Read Iban Ulang Adat 2 Bible Online

Ulang Adat 2 - Iban bible

Ulang Adat 2

¹ “Udah nya kitai lalu nguingka pejalai kitai ngagai menua puang tunga ngagai Tasik Mirah, nitihka pesan TUHAN ngagai aku, lalu kitai lama segau-segau ba sebelah menua ti bebukit di Edom.

²“Udah nya TUHAN lalu bejaku ngagai aku,

³‘Kita lama udah segau-segau ba sebelah menua ti bebukit tu; bejalai tunga ke utara,

⁴ lalu beri atur tu ngagai orang Israel munyi tu: Kita baru deka bejalai nengah menua ti diuan kaban belayan kita empu, iya nya bala peturun Esau. Sida deka takutka kita, nya alai bejimat kita;

⁵anang beperang ngelaban sida, laban Aku enggai meri menua sida ngagai kita, ngemesai tapa kaki pen tanah sida enggai meh Aku meri ngagai kita, laban Aku udah meri menua Edom ngagai Esau nyadika pesaka iya.

⁶Kita enda tau enda meli pemakai ari sida, ngambika kita bisi utai diempa; lalu kita enda tau enda meli ai ari sida, ngambika kita bisi ai irup.

⁷Laban TUHAN Allah Taala kita udah merekatka kita dalam semua utai ti dikereja kita. Iya udah ngintu kita lebuh kita segau-segau bejalai nengah menua puang ti besai rampa. Iya udah begulai enggau kita empat puluh taun, lalu kita nadai suntuk utai.’

⁸“Nya alai kitai lalu majakka pejalai kitai lalu limpang ari jalai raya ti pansut ari nengeri Elat enggau ari nengeri Esion-geber ti nuju ngagai Tasik Mati. Kitai lalu nguing tunga ke utara nuju ngagai menua Moap.

⁹ Ku TUHAN bejaku ngagai aku, ‘Anang ngachau orang Moap, tauka ngepunka perang ngelaban sida, laban sida peturun Lot. Aku udah meri nengeri Ar ngagai sida, lalu Aku enggai meri menua sida ngagai kita.’ ” (

¹⁰Dulu menya bansa orang ke besai gamal, ke dikumbai Emim bisi udah diau di Ar. Sida nya ngeninggi orang Anakim, orang ke besai gamal.

¹¹Baka orang Anakim, sida nya mega dikumbai bansa Repaim, tang orang Moap ngumbai sida orang Emim.

¹²Orang bansa Hori udah kala diau di Edom, tang bala peturun Esau muru sida ari menua nya, ngerusak bansa sida, lalu ngentapka diri di menua nya, baka chara orang Israel ti deka muru munsuh sida ari menua ti diberi TUHAN ngagai sida.)

¹³“Udah nya kitai lalu meraka Sungai Seret, nitihka pesan TUHAN.

¹⁴ Utai tu nyadi tiga puluh lapan taun udah bekau kitai ninggalka Kades-bernea. Semua bala orang ke tau kayau ari rebak nya, udah mati magang, munyi ti ku TUHAN.

¹⁵TUHAN majak ngelaban sida, datai ke Iya udah munuh semua sida.

¹⁶“Lebuh semua sida udah mati magang,

¹⁷TUHAN lalu bejaku enggau kitai,

¹⁸‘Sehari tu kita deka meraka garis entara menua Moap, ba Ar.

¹⁹ Lalu kita deka datai semak ngagai menua orang Amon, ti peturun Lot. Anang ngachau sida, tauka ngepunka perang ngelaban sida, laban Aku enggai meri kita menua ti udah diberi Aku ngagai sida.’ ” (

²⁰Menua tu mega dikumbai menua orang Repaim, iya nya nama bansa orang ke diau di menua nya. Orang Amon ngumbai sida Samsumim.

²¹Orang tu tinggi gamal baka orang Anakim. Bala sida mayuh, lalu bansa sida kering. Tang TUHAN ngerusak sida, ngambika orang Amon bempu menua sida, lalu ngentapka diri dia.

²²TUHAN udah mega ngereja baka nya ke orang Edom, ti peturun Esau, ti diau di menua ti bebukit di Edom, lebuh Iya ngerusak orang Hori, ngambika orang Edom ngerampas menua sida, lalu ngentapka diri di menua nya, alai sida ke diau diatu.

²³Menua ti ngimbai tebing Tasik Tengah, udah diuan orang ke datai ari pulau Krit. Sida udah ngalahka orang Abim, orang ke asal diau di menua nya, lalu udah ngerampas semua menua sida nyentuk ngagai nengeri Gasa di selatan.)

²⁴“Udah bekau kitai ke bejalai meraka menua Moap, TUHAN bejaku ngagai kitai, ‘Mupuk kita diatu, lalu peraka Sungai Arnon. Aku nyerahka Sihon, raja orang Amor ke merintah di Hesbon, ngagai jari kita, sama enggau menua sida. Serang iya, lalu belabuh ngalahka menua iya.

²⁵Berengkah ari sehari tu, Aku deka ngasuh semua orang di semua menua, takutka kita. Semua orang deka getar-getar takut ninga nama kita disebut.’

²⁶“Aku lalu ngasuh bala seruan bejalai ari menua puang Kedemot betemu enggau Raja Sihon ke merintah di Hesbon, deka mai iya bebaik. Ku aku:

²⁷‘Awakka kami bejalai nengah menua kita. Kami deka bejalai meraka terus, lalu enda limpang ari jalai raya.

²⁸Kami deka meli pemakai enggau ai irup ari kita. Awakka kami bejalai nengah menua kita,

²⁹baka ke disagi bala peturun Esau ti diau di Edom, enggau baka ke disagi orang Moap ti diau di Ar, datai ke kami udah meraka Sungai Jordan ngagai menua ti diberi TUHAN Allah Taala kami ngagai kami.’

³⁰“Tang Raja Sihon enda ngemendarka kitai bejalai nengah menua iya, laban TUHAN Allah Taala kitai udah ngasuh ati iya kieh sereta keras deka ngelaban, ngambika kitai ngalahka iya, lalu ngerampas menua iya. Menua nya agi benung dialahka kitai diatu.

³¹Lalu ku TUHAN bejaku ngagai aku, ‘Peda nuan, Aku udah belabuh nyerahka Raja Sihon enggau menua iya ngagai jari nuan; berengkah ngerampas menua iya, ngambika kita nguan menua iya.’

³²Sihon lalu datai mai semua bala soldadu iya, lalu ngelaban kitai di Jahas.

³³TUHAN Allah Taala kitai lalu nyerahka iya ngagai jari kitai. Kitai lalu ngalahka iya, enggau bala anak lelaki iya, enggau semua bala soldadu iya.

³⁴Lalu kitai mega ngalah lalu ngerusak semua nengeri, lalu munuh semua orang ke lelaki, ti indu, enggau anak mit. Semua sida abis dibunuh kitai.

³⁵Kitai ngambi jelu tupi, lalu ngerampas utai ti dalam nengeri nya.

³⁶Kenyau ari Aroer ti ba tisi Lebak Arnon, enggau kenyau ari nengeri ti ba lebak nya, nyentuk ngagai Giliat, nadai nengeri ti bekuta ti enda ulih dialahka kitai; TUHAN Allah Taala kitai udah nyerahka semua nengeri nya ngagai jari kitai.

³⁷Semina menua peturun Amon aja enda tau ditengah kitai, iya nya semua menua ti nebing Sungai Jabok, enggau nengeri ti ba menua ti bebukit, enggau sebarang endur bukai ti enda disagi TUHAN tengah kitai.