Read Iban Ulang Adat 19 Bible Online

Ulang Adat 19 - Iban bible

Ulang Adat 19

¹ “Lebuh TUHAN Allah Taala kita udah ngerusak orang ke bempu menua ti diberi Iya ngagai kita, lalu kita udah ngerampas nengeri enggau rumah sida lalu udah ngentapka diri dia,

²kita enda tau enda ngeletak tiga buah nengeri alai ngerarika diri di menua ti diberi TUHAN Allah Taala kita ngagai kita.

³Sukat penyauh nengeri nya, lalu bagi menua ti diberi TUHAN Allah Taala kita nyadika pesaka kita, ngagai tiga bagi, ngambika orang ke tekelanjur tebunuhka orang tau rari ngagai sebuah ari nengeri nya.

⁴Tu pasal orang ke tekelanjur tebunuhka orang, lalu ngerarika diri ngagai nengeri nya, deka ngidupka nyawa diri, iya nya pasal orang ke tekelanjur tebunuhka orang ke ukai munsuh iya:

⁵Ambika banding, enti dua iku orang ari bala kita bejalai ke babas deka ngambi kayu, lalu lebuh siku ari seduai nya nebang kayu, pala kapak iya ngelechut ari baur iya, lalu kena pangan iya, lalu pangan iya nya mati, iya ke tebunuhka pangan iya tau ngerarika diri ngagai sebuah ari nengeri nya, ngidupka nyawa diri.

⁶Tang enti nengeri nya semina sebuah aja, nyangka nengeri nya kelalu jauh, lalu kaban belayan ti deka bebalaska pemati nya ulih tepegaika orang nya lalu, enggau ati ti balat ringat, munuh iya taja pen iya nadai penyalah. Laban iya ti bendar, iya ukai sengaja munuh pangan iya.

⁷Nya kebuah aku ngasuh kita ngeletak tiga buah nengeri.

⁸“Enti TUHAN Allah Taala kita ngerembaika rampa menua kita, munyi ti dipadahka Iya ngagai aki ini kita ngena sumpah, lalu Iya meri ngagai kita semua menua ti udah disemaya deka diberi Iya ngagai kita,

⁹lalu kita ngasika semua pesan ti diberi aku ngagai kita sehari tu, iya nya rinduka TUHAN Allah Taala kita, sereta nitihka jalai Iya, nya baru kita tau nambahka tiga buah agi nengeri ngagai nengeri ti tiga buah nya,

¹⁰ngambika orang ke nadai penyalah nya enda mati dalam menua ti diberi TUHAN Allah Taala kita nyadika pesaka kita, lalu ninggang kita enggau penyalah munuh orang.

¹¹“Tang enti sema kita endang sengaja munuh munsuh kita, lalu udah nya kita ngerarika diri ngagai nengeri nya, deka ngidupka nyawa diri,

¹²bala tuai nengeri kita empu deka mesanka kita, lalu nyerahka kita ngagai kaban belayan ke ngiga balas ke pemati nya, ngambika kita dibunuh.

¹³Nadai orang deka kasihka kita. Menua Israel enda tau enda muai semua orang ke munuh orang, ngambika kita diau lantang senang.

¹⁴ “Anang mindahka pak kelai entara enggau tanah orang, ti lama udah diletak ba menua ti diberi TUHAN Allah Taala kita ngagai kita.

¹⁵ “Saksi ari siku orang aja enda umbas kena nyalah orang. Abis kurang iya, dua iku saksi diguna, kena netapka orang nya salah.

¹⁶Enti orang nguji ngemediska pangan diri ngena jaku petenah,

¹⁷seduai iya enda tau enda sama mansang ngagai endur alai kita ke nyembah TUHAN, lalu diakim bala imam enggau bala hakim ke bekereja sehari nya.

¹⁸Bala hakim deka mansik pekara nya enggau silik, lalu enti orang nya amat udah betenah,

¹⁹iya deka diukum ngena ukum ti diletak ninggang pangan iya, enti sema pangan iya amat salah. Nya meh jalai bansa kita deka muai penyai nya.

²⁰Udah nya baru semua orang bukai deka ninga pasal pekara nya lalu takut, lalu nadai agi orang berani ngereja utai ti jai baka nya ba bala kita.

²¹ Anang kasihka orang nya: nyawa balas nyawa, mata balas mata, ngeli balas ngeli, jari balas jari, kaki balas kaki.