Read Iban Ulang Adat 34 Bible Online

Ulang Adat 34 - Iban bible

Ulang Adat 34

¹Udah nya Moses angkat ari emperan menua Moap, lalu niki ngagai Bukit Nebo, ngagai tuchung Bukit Pisgah tunga ke timur nengeri Jeriko. Dia TUHAN lalu mandangka ngagai iya semua menua nya: menua Giliat nyentuk ngagai nengeri Dan di utara,

²semua menua Naptali, menua Epraim enggau menua Manasi, menua Judah nyentuk ngagai Tasik Tengah di barat,

³sitak selatan menua Judah, enggau emperan ti nganchau berengkah ari Soar nyentuk ngagai Jeriko, iya nya nengeri ti mayuh kayu engkerema.

⁴ Ku TUHAN bejaku ngagai iya, “Tu meh menua ti udah disemaya Aku ngagai Abraham, Isak enggau Jakop, ti deka diberi Aku ngagai peturun sida. Aku udah nejuka nuan meda menua nya ngena mata nuan empu, tang nuan enda tau meraka ngagai menua nya.”

⁵Udah nya Moses, ti ulun TUHAN, mati dia di menua Moap, munyi ti udah dipadahka TUHAN.

⁶TUHAN lalu nguburka iya ba siti lebak di menua Moap, seberai nengeri Bet-peor. Tang nyentuk ngagai sehari tu, nadai orang nemu endur alai kubur iya.

⁷Umur Moses 120 taun lebuh iya mati. Iya mengkang kering baka selama, lalu mata iya agi lansik.

⁸Orang Israel ngulitka iya tiga puluh hari ba emperan menua Moap. Udah nya sida badu agi ngulitka iya.

⁹Josua anak Nun penuh laban penemu-dalam, laban Moses udah ngengkahka jari iya atas iya; nya alai orang Israel ngasika Josua, lalu ngereja utai ti udah dipesanka TUHAN ngagai Moses.

¹⁰ Nadai nabi udah bisi kala baka Moses di menua Israel, ke bejaku betunga mua enggau TUHAN.

¹¹Nadai nabi bukai bisi udah kala ngereja kereja ajih enggau kereja ti nyelai baka ke diasuh TUHAN kereja Moses kena ngelaban raja menua Ejip, ngelaban bala pemesai enggau semua menua nya.

¹²Nadai nabi bukai udah ulih ngereja utai ti besai, ti balat ngenakutka ati, baka ke dikereja Moses di mua semua orang Israel.