Read Iban Ulang Adat 30 Bible Online

Ulang Adat 30 - Iban bible

Ulang Adat 30

¹Ku Moses bejaku, “Aku diatu udah ngasuh kita milih entara berekat enggau sumpah. Lebuh semua utai tu udah nyadi ba kita ila, lalu kita diau begulai enggau bansa bukai, alai TUHAN Allah Taala kita ke udah ngachirka kita, kita deka ingatka utai ti udah diasuh aku pilih kita.

²Enti kita, tauka peturun kita, deka pulai baru ngagai TUHAN, lalu enggau pengabis ati kita ngasika pesan Iya ti diberi aku ngagai kita sehari tu,

³nya baru TUHAN Allah Taala kita deka kasihka kita. Iya deka mai kita pulai baru ari menua ti alai Iya udah ngachirka kita, lalu Iya deka ngasuh kita kaya-raja baru.

⁴Taja pen kita diachirka jauh ngagai sukut dunya, TUHAN Allah Taala kita deka ngempuruka kita, lalu mai kita pulai baru,

⁵ngambika kita tau bempu menua ti diuan aki ini kita kelia. Lalu Iya deka ngasuh kita lebih agi kaya-raja, sereta mayuh agi tubuh ari bala aki ini kita kelia.

⁶TUHAN Allah Taala kita deka meri ati ti ngasi ngagai kita enggau ngagai peturun kita, ngambika kita deka rinduka Iya enggau pengabis ati kita, lalu kita deka mengkang diau di menua nya.

⁷Iya deka nguingka semua sumpah nya ngagai munsuh kita ke begedi sereta merinsaka kita.

⁸Lalu kita deka ngasika Iya baru, sereta nitihka semua pesan Iya ti diberi aku ngagai kita sehari tu.

⁹TUHAN deka ngasuh kita kaya-raja dalam semua utai ti dikereja kita. Kita deka mayuh anak, enggau mayuh jelu tupi, lalu tanah kita deka mansutka mayuh asil. Iya deka gaga ati ngasuh kita kaya-raja, baka Iya ti udah gaga ati ngasuh aki ini kita kaya-raja,

¹⁰tang kita enda tau enda ngasika Iya, lalu nitihka semua adat Iya ti ditulis dalam Bup Adat Iya tu. Kita enda tau enda nguingka diri ngagai Iya enggau pengabis ati kita.

¹¹Ku Moses bejaku, “Pesan ti diberi aku ngagai kita sehari tu ukai utai ti kelalu mar dititihka kita, tauka enda ulih dijengkau kita.

¹² Iya ukai di langit din, lalu kita enda ibuh nanya, ‘Sapa deka niki ke atas lalu mai iya nurun ngagai kitai, ngambika kitai ulih ninga iya, lalu ngasika iya?’

¹³Iya ukai mega di seberai tasik ti besai. Nya alai kita enda ibuh nanya, ‘Sapa deka ngelayang tasik ti besai tu lalu mai iya ngagai kitai, ngambika kitai ulih ninga iya, lalu ngasika iya?’

¹⁴ Jaku nya semak kita. Iya diau dalam nyawa enggau dalam ati kita, ngambika kita ngasika iya.

¹⁵ Ku Moses bejaku, “Sehari tu aku ngasuh kita milih entara pemadas enggau penyai, entara pengidup enggau pemati.

¹⁶Enti kita ngasika pesan TUHAN Allah Taala kita, [26] ti diberi aku ngagai kita sehari tu, enti kita rinduka Iya, ngasika Iya, lalu nitihka semua adat Iya, nya baru kita deka bulih pengaya lalu nyadi bansa ti kering. TUHAN Allah Taala kita deka merekatka kita di menua ti baru deka diempu kita.

¹⁷Tang enti kita enda ngasi, lalu enggai mending, lalu dibai limpang besembahka petara bukai,

¹⁸kita deka dirusak. Aku meri jaku tangkan tu ngagai kita diatu: kita enda panjai umur nguan menua ti di seberai Sungai Jordan din, ti baru deka diempu kita.

¹⁹Aku diatu ngasuh kita milih entara pengidup enggau pemati, entara berekat enggau sumpah, lalu aku ngangauka langit enggau tanah nyadika saksi utai ti dipilih kita. Pilih pengidup.

²⁰ Rinduka TUHAN Allah Taala kita. Titihka Iya, lalu tetap ati arapka Iya. Nya baru kita enggau peturun kita deka gayu-guru nguan menua ti udah disemaya deka diberi Iya ngagai aki ini kita, Abraham, Isak, enggau Jakop.”