Read Iban Ulang Adat 27 Bible Online

Ulang Adat 27 - Iban bible

Ulang Adat 27

¹Udah nya Moses enggau bala tuai orang Israel, bejaku ngagai orang mayuh, “Kita enda tau enda ngasika semua pesan ti diberi aku ngagai kita sehari tu.

² Lebuh kita udah meraka Sungai Jordan, lalu datai ba menua ti diberi TUHAN Allah Taala kita ngagai kita, kita enda tau enda nirika berapa igi lampang batu ti besai, ngechat batu nya enggau kapu.

³Tuliska semua leka adat tu ba batu nya lebuh kita udah meraka sungai nya, deka mansang ngagai menua ti diberi TUHAN ngagai kita, menua ti kaya sereta ami, munyi ti udah disemaya TUHAN Allah Taala aki ini kita ngagai kita.

⁴Nya alai lebuh kita udah meraka Sungai Jordan, dirika lampang batu nya ba Bukit Ebal, munyi ti diasuh aku kereja kita sehari tu, lalu chat batu nya enggau kapu.

⁵ Gaga siti alta ke TUHAN Allah Taala kita dia ari batu ti nadai kala dipansap ngena besi.

⁶Giga batu ti tau dikena enda ibuh dipansap. Udah nya beri piring tunu kita ngagai TUHAN Allah Taala kita ba alta nya.

⁷Beri mega piring pemaik, lalu empa piring nya dia, rami gaga di mua TUHAN Allah Taala kita.

⁸Kita enda tau enda nuliska semua leka jaku adat tu enggau terang ba semua lampang batu nya.”

⁹Udah nya Moses enggau bala imam Lewi lalu bejaku ngagai semua orang Israel, “Anang ragak, kita orang Israel, lalu pendingka aku. Sehari tu kita udah nyadi nembiak TUHAN Allah Taala kita.

¹⁰Nya alai kita enda tau enda ngasika Iya lalu nitihka semua pesan enggau adat Iya ti diberi aku ngagai kita sehari tu.”

¹¹Sehari nya Moses mega bejaku ngagai orang Israel,

¹² “Lebuh kita udah meraka Sungai Jordan, tu bagi raban bansa ti enda tau enda bediri ba Bukit Gerisim lebuh jaku berekat disebut: Raban bansa Simeon, Lewi, Judah, Isakar, Josep, enggau Benjamin.

¹³Lalu tu bagi raban bansa ti deka bediri ba Bukit Ebal lebuh jaku sumpah disebut: Raban bansa Reuben, Gat, Aser, Sebulun, Dan enggau Naptali.

¹⁴Udah nya orang Lewi deka nyebut leka jaku tu enggau nyawa ti inggar ngagai semua orang Israel:

¹⁵ “Barang sapa ngaga engkeramba, tauka ngaga anak patung, utai ti dipegedika TUHAN, lalu belalai nirika utai nya, deka tulah.” Lalu semua orang mayuh deka nyaut, “Amin!”

¹⁶ “Barang sapa enda bebasaka apai indai diri, deka tulah.” Lalu semua orang mayuh deka nyaut, “Amin!”

¹⁷ “Barang sapa mindahka pak kelai entara, deka tulah.” Lalu semua orang mayuh deka nyaut, “Amin!”

¹⁸ “Barang sapa nguluka orang ke buta nengah jalai ti salah, deka tulah.” Lalu semua orang mayuh deka nyaut, “Amin!”

¹⁹ “Barang sapa ngerampas hak orang kampar, orang ke patu balu, deka tulah.” Lalu semua orang mayuh deka nyaut, “Amin!”

²⁰ “Barang sapa ngemaluka apai iya, laban iya beleman enggau siku ari bini apai iya, deka tulah.” Lalu semua orang mayuh deka nyaut, “Amin!”

²¹ “Barang sapa beleman enggau jelu, deka tulah.” Lalu semua orang mayuh deka nyaut, “Amin!”

²² “Barang sapa beleman enggau menyadi indu tauka menyadi indu tiri diri, deka tulah.” Lalu semua orang deka nyaut, “Amin!”

²³ “Barang sapa beleman enggau mentua indu diri, deka tulah.” Lalu semua orang mayuh deka nyaut, “Amin!”

²⁴“Barang sapa udah belalai munuh orang, deka tulah.” Lalu semua orang mayuh deka nyaut, “Amin!”

²⁵“Barang sapa nerima gaji munuh orang ke nadai penyalah, deka tulah.” Lalu semua orang mayuh deka nyaut, “Amin!”

²⁶ “Barang sapa enda ngasika semua adat tu, deka tulah ditinggang sumpah.” Lalu semua orang mayuh deka nyaut, “Amin!”