Read Iban Ulang Adat 25 Bible Online

Ulang Adat 25 - Iban bible

Ulang Adat 25

¹“Enti dua iku orang Israel mansang ngagai kot minta orang ngatur laya seduai iya, lalu siku ari seduai iya nya dikumbai enda salah, lalu siku dikumbai salah,

²lalu enti iya ke salah nya diukum sipat, hakim enda tau enda ngasuh iya tingkap ba tanah, lalu ngasuh iya disipat. Penyuah iya disipat deka bepanggai ba pemerat penyalah iya.

³ Iya tau disipat nyentuk ngagai empat puluh kali, tang enda tau lebih ari nya. Enti lebih ari nya, utai nya deka ngemaluka iya di mua orang mayuh.

⁴ “Anang mampul mulut sapi lebuh kita ngena sida nungku gandum.

⁵ “Enti orang dua iku diri menyadi diau ba sebidang tanah, lalu siku ari seduai nya mati, nadai ninggalka anak, balu menyadi ke mati nya enda tau jadi enggau lelaki bukai ke ukai ari ruang bilik laki iya. Menyadi lelaki orang ke udah mati nya betanggungjawap jadi enggau indu ke balu nya.

⁶Anak tuai seduai iya deka dikumbai anak orang ke udah mati nya, ngambika iya enda putus purih di menua Israel.

⁷ Tang enti menyadi orang ke mati nya enggai jadi enggau indu nya, indu nya empu enda tau enda betemu enggau bala tuai di nengeri nya, lalu nyebut ngagai sida, ‘Menyadi laki aku enggai ngereja pengawa diri. Iya enggai meri menyadi iya purih dalam bansa orang Israel.’

⁸Udah nya bala tuai di nengeri nya enda tau enda mesanka lelaki nya lalu bejaku enggau iya. Enti iya mengkang enggai jadi enggau indu nya,

⁹balu menyadi iya enda tau enda betemu enggau iya, di mua semua bala tuai di nengeri nya, ningkilka kasut iya sepiak, ngeludah mua iya, lalu nyebut, ‘Tu utai ti nyadi ngagai orang ke enggai meri purih ngagai menyadi iya.’

¹⁰Ruang bilik lelaki nya deka dikumbai ‘ruang bilik orang ke udah tingkil kasut.’

¹¹“Enti dua iku lelaki belaya, lalu bini lelaki ti siku nguji nyaup laki iya, lalu ngeremuk utai lelaki ti siku nya,

¹²anang kasihka indu nya; tetak jari iya.

¹³ “Anang ngakal lebuh kita nimbang tauka nyukat utai.

¹⁵Kena timbang enggau penyukat ti betul, ngambika kita gayu-guru nguan menua ti diberi TUHAN Allah Taala kita ngagai kita.

¹⁶TUHAN begedika orang ke ngakal.

¹⁷ “Kingatka utai ti udah dikereja orang Amalek ngagai kita, lebuh kita pansut ari menua Ejip,

¹⁸pasal sida ke nyerang kita di rantau jalai, lebuh kita lepi sereta lelak, lalu munuh semua bala kita ke enda tetitihka bala mayuh bejalai; orang Amalek nya enda nangika Allah Taala.

¹⁹Nya alai, lebuh TUHAN Allah Taala kita udah meri menua nya ngagai kita, lalu udah ngasuh kita diau likun ari semua munsuh ke ngelingi kita, kita enda tau enda munuh semua orang Amalek, ngambika sida enda agi dikingatka. Anang enda ingat ngereja nya!