Read Iban Ulang Adat 21 Bible Online

Ulang Adat 21 - Iban bible

Ulang Adat 21

¹“Enti orang bisi ditemu kena bunuh orang ba padang di menua ti deka diberi TUHAN Allah Taala kita ngagai kita, lalu kita enda nemu sapa munuh iya,

²bala tuai bansa enggau bala hakim kita enda tau enda angkat lalu nyukat penyauh endur alai bangkai nya ditemu ngagai genap buah nengeri ti semak endur nya.

³Udah nya bala tuai ke dalam nengeri ti pemadu semak, enda tau enda milih siku sapi ti indu ti agi biak, ti enda kala dikena ngereja pengawa.

⁴Sida lalu mai sapi ti indu nya ngagai siti endur ti semak siti sungai ti nadai kala rangkai, lalu tanah dia pen nadai mega kala dichangkul tauka ditanam enggau utai. Dia sida deka matahka rekung sapi ti indu nya.

⁵Bala imam Lewi deka mansang ke mua, laban TUHAN Allah Taala kita udah milih sida bekereja ke Iya, lalu madahka berekat dalam nama TUHAN, lalu ari pemutus penemu sida, semua laya diputarka magang.

⁶Udah nya semua tuai ari nengeri ti pemadu semak ari endur alai bangkai orang nya ditemu, enda tau enda masu jari sida atas sapi ti indu ti udah dipatahka rekung nya

⁷lalu nyebut, ‘Kami nadai munuh orang tu, lalu kami enda mega nemu sapa ti munuh iya.

⁸TUHAN, ampun meh orang Israel, ti udah ditebus Nuan. Anang nejuka darah orang ke nadai penyalah ninggang nembiak Nuan orang Israel.’ Sida lalu diampun.

⁹Nya alai, laban kita ngereja utai ti diasuh TUHAN, kita enda kena tinggang penyalah ketegal pemati orang nya.

¹⁰“Lebuh TUHAN Allah Taala kita meri kita pemenang lebuh beperang, lalu kita bulih orang tangkap,

¹¹kita nyangka bisi tepedaka, ba bala orang tangkap nya, indu ke bajik, ti deka diambi kita nyadika bini.

¹²Bai iya ngagai rumah nuan. Dia iya enda tau enda ngukur [21] buk iya, mipil kukut iya,

¹³lalu nukar gari iya. Iya deka diau dalam rumah nuan, lalu ngulitka apai indai iya sebulan. Udah nya baru nuan tau jadi enggau iya.

¹⁴Lepas nya, enti nuan enggai agi jadi enggau iya, nuan enda tau enda ngelepaska iya. Nyadi laban nuan udah mejalka iya beleman enggau nuan, nuan enda tau ngaga iya baka ke ngaga ulun lalu nyual iya.

¹⁵“Enti sema orang bisi dua iku bini, lalu bini iya ke dua iku nya sama ngadaka anak lelaki, tang anak ke dulu agi ada nya ukai anak ari indu ke balat dikerinduka iya,

¹⁶lebuh iya berundingka chara iya deka magi reta tengkira iya ngagai bala anak iya, iya enda tau semina berundingka anak ari bini ke balat agi dikerinduka iya, lalu meri iya ungkup ti endang patut diempu anak tuai iya.

¹⁷Iya enda tau enda meri dua kali lipat mayuh agi ungkup ngagai anak tuai iya, taja pen anak tuai iya nya ukai anak ari bini ke balat agi dikerinduka iya. Apai enda tau enda ngaku anak tuai diri empu, lalu meri ngagai iya ungkup ti endang patut diempu iya ti nyadi anak tuai, nitihka adat.

¹⁸“Enti sema orang bisi siku anak lelaki ke kieh sereta deka ngelaban, ke enggai ngasika apai indai iya, taja pen seduai iya disiplin iya,

¹⁹apai indai iya enda tau enda mai iya ngagai bala tuai di nengeri ti alai sida diau, lalu ngasuh iya kena pechara.

²⁰Apai indai orang nya deka nyebut ngagai bala tuai, ‘Anak kami duai tu kieh sereta deka ngelaban, lalu enggai ngasika kami duai. Iya bebasauka duit sereta pemabuk.’

²¹Udah nya bala orang lelaki di nengeri nya lalu nuku iya ngena batu datai ke mati. Nya meh chara kita muai orang ke jai nya ari bala kita. Semua orang di menua Israel deka ninga berita pasal utai ti udah nyadi, lalu sida deka takut.

²²“Enti orang udah kena ukum bunuh laban iya udah ngereja penyalah, lalu bangkai iya digantung ari sebatang tiang,

²³ bangkai nya enda tau ditejuka begantung dia semalam-malam nya. Bangkai nya enda tau enda dikuburka sehari nya, laban bangkai orang ke digantung ari tiang, mai sumpah Allah Taala ngagai menua. Kuburka bangkai orang nya, ngambika kita enda ngamahka menua ti diberi TUHAN Allah Taala kita, ngagai kita.