Read Iban Ulang Adat 28 Bible Online

Ulang Adat 28 - Iban bible

Ulang Adat 28

¹ “Enti kita ngasika TUHAN Allah Taala kita, lalu tetap ati nitihka semua pesan Iya ti diberi aku ngagai kita sehari tu, TUHAN Allah Taala kita deka ngaga kita nyadi bansa ti pemadu bekuasa di dunya tu.

²Semua berekat tu deka diberi ngagai kita, enti kita ngasika TUHAN Allah Taala kita:

³“Nengeri enggau umai kita deka diberekatka.

⁴“Anak kita, utai ti ditanam kita, anak jelu tupi kita, nyengkaum anak sapi enggau anak domba kita, deka diberekatka.

⁵“Bakul roti enggau bisin ti dikena kita ngaga roti, deka diberekatka.

⁶“Kita deka diberekatka lebuh kita mupuk, enggau lebuh kita pulai.

⁷“TUHAN deka ngasuh munsuh ke nyerang kita, alah laban kita. Sida deka datai nyerang kita nengah jalai siti, tang rari ari kita nengah tujuh bengkah jalai.

⁸“TUHAN Allah Taala kita deka merekatka tibang kita, enggau semua pengawa ti dikereja kita; Iya deka merekatka kita di menua ti diberi TUHAN Allah Taala kita ngagai kita.

⁹TUHAN deka ngaga kita nyadi bansa ti kudus, munyi ti udah disemaya Iya ngena sumpah, enti kita ngasika pesan ti diberi TUHAN Allah Taala kita, lalu idup nitihka jalai Iya.

¹⁰Nya baru semua bansa di dunya tu deka nemu kita udah dipilih TUHAN nyadika nembiak Iya, lalu sida deka takutka kita.

¹¹TUHAN deka meri kita mayuh anak, mayuh jelu sapi, bulih mayuh asil ari utai ti ditanam kita, di menua ti udah disemaya Iya ngagai aki ini kita, ti deka diberi Iya ngagai kita.

¹²TUHAN deka nukangka langit, alai Iya ke nyimpan ai ujan, lalu meri kita ai ujan nitihka musin, lalu merekatka semua pengawa kita. Kita deka nyali ngagai mayuh bengkah bansa, tang kita enda nginjau.

¹³TUHAN deka ngaga kita nyadi pala, ukai nyadi iku; kita deka seruran kaya-raja, nadai kala miskin, enti kita ngasika pesan TUHAN Allah Taala kita, ti diberi aku ngagai kita sehari tu,

¹⁴lalu enda limpang ke kiba tauka ke kanan ari sebarang jaku ti diberi aku ngagai kita sehari tu, sereta enda nitih tauka nyembah petara bukai.

¹⁵“Tang enti kita enda ngasika TUHAN Allah Taala kita, lalu enda tetap ati ngereja semua pesan enggau adat Iya ti diberi aku ngagai kita sehari tu, semua leka jaku sumpah tu deka ninggang kita:

¹⁶“Nengeri enggau umai kita deka ditinggang sumpah.

¹⁷“Bakul roti kita enggau bisin ti dikena kita ngaga roti, deka tulah ditinggang sumpah.

¹⁸“Anak kita, asil ti ulih kita ari umai kita, anak jelu sapi, enggau anak jelu bedus kita deka tulah ditinggang sumpah.

¹⁹Kita deka tulah ditinggang sumpah lebuh kita mupuk, enggau lebuh kita pulai.

²⁰“TUHAN deka ngasuh kita dituntung penusah lalu begau abis ati[24] dalam semua utai ti dikereja kita, datai ke semua kita udah abis lengis enggau jampat, ketegal penyai ti dikereja kita, laban kita udah ninggalka Aku.

²¹TUHAN deka ngasuh penyakit betangkan-tangkan nyerang kita, datai ke semua kita abis mati di menua ti deka diambi kita.

²²TUHAN deka merinsaka kita ngena sakit tibi, penyakit chelap-angat, penyakit bisul, ngena hari ti angat enggau kemarau, ngena penyakit kulat enggau penyakit bekuap. Penyakit nya deka nyerang kita, datai ke kita mati.

²³Hari enda ujan, lalu tanah kita deka rangkai baka besi.

²⁴TUHAN deka nganti ujan ngena amau lalu semina amau aja deka nurun ari langit, datai ke kita abis mati.

²⁵TUHAN deka ngasuh kita alah laban munsuh kita. Kita deka nyerang sida nengah jalai siti, lalu kita deka rari ari sida nengah tujuh bengkah jalai, lalu semua orang di dunya tu deka takut lebuh sida meda utai ti nyadi ba kita.

²⁶Bangkai kita deka nyadika pemakai burung enggau jelu babas, lalu nadai orang muru sida.

²⁷TUHAN deka merinsaka kita enggau penyakit pisa, baka ke dikereja Iya ngagai orang Ejip. Iya deka merinsaka kita ngena penyakit rumbak, penyakit kuris enggau penyakit gatal, ti enda ulih digeraika.

²⁸TUHAN deka merinsaka kita ngena penyakit gila, penyakit buta, enggau penyakit mamau.

²⁹Kita deka bejalai gapa-gapa lebuh siang hari baka orang ke buta, lalu kita enda nemu tunga diri bejalai; lalu kita deka seruran dikeduan, sereta dirumpak orang, lalu nadai orang deka nulung kita.

³⁰“Kita deka betunang enggau indu, tang orang bukai deka jadi enggau indu nya. Kita deka ngaga rumah, tang kita enda diau dalam rumah nya. Kita deka numbuhka kebun anggur, tang kita enda ngasaika penyamai buah anggur nya.

³¹Jelu sapi kita deka disayat orang di mua kita empu, tang kita enda makai dagin jelu nya. Keledai kita deka dichuri orang lebuh kita tegenung merening, lalu jelu nya enda dipulaika baru ngagai kita. Jelu bedus kita deka diberi ngagai munsuh kita, lalu nadai orang deka nulung kita.

³²Anak lelaki enggau anak indu kita deka ditabanka munsuh ngagai menua bukai, lebuh kita genung-genung meda. Kita deka begigaka sida sepemanjai hari, tang nadai kuasa ngereja sebarang utai.

³³Orang ke enda dikelala kita deka makai utai ti ditanam kita enggau utai ti ulih kita; kita deka seruran dikeduan sereta diperinsa,

³⁴lalu nyadi gila meda utai ti dipeda kita.

³⁵TUHAN deka malu patung kita, lalu ngasuh kaki kita abis pedis diempa rumbak ti enda ulih digeraika, kenyau ari tapa kaki nyentuk ngagai punjung pala kita.

³⁶TUHAN deka mai kita, enggau raja kita ngagai menua bukai, ngagai bansa ti enda dikelala kita tauka dikelala aki ini kita, alai kita deka betuaika petara bukai ti digaga ari kayu enggau ari batu.

³⁷Orang di menua ti deka alai TUHAN muai kita, deka tekenyit ati meda utai ti nyadi ba kita; sida deka merinsa sereta beduan kita.

³⁸“Kita deka nanam mayuh benih, tang asil kita mimit, laban buntak deka makai utai ti ditanam kita.

³⁹Kita deka nanam kebun anggur, lalu ngintu kebun nya, tang kita enda ngetau buah anggur nya, tauka ngirup wain ari anggur nya, laban ulat deka makai batang anggur kita.

⁴⁰Kayu kana deka tumbuh di serata menua kita, tang kita nadai minyak kana kena kita ngunsut tubuh diri, laban buah kana nya deka gugur.

⁴¹Kita deka bisi anak lelaki, anak indu, tang sida deka lenyau ari jari kita, laban sida deka ditabanka orang nyadi orang tangkap.

⁴²Semua kayu enggau utai ti ditanam kita deka diempa indu lukung. [25]

⁴³“Orang bansa bukai ti diau di menua kita deka mansang kering-sekering, lalu kita deka mansang lembut-selembut.

⁴⁴Sida deka nyali kita duit, tang kita nadai duit dijali ngagai sida; sida deka nyadi pala, lalu kita nyadi iku.

⁴⁵“Semua sumpah tu deka ninggang kita, ngagai kita lalu ngalahka kita, datai ke kita dirusak, laban kita enda ngasika TUHAN Allah Taala kita, enda nitihka pesan enggau adat ti diberi aku ngagai kita.

⁴⁶Sumpah tu deka meruan enggau kita, sereta enggau peturun kita, kena nangkan kita belama iya.

⁴⁷TUHAN ngasuh kita kaya-raja dalam semua utai, tang kita enggai nyembah Iya enggau ati ti gaga sereta beterima kasih,

⁴⁸nya alai Iya deka ngasuh munsuh nyerang kita, lalu kita deka bekereja nyadi ulun sida. Kita deka lapar, aus, nadai gari, lalu suntuk semua utai. TUHAN deka nejuka munsuh kita merinsaka kita, datai ke kita mati.

⁴⁹TUHAN deka ngasuh siti bansa datai ari tisi dunya nyambarka kita baka menaul, bansa ti enda ditemu kita jaku,

⁵⁰bansa orang ke mangah, ti enda nemu bebasaka orang ke tuai, tauka kasihka orang ke biak.

⁵¹Sida deka ngerampas semua jelu tupi kita, enggau semua utai ti ditanam kita, ngambika kita lapar, nadai ninggalka gandum, wain, minyak kana, jelu sapi, tauka jelu bedus ke kita, datai ke kita mati.

⁵²Sida deka ngelulung kita dalam semua nengeri kita, datai ke dinding kuta kita ke tinggi, ti dikarapka kita, runtuh di serata menua kita. Sida deka ngelulung kita dalam semua nengeri kita di serata menua ti udah diberi TUHAN Allah Taala kita, ngagai kita.

⁵³“Laban kita kelalu balat merinsa dikelulung munsuh, kita deka bepakaika anak kita empu, ti udah diberi TUHAN Allah Taala kita ngagai kita. Kita deka makai isi anak lelaki, isi anak indu kita.

⁵⁴Indah orang ke nelap sereta siru ari bala kita empu deh enggai magi pemakai nya ngagai menyadi iya empu, ngagai bini ke endang seruran diberap iya, enggau ngagai bala anak iya ti agi idup,

⁵⁵enggai meri ngagai sida isi anak ti diempa iya, laban iya nadai pemakai bukai, laban iya udah kelalu balat merinsa dikelulung munsuh dalam nengeri kita.

⁵⁶Indah indu ke nelap sereta siru ari bala kita empu, ti enda ngindikka kaki iya ngagai tanah, deh enggai meri pemakai nya ngagai laki ke endang seruran diberap iya, tauka ngagai anak lelaki iya, tauka ngagai anak indu iya.

⁵⁷ Indah entemuni anak iya empu, enggau anak ke diadaka iya empu, deh iya enggai magi ngagai sida, laban iya belalai makai utai nya, laban iya nadai utai bukai diempa, empa pemalat kita udah merinsa dikelulung munsuh.

⁵⁸Ku Moses bejaku ngagai sida, “Enti kita enda tetap ati ngasika semua leka jaku ti ditulis dalam bup tu, lalu enda nangika pemesai mulia nama TUHAN Allah Taala kita,

⁵⁹TUHAN deka ngukum kita enggau peturun kita ngena penyakit ti balat, ti enda ulih digeraika.

⁶⁰Iya deka ngasuh semua penyakit ti udah nyadi di menua Ejip, ti balat diketakutka kita, lekat ba kita.

⁶¹Semua penyakit enggau pemerinsa bukai, taja pen sida nadai ditulis dalam Bup Adat tu, deka dikena TUHAN merinsaka kita, datai ke kita mati.

⁶²Taja pen kita menya ngemayuh bintang ti di langit, tang semina mimit aja kita deka idup, laban kita enda ngasika TUHAN Allah Taala kita.

⁶³Baka TUHAN ti gaga ati deka ngasuh kita kaya-raja sereta mayuh tubuh, baka nya mega TUHAN deka gaga ati ngerusak kita; kita deka dichabut ari menua ti deka diambi kita.

⁶⁴TUHAN deka ngachirka kita ngagai semua bansa, di serata dunya, lalu dia kita deka nyembah petara bukai ti digaga ari kayu tauka ari batu, petara ti enda ditemu kita tauka ditemu aki ini kita.

⁶⁵Lebuh kita diau di menua bukai, kita nadai pemaik, nadai endur alai kita belelak. Dia TUHAN deka ngasuh tungkul ati kita ketap-ketap, mata kita rabun, lalu kita lemi semengat.

⁶⁶Kita nadai pengadang. Siang malam kita deka takut, nadai pengandal.

⁶⁷Lebuh pagi hari kita deka nyebut, “Naka meh pemanah enti tu lemai hari!” lalu lebuh lemai hari, kita deka nyebut, “Naka meh pemanah enti tu pagi hari!” Kita nyebut nya laban kita takutka utai ti deka ngasuh ati kita takut, sereta takutka utai ti deka dipeda kita.

⁶⁸TUHAN deka mai kita pulai baru ngagai menua Ejip ngena kapal, nengah menua ti dipadahka aku enda agi ditengah kita; lalu di menua nya kita deka nyual diri ngagai munsuh kita nyadika ulun lelaki tauka ulun indu sida, tang nadai siku orang deka meli kita.”