Read Iban Ulang Adat 23 Bible Online

Ulang Adat 23 - Iban bible

Ulang Adat 23

¹“Orang ke udah dipeliri, tauka udah dikempat utai ti dilalaika lelaki, enda tau nyadi raban nembiak TUHAN.

²“Anak ampang, tauka peturun anak ampang enda tau nyadi nembiak TUHAN. Indah nyentuk ngagai serak ti kesepuluh deh sida enda tau nyadi nembiak TUHAN.

³ “Orang bansa Amon, tauka orang Moap, tauka peturun sida, nyentuk ngagai serak ti kesepuluh, enda tau nyadi raban nembiak TUHAN,

⁴ laban sida enda meri kita pemakai enggau ai irup lebuh kita di rantau jalai pansut ari menua Ejip, lalu sida ngaji Balaam anak Beor, ari nengeri Petor di Mesopotamia, nyumpah kita.

⁵ Tang TUHAN Allah Taala kita enggai mendingka Balaam, lalu mutarka sumpah nya nyadika berekat, laban Iya rinduka kita.

⁶Anang nulung bansa orang nya, tauka ngasuh sida kaya-raja, sepemanjai umur kita.

⁷“Anang mechat orang Edom laban sida iya kaban belayan kita empu. Lalu anang mechat orang Ejip, laban kita udah diau nyadi orang kampar di menua sida.

⁸Berengkah ari serak ti ketiga ke atas, peturun bansa orang nya tau nyadi raban nembiak TUHAN.

⁹“Lebuh kita diau dalam kem deka mansang nyerang munsuh kita, kita enda tau enda nyeliahka utai ti tau ngasuh kita enda tuchi.

¹⁰Enti lelaki nyadi enda tuchi laban iya bisi mansutka ai mani lebuh iya tinduk, iya enda tau enda pansut ari kem; iya enda tau tama ngagai kem.

¹¹Lebuh hari nyau lemai, iya enda tau enda masu diri ngena ai, lalu ba padam mata panas iya tau pulai baru ngagai kem.

¹²“Kita enda tau enda bisi siti endur di luar kem alai kita kemi bira.

¹³Siti ari pekekas ti dibai kita nya utai kena ngeruang tanah; lebuh kita asai ti deka kemi bira, kita tau ngeruang lubang ngena pengeruang tanah nya, lalu udah nya ngelamun tai kita.

¹⁴Laban TUHAN Allah Taala kita bejalai enggau kem kita, nyaga kita lalu nyerahka munsuh kita ngagai jari kita, nya alai kem kita enda tau enda diintu kudus, ngambika Iya nadai meda utai ti enda menuku ba bala kita lalu nguingka belakang iya ngagai kita.

¹⁵“Enti ulun rari ari tuan iya, lalu iya datai ngagai kita, anang nganjung iya pulai baru.

¹⁶Sida tau diau enggau kita, dalam nengeri ti dipilih sida nitihka peneka ati sida empu, lalu kita enda tau nekanka pengidup sida.

¹⁷ “Orang Israel, nemuka lelaki tauka indu, nadai tau nyadi sundal dalam rumah sembiang.

¹⁸Kita enda tau mai duit ti ulih orang nyundal, tauka gaji lelaki ke nyundal, ngagai rumah TUHAN Allah Taala kita, kena kita ngamatka semaya, laban utai dua bengkah nya dipegedika TUHAN.

¹⁹ “Kita enda tau minta anak ari utai ti dijali kita ngagai orang Israel, nemuka utai nya duit, tauka pemakai, tauka utai bukai.

²⁰Kita tau minta anak ari duit ti dijali kita ngagai orang kampar, tang kita enda tau minta anak ari duit ti dijali kita ngagai orang Israel. Kita enda tau enda ngasika adat tu. Nya baru TUHAN Allah Taala kita deka merekatka semua utai ti dikereja kita di menua ti deka diempu kita.

²¹ “Lebuh kita ngaga semaya enggau TUHAN Allah Taala kita, anang laun ngamatka semaya nya. TUHAN enggai meda kita enda ngamatka semaya kita. Kita bedosa enti kita enda ngamatka semaya diri.

²²Kita enda salah enti kita enda ngaga semaya enggau TUHAN,

²³tang enti kita ngaga semaya laban kita endang deka, kita enda tau enda ngamatka semaya nya.

²⁴“Lebuh kita bejalai niti jalai ba kebun anggur orang bukai, kita tau makai buah anggur naka ti ulih empa kita, tang kita enda tau ngisi ma kita lalu mai buah nya kebukai.

²⁵Lebuh kita bejalai niti jalai nengah umai orang, kita tau makai gandum naka ti ulih dirurut kita, tang kita enda tau ngetau gandum nya ngena ketap.