Read Iban Ulang Adat 20 Bible Online

Ulang Adat 20 - Iban bible

Ulang Adat 20

¹“Lebuh kita mansang ngelaban munsuh, lalu kita meda kerita perang enggau kuda, enggau bala soldadu sida mayuh agi ari bala soldadu kita, anang takutka sida. Laban TUHAN Allah Taala kita, ti udah mai kita pansut ari menua Ejip, deka meruan enggau kita.

²Sebedau kita berengkah belaban, siku imam enda tau enda mansang ke mua, lalu nyebut ngagai bala soldadu munyi tu:

³‘Kita orang Israel, pendingka tu ulih kita! Sehari tu kita deka mansang beperang. Anang takutka munsuh, tauka lemi semengat, tauka begau abis ati,[20]

⁴laban TUHAN Allah Taala kita deka bejalai enggau kita, beperang ngarika kita, lalu meri kita pemenang.’

⁵“Udah nya bala pemesai deka bejaku enggau bala soldadu munyi tu, ‘Kati bisi lelaki ditu ke baru udah ngaga rumah, tang apin nyerahka rumah nya? Enti iya apin, iya enda tau enda pulai, enggai ke iya mati beperang, lalu orang bukai deka nyerahka rumah iya.

⁶Kati bisi lelaki ditu ke baru udah nanam kebun anggur, tang apin bisi peluang ngetau buah ari kebun nya? Enti iya apin, iya enda tau enda pulai, enggai ke iya mati beperang, lalu orang bukai deka ensepi penyamai buah anggur nya.

⁷Kati bisi lelaki ditu ke betunang deka bebini? Enti bisi, iya enda tau enda pulai, enggai ke iya mati beperang, lalu orang bukai jadi enggau tunang iya.’

⁸“Bala pemesai mega deka nyebut ngagai bala soldadu sida munyi tu, ‘Kati bisi lelaki ditu takut? Enti bisi, iya enda tau enda pulai, enggai ke iya marit orang bukai takut.’

⁹Lebuh bala pemesai udah tembu bejaku ngagai bala soldadu, nya baru orang ke nyadi tuai ke siti-siti raban enda tau enda dipilih.

¹⁰“Lebuh kita mansang nyerang sebuah nengeri, kita enda tau enda dulu meri peluang ngasuh orang dia nunduk.

¹¹Enti sida muka pintu nengeri lalu nunduk, semua sida deka nyadi ulun kita, lalu ngereja pengawa ti berat ke kita.

¹²Tang enti orang dalam nengeri nya enggai nunduk, tang keras deka ngelaban, kelulung nengeri nya ngena bala soldadu kita.

¹³Udah nya, lebuh TUHAN Allah Taala kita ngasuh kita ngalahka nengeri nya, bunuh semua lelaki ke dalam nengeri nya.

¹⁴Tang kita tau ngambi indu, anak mit, jelu tupi enggau semua utai bukai dalam nengeri nya ke kita empu. Kita tau ngena utai ti diempu munsuh kita laban TUHAN udah meri utai nya ngagai kita.

¹⁵Nya jalai kita ngereja utai ba nengeri ti jauh ari menua ti alai kita ngentapka diri.

¹⁶“Tang lebuh kita ngalahka nengeri dalam menua ti diberi TUHAN Allah Taala kita ngagai kita, bunuh semua utai ti enseput dalam nengeri nya.

¹⁷Luska semua orang Iti, orang Amor, orang Kanaan, orang Peris, orang Ibi, orang Jebus, munyi ti dipesanka TUHAN.

¹⁸Bunuh sida ngambika sida enda mai kita bedosa ngelaban TUHAN ngena ajar ti ngasuh kita ngereja semua utai ti jai, ti dikereja sida lebuh sida nyembah petara sida.

¹⁹“Lebuh kita nguji ngalahka nengeri, anang betebangka kayu buah dia, taja pen kita lama ngelulung nengeri nya. Empa buah nya, tang anang munuh kayu nya. Kayu nya ukai munsuh kita.

²⁰Kita tau nebang kayu bukai kena kita begagaka kuta ti dikena kita ngelulung nengeri nya, datai ke nengeri nya alah.