Read Iban Ulang Adat 22 Bible Online

Ulang Adat 22 - Iban bible

Ulang Adat 22

¹ “Enti kita bisi tepedaka sapi tauka bedus orang Israel lelang, anang enda ibuhka jelu nya. Bai jelu nya pulai baru ngagai orang ke bempu iya.

²Tang enti orang ke bempu jelu nya diau jauh ari kita, tauka kita enda nemu sapa ke bempu jelu nya, bai jelu nya ngagai rumah kita. Lebuh orang ke bempu iya datai ngiga iya, beri jelu nya ngagai iya.

³Kereja mega baka nya ba pasal keledai, gari, tauka utai bukai ti lenyau ari jari orang Israel.

⁴“Enti keledai tauka sapi orang Israel rebah, anang enda ibuhka jelu nya. Saup orang nya ngangkatka jelu iya bediri baru.

⁵“Indu enda tau ngena pekayan lelaki, lalu lelaki pen enda mega tau ngena pekayan indu. TUHAN Allah Taala kita begedika orang ke ngereja utai ti baka nya.

⁶“Enti kita tetemuka sarang burung ba kayu, tauka ba tanah, lalu indu burung nya meram telu tauka anak iya, anang ngambi indu burung nya.

⁷Kita tau ngambi anak burung nya, tang kita enda tau enda ngelepaska indu iya, ngambika kita gayu-guru sereta kaya-raja.

⁸“Lebuh kita ngaga rumah baru, gaga reraga ba tisi perabung rumah nya. Nya baru kita enda betanggungjawap enti orang labuh ari perabung nya lalu mati.

⁹ “Anang nanam utai bukai ba kebun anggur kita. Enti kita nanam utai bukai dia, kita enda tau ngambi asil ari kebun nya, nemuka buah anggur tauka utai bukai.

¹⁰“Anang begandinka jelu sapi enggau keledai lebuh kita ngeradu tanah.

¹¹“Anang ngena gari ti ditenun ari bulu bedus begulai enggau linin.

¹² “Jait rambing ba empat iti sukut gari kita.

¹³“Enti lelaki jadi enggau indu siku, lalu udah nya berunding enggai agi jadi enggau iya,

¹⁴lalu iya ngaga mayuh macham petenah ngagai indu nya, madahka iya ukai dara bungas lebuh seduai iya jadi,

¹⁵apai enggau indai indu nya enda tau enda nyerahka kelai ngagai bala tuai ba pintu kuta nengeri nya, kena netapka indu nya endang amat dara bungas.

¹⁶Apai indu nya deka nyebut ngagai sida, ‘Aku ngasuh anak indu aku jadi enggau lelaki tu, lalu diatu lelaki tu enggai agi jadi enggau iya.

¹⁷Iya udah betenahka iya, ngumbai iya ukai dara bungas lebuh seduai iya jadi enggau pangan diri. Tu tanda anak aku agi dara bungas lebuh seduai iya jadi enggau pangan diri. Peda kita bekau darah ba chadar tilam tu!’

¹⁸Udah nya bala tuai nengeri nya deka mai laki indu nya, lalu malu iya.

¹⁹Sida mega deka ngukum iya seratus singkap duit pirak, lalu meri duit nya ngagai apai indu nya, laban lelaki nya udah ngemaluka indu orang Israel. Nambahka nya, indu nya deka mengkang jadi enggau lelaki nya, lalu lelaki nya enda tau muai indu nya seagi-agi lelaki nya idup.

²⁰“Tang enti utai ti dipedawaka lelaki nya endang sigi amat, lalu tanda indu nya agi dara bungas pen nadai,

²¹sida enda tau enda mai indu nya pansut ngagai pintu penama rumah apai iya, alai orang lelaki ke di nengeri nya deka nuku indu nya ngena batu datai ke mati. Iya udah ngereja utai ti ngemaluka bansa kitai, laban iya udah beleman enggau lelaki sebedau iya belaki lebuh iya agi diau dalam rumah apai iya. Nya meh jalai kita muai penyai nya ari bala kita.

²²“Enti lelaki kena tangkap beleman enggau bini orang bukai, seduai iya deka sama dibunuh. Nya meh jalai kita deka muai penyai nya ari menua Israel.

²³“Enti lelaki kena tangkap ba sebuah nengeri lebuh iya beleman enggau indu siku ke betunang enggau orang bukai,

²⁴kita enda tau enda mai seduai iya pansut ari nengeri nya, lalu nuku seduai iya ngena batu datai ke seduai iya mati. Indu nya enda tau enda dibunuh, laban iya nadai ngangau minta tulung, taja pen iya dalam nengeri, alai orang ulih ninga iya. Lalu lelaki nya enda tau enda mega dibunuh, laban iya beleman enggau orang ke betunang. Nya meh jalai kita muai penyai nya ari bala kita.

²⁵Enti lelaki masung indu siku dalam babas, lebuh indu nya benung betunang enggau lelaki bukai, semina lelaki ke masung iya nya aja deka dibunuh.

²⁶Kita enda tau ngereja sebarang utai ngagai indu nya, laban iya nadai ngereja dosa ti tau ngasuh iya diukum bunuh. Pekara nya sebaka enggau pekara pasal lelaki ke ngamuk lelaki siku, lalu munuh iya.

²⁷Lelaki nya masung indu nya dalam babas, lalu taja pen indu nya rauh-rauh minta tulung, tang orang nadai datai nyaup iya.

²⁸ “Enti lelaki kena tangkap masung indu ke biak, ti enda betunang,

²⁹lelaki nya enda tau enda mayar derian lima puluh singkap duit pirak ngagai apai indu nya, lalu indu nya nyadika bini iya, laban iya udah mejalka indu nya beleman enggau iya. Lalu iya enda tau muai indu nya seumur idup.

³⁰ “Lelaki enda tau beleman enggau bini apai iya, laban nya ngemaluka apai iya.