Read Iban Ulang Adat 31 Bible Online

Ulang Adat 31 - Iban bible

Ulang Adat 31

¹Lebuh Moses udah nyebut jaku nya ngagai semua orang Israel,

² iya lalu bejaku ngagai sida, ku iya, “Umur aku diatu nyau seratus dua puluh taun, lalu aku enda ulih nyadi tuai kita agi. Nambahka nya, TUHAN udah madahka aku enda tau meraka Sungai Jordan.

³TUHAN Allah Taala kita deka meraka dulu ari kita, lalu ngerusak bansa orang ke diau dia, lalu kita deka ngalahka menua sida. Lalu Josua deka nyadi tuai kita, munyi ti udah disemaya TUHAN.

⁴ TUHAN deka ngerusak bansa orang nya, baka Iya ti ngalahka Sihon seduai Og, raja orang Amor, lalu ngerusak menua sida.

⁵TUHAN deka ngasuh kita menang ngelaban sida, lalu kita enda tau enda ngereja ngagai sida nitihka pesan ti diberi aku ngagai kita.

⁶Kita enda tau enda kering sereta berani. Anang takutka sida. TUHAN Allah Taala kita, deka bejalai enggau kita. Iya enda ngasuh kita lebu ngapa, tauka ninggalka kita.”

⁷Udah nya Moses ngangauka Josua, lalu bejaku enggau iya di mua semua orang Israel, “Nuan enda tau enda kering sereta berani, laban nuan deka bejalai enggau orang tu ngagai menua ti udah disemaya TUHAN ngagai aki ini sida, deka diberi Iya ngagai sida; lalu nuan deka meri menua nya ngagai sida.

⁸ TUHAN Empu deka bejalai dulu ari kita. Iya deka meruan enggau kita. Iya enda ngasuh kita lebu ngapa, tauka ninggalka kita. Nya alai anang takut tauka lemi semengat.”

⁹Udah nya Moses nuliska semua Adat nya, lalu meri Adat nya ngagai bala imam Lewi ke ngesan Peti Lampang Batu Adat TUHAN, enggau ngagai bala tuai orang Israel.

¹⁰ Ku Moses bejaku enggau sida, “Ba genap ujung taun ti ketujuh, lebuh gawai belangkau,

¹¹lebuh semua orang Israel datai nyembah TUHAN Allah Taala kita ba siti endur ti deka dipilih Iya, bacha Adat tu enggau nyawa ti inggar ngagai orang Israel.

¹²Gempuruka semua lelaki, indu, nembiak, enggau orang kampar ti diau dalam nengeri kita, ngambika semua sida ulih ninga Adat nya dibacha, lalu belajar nangika TUHAN Allah Taala kita, sereta tetap ati ngasika Adat nya.

¹³Nya meh jalai peturun kita, ti enda nemu Adat nya, ulih ninga lalu belajar nangika TUHAN Allah Taala kita seumur idup di menua ti baru deka diempu kita di seberai Sungai Jordan.”

¹⁴Udah nya TUHAN bejaku ngagai Moses, “Nuan enda lama agi idup. Kangauka Josua, lalu bai iya ngagai Langkau Kain TUHAN, ngambika Aku meri iya pengawa.” Moses seduai Josua lalu mansang ngagai Langkau Kain TUHAN.

¹⁵TUHAN lalu pegari di mua seduai iya dalam gentilang remang ti bediri ngimbai pintu Langkau Kain nya.

¹⁶TUHAN lalu bejaku ngagai Moses, “Enda lama da agi nuan deka mati. Orang tu deka nyembah petara orang bansa bukai di menua ti deka digagai sida. Sida deka ninggalka Aku, ngelanggar sempekat ti udah digaga Aku enggau sida.

¹⁷Aku deka ringat ngagai sida lebuh maya nya ila. Aku deka ninggalka sida, lalu ngelalaika mua Aku ari sida; sida deka mudah dialahka munsuh, lalu mayuh macham penusah ti besai deka ninggang sida. Lebuh maya nya ila sida deka nyebut, ‘Penusah tu ninggang kitai, laban TUHAN nadai enggau kitai, ukai enda?’

¹⁸Lebuh maya nya ila, Aku deka ngelalaika mua Aku ari sida ketegal semua penyai ti dikereja sida laban sida nguingka diri ngagai petara bukai.

¹⁹Nya alai, tuliska lagu tu, lalu ajar iya ngagai orang Israel; simpan lagu tu ngagai mulut sida, ngambika lagu tu nyadika saksi kena ngelaban sida.

²⁰Laban lebuh Aku udah mai sida ngagai menua ti kaya sereta ami nya, munyi ti udah disemaya Aku ngagai aki ini sida, lalu sida udah kenyang lalu gemu, sida deka nguing lalu nyembah petara bukai, lalu ngeleseka Aku, sereta ngelanggar sempekat Aku.

²¹Lalu lebuh mayuh penusah ti besai ninggang sida, lagu tu deka nyadika saksi kena ngelaban sida, laban lagu tu deka mengkang dalam mulut peturun sida. Indah diatu deh Aku nemu utai ti deka dikereja sida, sebedau Aku mai sida ngagai menua ti udah disemaya Aku ngena sumpah, ti deka diberi Aku ngagai sida.”

²²Sehari nya Moses lalu nuliska leka lagu nya, lalu ngajar lagu nya ngagai orang Israel.

²³ Udah nya TUHAN lalu meri Josua anak Nun pengawa, lalu bejaku, “Nuan enda tau enda kering sereta berani; laban nuan deka mai orang Israel mansang ngagai menua ti udah disemaya Aku ngagai sida; Aku deka meruan enggau nuan.”

²⁴Lebuh Moses udah tembu nuliska Adat Allah Taala dalam siti bup nyentuk ke ujung,

²⁵Moses lalu bejaku ngagai orang Lewi ke ngesan Peti Lampang Batu Adat TUHAN,

²⁶ku iya, “Bai Bup Adat tu, lalu engkahka iya ngimbai Peti Lampang Batu Adat TUHAN Allah Taala kita; awakka bup nya meruan dia nyadika saksi kena ngelaban kita.

²⁷Laban aku nemu kita seruran deka ngelaban, lalu aku nemu kita endang kieh. Enti kita seruran deka ngelaban TUHAN lebuh aku agi idup begulai enggau kita, baka ni ku gaya kita lebuh aku udah mati!

²⁸Gempuruka semua tuai raban bansa kita, enggau bala pemesai kita di mua aku, ngambika aku ulih madahka jaku tu ngagai sida, lalu ngangauka langit enggau tanah nyadika saksi kena ngelaban sida.

²⁹Laban aku nemu, lebuh aku udah mati, kita deka ngereja penyai, limpang ari pesan ti udah diberi aku ngagai kita. Jemah ila penusah ti besai deka ninggang kita, laban kita deka ngereja penyai di mua TUHAN, nyungkak Iya ringat ngena utai ti digaga jari kita.”

³⁰Udah nya Moses lalu nyebut semua leka lagu nya, nyentuk ke ujung, lalu semua orang Israel bela mendingka iya: