Read Iban Ulang Adat 33 Bible Online

Ulang Adat 33 - Iban bible

Ulang Adat 33

¹Tu berekat ti disebut nabi Moses ngagai orang Israel sebedau iya mati.

²Ku iya bejaku: “TUHAN datai ari Bukit Sinai mansang nulung nembiak Iya; Iya angkat baka penumbuh mata hari lalu manchar ngagai nembiak Iya ari Edom. Lalu penampak Iya manchar ari Bukit Paran. Beribu-ribu iku melikat datai enggau Iya, lalu kilat nyelar ari jari kanan Iya.

³TUHAN rinduka nembiak Iya. [33] lalu nyaga orang ke diempu Iya. Nya alai kitai meremi di [34] kaki Iya lalu ngasika pesan Iya.

⁴Lebuh semua orang Israel begempuru, Aku meri kita Adat Allah Taala, pesaka ti pemadu dikesayauka bansa kitai. Udah nya TUHAN lalu nyadi raja orang Israel.

⁶Awakka raban bansa Reuben enda abis, taja pen sida enda mayuh tubuh.

⁷Tu utai ti disebut iya pasal raban bansa Judah: “O TUHAN, pendingka Judah, lalu bai iya ngagai bansa iya empu; Asuh jari iya kering, lalu saup iya ngelaban munsuh iya.

⁸ Lalu ku iya bejakuka pasal raban bansa Lewi: “Pandangka ngagai orang Lewi peneka Nuan TUHAN ngena Urim enggau Tumim [35] ngagai bala nembiak Nuan ke taluk ngagai Nuan, ti udah diabas Nuan ati di Masah, ti udah ngelaban Nuan ba ai di Meribah;

⁹ke madahka diri lebih agi taluk ngagai Nuan ari sida ke taluk ngagai apai indai, menyadi, tauka anak sida. Laban sida nitihka pesan Nuan, lalu tetap ati ngagai sempekat Nuan.

¹⁰Sida ngajar Jakop atur Nuan, lalu ngajar orang Israel Adat Nuan, Sida ngengkahka menyan di mua Nuan, enggau piring tunu segala ba alta Nuan.

¹¹O TUHAN, berekatka raban bansa tu, lalu sambut meh semua utai ti dikereja sida; Rusak semua munsuh sida, orang ke begedika sida, ngambika munsuh nya enda angkat agi.

¹²Ba pasal raban bansa Benjamin, iya nyebut: “Tu meh raban bansa ti dikerinduka sereta dijaga TUHAN. Iya nyaga sida siang malam, Lalu Iya diau begulai enggau sida.

¹³Ba pasal raban bansa Josep, iya nyebut: “Awakka TUHAN merekatka menua sida ngena ujan Enggau ngena ai ti datai ari dalam tanah;

¹⁴ngena buah ti pemadu manah ti mansau laban mata hari, enggau ngena buah ti pemadu manah genap musin;

¹⁵ngena asil ti pemadu manah ari bukit ti tuai, enggau ari asil ti pemadu mayuh ari munggu ti meruan belama iya;

¹⁶ngena semua pemeri ti pemadu manah ari tanah, enggau ngena pengasih Iya ti diau ba Bukit Sinai. Awakka semua berekat nya diberi ngagai Josep, ba kening iya ti udah nyadi raja ke semua bala menyadi iya.

¹⁷Josep kering baka sapi ti lelaki ti pengabis dulu ada, bisi tanduk baka sapi ti siga, ti dikena iya nanduk bansa bukai ngagai ujung dunya; baka nya ku utai ti dikereja bepuluh ribu iku peturun Epraim, enggau beribu iku peturun Manasi.

¹⁸Ba pasal raban bansa Sebulun enggau raban bansa Isakar, iya nyebut: “Awakka Sebulun kaya-raja bedagang di tasik, Lalu awakka pengaya Isakar nambah-menambah di menua.

¹⁹Sida mai orang bansa bukai ngagai bukit sida Lalu dia sida ngenjuk piring ti ngena. Sida bulih pengaya ari tasik Enggau ari pasir ti ba tebing tasik.

²⁰Ba pasal raban bansa Gat, iya nyebut: “Pujika Allah Taala, ti udah ngerembaika rampa menua sida. Gat diau baka singa; iya nyarikka lengan tauka kulit pala.

²¹Iya ngambi menua ti pemadu manah ke iya empu, laban nya endang ungkup ke orang ke nyadi tuai; iya nguluka bala nembiak iya, iya bejalaika atur ti lurus ari TUHAN enggau adat ti diberi TUHAN ngagai orang Israel.

²²Ba pasal raban bansa Dan, iya nyebut: “Dan tu singa ti agi biak, ti merejuk pansut ari Basan.

²³Ba pasal raban bansa Naptali, iya nyebut: “Naptali ke dikerindu sereta diberekatka TUHAN, deka bempu menua ti tunga ke barat enggau ke selatan menua kita.

²⁴Ba pasal raban bansa Aser, iya nyebut: “Aser diberi mayuh agi berekat ari sida menyadi ti bukai; Awakka iya mengkang lebih agi dikerinduka Allah Taala ari bala menyadi iya, Lalu awakka menua iya penuh laban kayu kana.

²⁵Awakka nengeri iya dijaga ngena pintu besi, Lalu awakka iya diau likun sepemanjai umur iya.

²⁶O kita orang Israel! Nadai petara ti baka Allah Taala kita, ke bejalai nengah langit mansang nyaup kita, ke bemulia bejalai nengah langit.

²⁷Iya ngalahka petara ti lama, nganchurka semua kuasa ti lama; Iya muru munsuh kita lebuh kita majakka pejalai kita, lalu bejaku, ‘Rusak sida!’

²⁸Nya alai peturun Jakop diau likun nadai utai ngachau, di menua ti penuh laban gandum enggau wain, alai ambun ti datai ari langit ngemasahka tanah.

²⁹O Israel! Naka meh pengelantang ati kita! Nadai orang ti baka kita, bansa ti diselamatka TUHAN ti nyadi terabai kena nyaup kita, ti nyadi pedang ti meri kita pemenang. Bala munsuh kita deka datai minta kasih ngagai kita, lalu kita deka ngindik belakang sida.