Read Iban Ulang Adat 32 Bible Online

Ulang Adat 32 - Iban bible

Ulang Adat 32

¹“Pendingka aku, langit, laban aku deka bejaku; awakka tanah ninga jaku ti disebut aku.

²Awakka jaku ajar aku labuh baka ujan, awakka jaku aku nurun baka ambun, baka ai ujan ti beberis ninggang rumput, baka ujan ti lebat ninggang rumput ti baru udah tumbuh.

³Laban aku deka muji nama TUHAN, lalu bala nembiak Iya deka madahka pemesai kuasa Iya.

⁴“TUHAN nya meh penyaga kita ke kering, lalu semua jalai Iya endang lurus magang. Allah Taala ti tetap ati, enda nipu. Iya ngereja utai ti ngena sereta lurus.

⁵Tang bala anak Iya ti jai, udah bulaka Iya, [27] bansa ti bedosa, ti penipu.

⁶Kati nya jalai kita malas pemanah TUHAN, O kita ke beli, ke nadai nemu utai? Kati Iya ukai Apai kita, ti udah ngaga kita, ti udah nirika kita nyadi siti bansa?

⁷“Kingatka utai ti udah nyadi kelia menya; tanyaka ngagai apai kita, lalu iya deka madahka ngagai kita; tanyaka ngagai bala tuai bansa kita, lalu sida deka nusui ngagai kita.

⁸ Lebuh Iya ti Pemadu Tinggi udah meri menua ngagai genap bengkah bansa, lebuh Iya magi bansa mensia, Iya ngeletak garis entara menua ke siti-siti bansa nitihka pemayuh petara sida;

⁹Tang TUHAN milih peturun Jakop ke Iya Empu.

¹⁰“Iya tetemuka sida segau-segau di menua puang, menua puang ti balat dipuputka ribut. Iya ngelindung sida, ngibun sida, nyaga sida laban Iya balat rinduka sida.

¹¹Baka menaul ti ngajar anak iya terebai, [28] lalu terebai enda mindah ari atas sida; Iya ngerembaika sayap iya, lalu mai sida ke atas, lalu nyambut sida ngena belakang iya.

¹²TUHAN siku aja ke nguluka bala nembiak Iya; nadai petara orang bansa bukai nulung Iya.

¹³“Iya ngasuh sida merintah di menua ti bebukit, lalu nupi sida ngena utai ti tumbuh ba umai; Iya nupi sida ngena ai manyi ari sebelah selikap batu, ngena minyak ari kayu kana ti tumbuh galak ba tanah ti bebatu.

¹⁴Iya nupi sida ngena ai tusu sapi ti meku, enggau ngena ai tusu kambin, ngena lemak anak domba enggau lemak bedus ti lelaki; Iya nupi sida ngena sapi ti lelaki enggau kambin ari Basan, ngena gandum ti pemadu alus, enggau ngena wain ti pemadu manah ari kebun anggur sida.

¹⁵“Bala nembiak TUHAN nyadi kaya-raja, tang sida seruran deka ngelaban. Sida gemu, gentung perut, seruran kenyang. Sida ninggalka Allah Taala ti udah ngaga sida lalu nulak Penebus sida ke kering.

¹⁶Pengawa sida ke besembahka engkeramba, nyungkak TUHAN ninding. TUHAN ringat ketegal engkeramba sida.

¹⁷ Sida ngenjuk piring ngagai antu, ukai ngagai Allah Taala, ngagai bala petara ti nadai kala ditemu sida, bala petara ti baru, ti nadai kala dikenangika aki ini sida.

¹⁸Sida enda agi ingatka Allah Taala sida, Penebus sida ke kering, ti udah meri sida pengidup.

¹⁹Lebuh TUHAN meda nya, Iya ringat lalu nulak bala anak lelaki enggau bala anak indu Iya.

²⁰Ku Iya bejaku, ‘Aku deka ngelalaika mua Aku ari sida. Aku deka meda pengujung sida, laban orang tu jai, sereta enda tetap ati.

²¹ Sida udah nyungkak Aku chemburu[29] laban sida nyembah utai ti ukai petara, nyungkak Aku ringat ketegal engkeramba sida. Nya alai Aku deka ngasuh sida ringat ngena siti bansa. Aku deka ngasuh sida chemburu[30] ngena siti bansa ti beli.

²²Pengeringat Aku deka mau baka api lalu nunu semua utai di dunya tu, nyentuk ngagai dunya ti di baruh [31] lalu nganguska pugu bukit.

²³“ ‘Aku deka ngasuh sida betangkan-tangkan ditinggang penusah ti besai, lalu nimbakka semua panah Aku ngelaban sida.

²⁴Sida deka mati lapar, sereta mati laban penyakit chelap-angat, enggau laban penyakit ti balat. Aku deka ngirumka jelu babas ngelaban sida, sereta ngasuh ular ti bisa mantuk sida.

²⁵Ba sebelah jalai raya, pedang deka mantap lalu munuh sida, lalu dalam rumah, orang ke bujang enggau orang ke dara, anak mit enggau orang ke tuai deka mati laban kelalu balat takut.

²⁶Aku bisi ati deka ngachirka sida, ngambika orang nadai agi ingatka sida;

²⁷Tang Aku enggai ke munsuh sida temegah, enggai ke munsuh sida salah sangka lalu nyebut, ‘Kitai menang; TUHAN Empu ti ngereja semua nya.’

²⁸“Israel nya bansa ti enda nemu berunding. Sida enda mereti.

²⁹Enti sida nya orang ke bepenemu-dalam, sida ulih meretika tu; sida tentu nemu namaka penyadi sida.

³⁰Baka ni ku siku munsuh ulih ngalahka seribu iku, lalu dua iku munsuh ulih ngalahka sepuluh ribu iku, enti TUHAN Allah Taala sida nadai udah nyual sida ngagai munsuh, enti TUHAN nadai udah ngelengkaka sida?

³¹Petara sida enda baka Allah Taala kitai; Munsuh kitai beli.

³²Munsuh kitai jai baka Sodom enggau Gomorah, buah anggur sida bisi rachun, tangkai anggur sida pait;

³³wain sida digaga ari rachun ular.

³⁴Ku TUHAN bejaku, “Utai ti deka dikereja Aku ngagai orang Israel enggau ngagai munsuh sida, sigi enda dipadahka Aku.

³⁵ Laban maya Aku malas sereta ngukum deka datai enda lama da agi; laban maya sida deka kena laban penusah ti besai nyau semak, maya sida dirusak deka datai enggau jampat.

³⁶ TUHAN deka sinu ati ke nembiak Iya, lalu ngumbai sida nadai penyalah, lebuh Iya meda sida nadai kuasa agi, sereta abis mati, nemuka sida nya ulun tauka ukai ulun.

³⁷Udah nya TUHAN deka nanya bala nembiak Iya, ‘Kini ke tunga bala petara ti kering nya ti alai kita manggaika diri,

³⁸ke makai lemak ari piring kita, lalu ngirup wain ti diberi nyadika genselan sida? Awakka sida datai nyaup kita diatu. Awakka sida datai lalu nyaga kita.

³⁹“ ‘Semina Aku aja ti Allah Taala. Kita nadai petara bukai tang semina Aku aja. Aku munuh, lalu Aku mega ngidup; Aku ngemakal, lalu Aku mega nyuman; Nadai orang ulih ngelepaska orang ari jari Aku.

⁴⁰Laban Aku tu Allah Taala ti idup belama iya, Aku ngedarka jari Aku lalu besumpah,

⁴¹lebuh Aku ngansah pedang Aku ti bekilap, lalu nentuka atur ti lurus tu dikena; Aku deka malas munsuh Aku, lalu ngukum orang ke begedika Aku.

⁴²Panah Aku deka neritik darah, lalu pedang Aku deka munuh semua orang ke ngelaban Aku. Aku enda ngalau orang ke beperang ngelaban Aku; Indah orang ke bakal enggau orang tangkap deh deka dibunuh.

⁴³ Ku Moses bejaku, “Puji meh bala nembiak TUHAN, semua kita bansa bukai. Sembah meh TUHAN, semua kita petara! Laban Iya deka bebalaska nyawa bala nembiak Iya, lalu malas semua munsuh Iya; Iya deka mayar orang ke begedika Iya, lalu nuchi [32] menua nembiak Iya ari penyai ti datai ari dosa sida.

⁴⁴Moses seduai Josua anak Nun lalu nyebut leka lagu tu di mua semua orang Israel, ngambika sida ninga.

⁴⁵Lebuh Moses udah tembu nyebut leka lagu nya ngagai semua orang Israel,

⁴⁶iya lalu bejaku ngagai sida, “Kingatka semua leka lagu tu ti nyadika saksi kena ngelaban kita sehari tu; beri pesan nya ngagai anak kita, ngambika sida nitihka semua leka jaku ti dalam adat tu enggau ati ti tetap.

⁴⁷Jaku tu ukai jaku ngapa, tang pengidup kita; enti kita nitihka jaku tu, kita deka panjai umur nguan menua di seberai Sungai Jordan ti baru deka diempu kita.”

⁴⁸ Ba hari nya mega TUHAN bejaku ngagai Moses munyi tu:

⁴⁹“Alai nuan niki ngagai Bukit Nebo ba gerinjing Bukit Abarim di menua Moap, di seberai nengeri Jeriko, lalu tinjau menua Kanaan ti baru deka diberi Aku ngagai orang Israel.

⁵⁰Nuan deka mati ba bukit ti ditiki nuan nya, baka menyadi nuan Aron ti mati ba Bukit Hor;

⁵¹laban seduai udah sama enda tetap ati ngagai Aku di mua orang Israel, lebuh kita ba ai Meribah, semak nengeri Kades, di menua puang Sin, laban seduai enda bebasaka pengudus Aku di mua orang Israel.

⁵²Taja pen nuan ulih ninjau menua nya ari jauh, tang nuan enda tau tama ngagai menua nya, menua ti diberi Aku ngagai orang Israel.”