Read Iban Ulang Adat 26 Bible Online

Ulang Adat 26 - Iban bible

Ulang Adat 26

¹“Lebuh kita udah ngambi menua ti diberi TUHAN Allah Taala kita ngagai kita, lalu udah ngentapka diri dia,

² kita enda tau enda mai sekeda buah bungas ari utai ti ditanam kita, ti diketau kita di menua ti diberi TUHAN Allah Taala kita ngagai kita, lalu kita enda tau enda nyimpan utai nya dalam bakul, lalu mansang ngagai endur alai TUHAN Allah Taala kita disembah.

³Mansang kita ngagai imam ke bekereja lebuh maya nya, lalu sebut ngagai iya, ‘Sehari tu aku ngaku ngagai TUHAN Allah Taala aku, aku udah datai di menua ti udah disemaya deka diberi Iya ngagai aki ini kitai.’

⁴“Lebuh imam nya ngambi bakul nya ari jari kita, lalu ngengkahka bakul nya di mua alta TUHAN Allah Taala kita,

⁵kita enda tau enda nyebut leka jaku tu di mua TUHAN Allah Taala kita: ‘Aki ini kami orang Aram ti diau segau-segau ba sebelah endur; iya enggau sida sebilik mansang ngagai menua Ejip, lalu diau dia nyadi orang kampar; sida nadai mayuh tubuh, tang sida nyadi bansa ti besai, ti kering sereta mayuh tubuh.

⁶Lebuh orang Ejip jai enggau kami, lalu mejalka kami nyadi ulun,

⁷kami nyabak ngangauka TUHAN Allah Taala aki ini kami; TUHAN ninga kami lalu meda pemedis, penusah enggau pemerinsa kami.

⁸TUHAN lalu mai kami pansut ari menua Ejip ngena jari Iya ti kering, enggau ngena lengan ti diunjurka Iya, ngena kuasa ti besai ti dipandangka Iya, sereta enggau ngena kereja ajih, enggau kereja ti nyelai;

⁹lalu Iya udah mai kami ngagai endur tu, lalu meri menua ti kaya sereta ami tu ngagai kami.

¹⁰Nya alai diatu aku mai buah bungas ari utai ti ditanam aku ba tanah ti udah diberi Nuan, O TUHAN, ngagai aku.’ Kita lalu ngengkahka bakul nya di mua TUHAN Allah Taala nuan, lalu meremi di mua Iya.

¹¹Udah nya kita, sama enggau orang Lewi, sereta enggau orang kampar ti diau begulai enggau kita, deka rami gaga ngena utai ti udah diberi TUHAN Allah Taala kita, ngagai kita, enggau ngagai kita sebilik.

¹² “Lebuh kita udah tembu meri semua pemeri sepuluh peratus kita dalam taun ti ketiga (ti dikumbai taun alai meri pemeri sepuluh peratus), alai kita ke meri pemeri sepuluh peratus kita ngagai orang Lewi, ngagai orang kampar, ngagai orang ke patu balu, ngambika sida makai lalu kenyang dalam nengeri kita,

¹³kita enda tau enda nyebut di mua TUHAN Allah Taala kita: ‘Aku udah mai pemeri sepuluh peratus ti kudus nya ari rumah aku, lalu aku udah meri pemeri nya ngagai orang Lewi, ngagai orang kampar ti diau begulai enggau kami, ngagai orang ke patu balu, nitihka semua pesan ti diberi Nuan ngagai kami; aku nadai ngelanggar tauka enda ingatka pesan Nuan:

¹⁴Aku nadai makai utai nya lebuh aku ngulit; Aku nadai mai utai nya pansut ari rumah aku lebuh aku enda tuchi, lalu aku nadai udah meri utai nya nyadika piring ke orang ke udah mati.[23] Aku udah ngasika TUHAN Allah Taala aku, ngereja semua utai ti udah dipesanka Nuan.

¹⁵Malik ke baruh kitu ari endur Nuan ti kudus di serega, lalu berekatka bala nembiak Nuan Israel, enggau menua ti udah diberi Nuan ngagai kami ngena sumpah ngagai aki ini kami, menua ti kaya sereta ami.’

¹⁶“Sehari tu TUHAN Allah Taala kita bejaku ngasuh kita ngasika semua adat Iya. Nya alai, kita enda tau enda tetap ati ngasika semua adat nya enggau pengabis ati, enggau pengabis semengat kita.

¹⁷Sehari tu kita udah ngaku TUHAN nyadika Allah Taala kita. Kita udah besemaya deka ngasika Iya, nitihka semua adat Iya, lalu ngereja semua utai ti dipesanka Iya ngagai kita.

¹⁸ Sehari tu TUHAN udah nyambut kita nyadika nembiak Iya, munyi ti udah disemaya Iya ngagai kita, lalu Iya ngasuh kita ngasika semua adat Iya.

¹⁹Iya deka ngaga kita nyadi bansa ti kering agi ari semua bansa bukai ti udah digaga Iya, lalu kita deka mai puji enggau basa ngagai nama Iya, lalu kita deka nyadi nembiak Iya, munyi ti udah disemaya Iya.”