Read Iban Ulang Adat 3 Bible Online

Ulang Adat 3 - Iban bible

Ulang Adat 3

¹“Udah nya kitai mindah tunga ke utara ngagai Basan, lalu Raja Og angkat enggau semua bala iya, mansang ngelaban kitai ba semak nengeri Edrei.

²Tang ku TUHAN bejaku ngagai aku, ‘Anang takutka iya. Aku deka nyerahka iya, bala soldadu iya, enggau menua iya, ngagai nuan. Kereja ngagai iya baka ke udah dikereja nuan ngagai Sihon raja orang Amor ke merintah di Hesbon.’

³Nya alai TUHAN mega nyerahka Raja Og enggau bala nembiak iya ngagai jari kitai, lalu kitai munuh semua sida.

⁴Lebuh maya nya mega, kitai ngalahka semua nengeri iya. Nadai nengeri ti enda dialahka kitai. Enam puluh buah nengeri semua iya dialahka kitai. Semua menua Argop, ti alai Raja Og merintah, dialahka magang.

⁵Semua nengeri nya didinding ngena kuta ti tinggi, bisi pintu, enggau alang penutup pintu, lalu mayuh mega genturung pendiau ti enda bekuta.

⁶Kitai ngerusak semua nengeri, lalu munuh semua lelaki, indu enggau anak mit, baka ke udah dikereja kitai ngagai nengeri Raja Sihon ke merintah di Hesbon.

⁷Kitai ngambi semua jelu tupi, lalu ngerumpak utai ari nengeri nya.

⁸Nya alai kitai ngerampas ari raja bansa Amor ke dua iku nya, menua ti muak ke timur Sungai Jordan, berengkah ari Sungai Arnon nyentuk ngagai Bukit Hermon.

⁹(Orang Sidon ngumbai Bukit nya Sirion, lalu orang Amor ngumbai bukit nya Senir.)

¹⁰Kitai ngerampas semua menua Raja Og ke megai perintah di menua Basan, nyengkaum nengeri ti ba emperan atas, menua Giliat enggau menua Basan, nyentuk ngagai nengeri Salekah enggau nengeri Edrei.

¹¹(Raja Og nya pengabis orang ari bansa Repaim. Sentubung iya, [1] digaga ari batu, [2] Buka sentubung nya 2 meter, lalu pemanjai sentubung nya 4 meter, nitihka atur penyukat ti dikena. Sentubung nya agi ulih dipeda di nengeri orang Amon di Rabah.)

¹²“Lebuh kitai ngerampas menua nya, aku ngeletak raban bansa Reuben enggau raban bansa Gat bempu menua ti muak ke utara nengeri Aroer, semak Sungai Arnon, enggau sekeda menua ti bebukit di Giliat, sama enggau nengeri ti mit di menua nya.

¹³Aku ngeletak setengah ari raban bansa Manasi bempu sebagi ari menua Giliat, enggau semua menua Basan, alai Raja Og ke merintah, reti nya, semua menua Argop. (Basan mega dikumbai menua orang Repaim.

¹⁴Jair, ke ari raban bansa Manasi, ngerampas semua menua Argop, reti nya, Basan, nyentuk ngagai garis entara menua Gesur enggau Maakah. Iya meri nama iya empu ngagai genturung pendiau di menua nya, lalu genturung pendiau nya agi dikumbai Tumpuk Pendiau Jair nyentuk ngagai ke diatu.)

¹⁵“Aku udah meri menua Giliat ngagai raban peturun Machir ke ari raban bansa Manasi.

¹⁶Lalu ngagai raban bansa Reuben enggau Gat, aku udah meri menua berengkah ari Giliat nyentuk ngagai Sungai Arnon. Tengah sungai nya nyadika garis entara menua sida di selatan, lalu garis entara menua sida di utara nya Sungai Jabok. Sida mega bekunsika Sungai Jabok nyadika garis entara menua enggau orang Amon.

¹⁷Muak ke barat, menua sida nganchau nyentuk ngagai Sungai Jordan, ari Tasik Galili di utara nyentuk ngagai Tasik Mati di selatan, enggau nyentuk ngagai kaki Bukit Pisgah di timur.

¹⁸ “Lebuh maya nya, aku mega meri atur tu ngagai kita: ‘Taja pen TUHAN Allah Taala kitai udah meri ngagai kita menua ti di timur Sungai Jordan, ngambika kita ngalahka menua nya, semua bala soldadu kita enda tau enda meraka Sungai Jordan dulu ari raban bansa orang Israel ti bukai.

¹⁹Semina bini, anak enggau jelu tupi kita aja, deka tinggal dalam nengeri ti udah diberi aku ngagai kita. Aku nemu kita mayuh jelu tupi.

²⁰Saup orang Israel ti bukai, datai ke sida udah ngalahka menua ti diberi TUHAN ngagai sida di barat Sungai Jordan, nyentuk ngagai maya TUHAN ngasuh sida diau dia enggau selamat, baka ke udah dikereja Iya ngagai kita. Udah nya baru kita tau pulai baru ngagai menua tu ti udah diberi aku ngagai kita.’

²¹“Lebuh maya nya aku lalu bejaku ngagai Josua, ‘Nuan udah meda semua utai ti udah dikereja TUHAN Allah Taala nuan ngagai raja dua iku nya, Sihon seduai Og. Iya deka ngereja baka nya mega ngagai semua menua bukai ti baru deka dipasuk kita.

²²Anang takutka sida, laban TUHAN Allah Taala kita, deka beperang ngarika kita.’

²³ “Lebuh maya nya aku bebendar amat besampi. Ku aku,

²⁴‘O TUHAN ti Pemadu Tinggi, aku nemu Nuan udah mandangka ngagai aku semina pun aja ari utai ti besai sereta badas, ti deka dikereja Nuan. Nadai petara di langit, tauka di dunya, ulih ngereja pengawa ti besai baka ke udah dikereja Nuan!

²⁵O TUHAN, Awakka aku meraka Sungai Jordan, ngambika aku meda menua ti ami ba tebing seberai nyin, menua ti bebukit sereta manah, enggau menua Lebanon.’

²⁶Tang TUHAN udah ringat ngagai aku, ketegal kita, lalu Iya enggai mendingka aku. Ku Iya bejaku ngagai aku, ‘Umbas meh nya! Anang nyebut nya agi ngagai Aku!

²⁷Alai nuan niki ngagai tuchung Bukit Pisgah, lalu tinjau tunga ke utara, ke selatan, ke timur enggau ke barat. Perening enggau manah utai ti dipeda nuan, laban nuan enda tau meraka Sungai Jordan.

²⁸Beri atur ngagai Josua, lalu keringka ati iya, laban iya deka nguluka orang mayuh meraka lalu ngalahka menua ti dipeda nuan.’

²⁹Nya alai kitai mengkang diau ba lebak seberai nengeri Bet-peor.