Read Iban Ulang Adat 29 Bible Online

Ulang Adat 29 - Iban bible

Ulang Adat 29

¹Tu leka jaku sempekat ti udah diasuh TUHAN gaga Moses enggau orang Israel di menua Moap, nambahka sempekat ti udah digaga TUHAN enggau sida lebuh sida ba Bukit Sinai.

²Moses ngempuruka semua orang Israel, lalu bejaku ngagai sida, “Kita empu udah meda utai ti udah dikereja TUHAN ngagai raja menua Ejip, ngagai bala pemesai, enggau ngagai semua menua iya,

³pemalat penyakit ti dipeda kita, kereja ajih, enggau kereja ti nyelai.

⁴Tang nyentuk ngagai sehari tu TUHAN apin ngasuh kita meretika utai nya, apin ngasuh kita meda, apin ngasuh kita ninga.

⁵Ku TUHAN bejaku ngagai kita, ‘Aku udah nguluka kita empat puluh taun nengah menua puang. Baju kita enggau kasut kita enda luya;

⁶Kita nadai makai roti, lalu kita nadai ngirup wain, tauka ai ti bisa, ngambika kita nemu Aku tu TUHAN Allah Taala kita.’

⁷ Lebuh kitai datai ba endur tu, Raja Sihon di Hesbon, enggau Raja Og di Basan nyerang kitai, tang kitai ngalahka sida.

⁸ Kitai ngerampas lalu magi menua sida ngagai raban bansa Reuben enggau Gat, enggau setengah ari raban bansa Manasi.

⁹Nya alai kita enda tau enda tetap ati ngasika semua leka jaku sempekat tu, ngambika kita mujur dalam semua utai ti dikereja kita.

¹⁰“Semua kita begempuru sehari tu, kepala raban bansa kita, bala tuai kita, bala pemesai kita, enggau semua orang Israel,

¹¹bala anak kita, bala indu kita, enggau orang bansa bukai ke diau dalam kem kita, ke ngambi kayu enggau nyauk ai ke kita,

¹²ngambika kita nerima sempekat ti digaga TUHAN Allah Taala kita enggau kita, lalu netapka sempekat nya ngena sumpah sehari tu,

¹³ngambika Iya ngaga kita nyadika nembiak Iya sehari tu, lalu Iya nyadi Allah Taala kita, munyi ti udah disemaya Iya enggau kita, sereta enggau aki ini kita, Abraham, Isak enggau Jakop.

¹⁴Aku ngaga sempekat tu ngena jaku sumpah, ukai semina enggau kita ke bediri enggau kami ditu sehari tu di mua TUHAN Allah Taala kita,

¹⁵tang mega enggau semua orang ke nadai ditu enggau kitai sehari tu.

¹⁶Kita nemu gaya pengidup kita di menua Ejip, enggau jalai kita bejalai nengah menua orang bansa bukai.

¹⁷Kita udah meda engkeramba sida, ti digaga sida ari kayu, batu, pirak enggau emas.

¹⁸ Bala kita, nemuka lelaki tauka indu, tauka ruang bilik, tauka raban bansa kita, nyangka bisi limpang ari TUHAN Allah Taala kita lalu nyembah petara orang bansa bukai. Nyangka siku ari bala kita bisi baka urat ti tumbuh nyadi kayu ti pait sereta berachun.

¹⁹Semua orang ke ninga jaku sumpah tu, lalu merekatka diri empu, berunding dalam ati diri, “Kitai nadai utai ngawa, taja pen kitai kieh” (lalu ketegal nya, ngasuh penusah ti besai nyadi ba tanah ti mayuh ai enggau ba tanah ti rangkai),

²⁰TUHAN enggai ngampun orang ke baka nya, tang pengeringat TUHAN deka mau ngelaban iya, lalu semua jaku sumpah ti ditulis dalam bup tu deka ninggang iya magang, datai ke TUHAN udah ngerusak iya abis lengis.

²¹TUHAN deka ngaga iya nyadika teladan ke semua raban bansa orang Israel, lalu ngukum iya ngena sumpah ti disebut dalam sempekat ti ditulis dalam Bup Adat TUHAN tu.

²²Jemah ila, peturun kita, enggau orang bansa bukai ke datai ari menua jauh, deka meda penusah ti besai enggau pemerinsa ti udah dikena TUHAN ninggang menua kita.

²³ Tanah kita nadai tumbuh utai, dilamun merirang enggau garam. Nadai utai ulih tumbuh dia. Indah rumput deh enggai tumbuh dia. Menua kita deka nyadi baka nengeri Sodom enggau Gomorah, baka nengeri Admah enggau nengeri Seboim, ti dirusak TUHAN lebuh Iya ringat.

²⁴Semua dunya deka alit ati lalu nanya, ‘Nama kebuah TUHAN ngereja utai baka nya ngagai menua sida? Nama kebuah Iya ngemalat nya ringat?’

²⁵Lalu saut iya munyi tu, ‘Laban bala nembiak TUHAN udah ngelanggar sempekat ti udah digaga sida enggau Iya ti Allah Taala aki ini sida, lebuh Iya mai sida pansut ari menua Ejip.

²⁶Sida udah betuaika, lalu nyembah petara bukai ti nadai kala disembah sida menya, petara ti enda diasuh TUHAN sembah sida.

²⁷Nya kebuah TUHAN ringat ngagai nembiak Iya, lalu ninggang sida ngena semua sumpah ti ditulis dalam bup tu.

²⁸TUHAN nyabut sida ari menua sida empu laban Iya balat ringat, lalu ngeransi, lalu Iya muai sida ngagai menua bukai, ti alai sida diau diatu.’

²⁹Utai ti resia endang enggi TUHAN Allah Taala kitai, tang utai ti dipandangka endang enggi kita, enggau ke peturun kitai, ngambika kitai nitihka semua leka jaku ti dalam Adat nya belama iya.