enti sema kita bisi ninga dalam nengeri kita, pasal lelaki tauka indu ke udah bedosa ngelaban TUHAN, lalu ngelanggar sempekat Iya

³ ketegal sida nyembah lalu betuaika petara bukai, nemuka nya mata hari, tauka bulan, tauka bintang, lalu ngelanggar pesan TUHAN,

⁴lalu enti kita bisi ninga berita nya, kita enda tau enda mansik utai nya enggau silik, lebuh orang madahka utai nya ngagai kita. Enti utai ti jai nya amat udah nyadi dalam menua Israel,

⁵bai orang nya pansut ke luar ari nengeri nya, lalu tuku sida ngena batu datai ke sida mati.

⁶ Tang sida semina tau dibunuh beduduk ba jaku saksi dua tauka mayuh agi orang. Sida enda tau dibunuh beduduk ba saksi siku orang aja.

⁷ Orang ke nyadika saksi enda tau enda dulu nukuka batu. Udah nya baru semua orang bukai tau nuku sida ngena batu. Nya meh jalai kita muai orang ke jai nya ari bala kita.

⁸“Kadang-kadang pekara bisi kelalu mar diputarka bala hakim ke di nengeri nya, baka pekara pasal hak bempu pesaka, tauka pasal orang ke bakal, tauka pasal pekara munuh tauka tebunuhka orang. Ba pekara ti baka nya, kita enda tau enda mansang ngagai endur alai kita ke nyembah TUHAN ti udah dipilih TUHAN Allah Taala kita,

⁹lalu mantaika pekara nya ngagai bala imam Lewi, enggau hakim ke bekereja lebuh maya nya, lalu awakka sida meri pemutus penemu ba pasal pekara nya.

¹⁰Sida deka meri pemutus penemu sida, lalu kita enda tau enda ngereja utai nitihka atur sida.

¹¹Sambut meh pemutus penemu sida, lalu titihka atur sida enggau silik.

¹²Barang sapa berani ngelaban atur hakim tauka imam ke bekereja sehari nya, deka dibunuh. Nya meh jalai kita muai orang ke jai nya ari bansa orang Israel.

¹³Nya baru semua orang deka ninga pasal pekara nya, lalu takut. Nya baru orang nadai agi berani ngereja utai ti baka nya.

¹⁴ “Lebuh kita udah ngerampas menua ti diberi TUHAN Allah Taala kita ngagai kita, lalu udah ngentapka diri di menua nya, kita deka berunding begunaka raja baka bansa bukai ti ngelingi kita.

¹⁵Kita enda tau enda nentuka orang ke dipilih kita nyadi raja nya orang ke udah dipilih TUHAN. Iya enda tau enda datai ari bansa kita empu. Anang ngasuh orang kampar nyadika raja kita.

¹⁶ Raja nya enda tau ngembuan mayuh kuda ke bala soldadu iya empu, tauka ngasuh orang nikal ngagai menua Ejip bebelika kuda, [18] laban TUHAN udah bejaku enda nyagi bala nembiak Iya nikal ngagai menua nya.

¹⁷ Raja nya enda tau mayuh bini, laban nya deka ngasuh iya ninggalka TUHAN; lalu iya enda tau ngaga diri kaya besimpanka pirak enggau emas.

¹⁸Lebuh iya nyadi raja, iya enda tau enda bisi siti Bup Adat dituliska iya di mua bala imam Lewi.

¹⁹Iya enda tau enda nyimpan bup nya semak iya empu, lalu macha bup nya seumur idup, ngambika iya nemu belajar nangika TUHAN, lalu tetap ati ngasika semua utai ti ditulis dalam bup nya.

²⁰Tu deka nagang iya berunding ngumbai diri manah agi ari orang Israel ti bukai, sereta nagang iya ngelanggar pesan TUHAN dalam semua utai. Nya baru iya enggau peturun iya deka lama megai perintah di menua Israel.