Read Iban Ulang Adat 5 Bible Online

Ulang Adat 5 - Iban bible

Ulang Adat 5

¹Moses ngempuruka semua orang Israel, lalu bejaku ngagai sida, ku iya, “O orang Israel, pendingka semua adat ti diberi aku ngagai kita sehari tu. Pelajar lalu titihka adat nya enggau ati ti tetap.

²TUHAN Allah Taala kitai udah ngaga siti sempekat enggau kitai ba Bukit Sinai.

³Iya ukai ngaga sempekat nya enggau bala aki ini kitai, tang enggau semua kitai ke idup diatu.

⁴TUHAN bejaku betunga mua enggau kita ba bukit nya, ari dalam api,

⁵lebuh aku bediri entara TUHAN enggau kita lebuh maya nya suba, lalu madahka jaku TUHAN ngagai kita; laban kita takutka api nya, lalu kita enda niki ngagai bukit nya. Ku Iya bejaku:

⁶“ ‘Aku tu TUHAN Allah Taala kita, ti udah mai kita pansut ari menua Ejip, alai kita ke udah nyadi ulun.

⁷“ ‘Anang nyembah petara bukai tang semina Aku siku aja.[6]

⁸ “ ‘Anang ngaga engkeramba ke diri empu neladan gamal utai ti di langit tauka di tanah, tauka dalam ai ti di baruh tanah.

⁹ Anang meremi ngagai sida tauka nyembah sida; laban Aku tu TUHAN Allah Taala ti chemburu.[7] Aku ngukum tiris-pantis[8] orang ke begedika Aku datai ke ketiga enggau keempat serak peturun sida,

¹⁰tang ngayanka pengerindu ti enda berubah ngagai beribu serak[9] orang ke rinduka Aku, sereta ngasika pesan Aku.

¹¹ “ ‘Anang empelita ngena nama TUHAN ti Allah Taala kita, laban TUHAN deka ngukum orang ke empelita ngena nama Iya.

¹² “ ‘Intu Hari Sabat, lalu intu hari nya kudus, munyi ti udah dipesanka TUHAN Allah Taala kita, ngagai kita.

¹³ Kita gawa enam hari,

¹⁴tang hari ti ketujuh nya Hari Sabat ti diserahka ngagai TUHAN Allah Taala kita. Ba hari nya kita enda tau gawa, nemuka kita empu, tauka anak lelaki, tauka anak indu, tauka ulun kita ke lelaki, tauka ulun kita ke indu, tauka jelu sapi kita, tauka keledai, tauka jelu tupi kita, tauka orang ke diau enggau kita, ngambika ulun kita ke lelaki enggau ulun kita ke indu, sereta enggau kita empu, belelak.

¹⁵Kingatka diri ti udah nyadi ulun di menua Ejip, lalu TUHAN Allah Taala kita udah mai kita pansut ari menua nya ngena pemesai kuasa enggau pengering Iya. Nya kebuah TUHAN Allah Taala kita ngasuh kita ngintu Hari Sabat.

¹⁶ “ ‘Bebasaka apai indai kita nitihka pesan TUHAN Allah Taala kita, ngambika kita panjai umur sereta mujur nguan menua ti diberi TUHAN Allah Taala kita, ngagai kita.

¹⁷ “ ‘Anang munuh orang.

¹⁸ “ ‘Anang butang.

¹⁹ “ ‘Anang ngenchuri.

²⁰ “ ‘Anang besaksi bula ngelaban orang.

²¹ “ ‘Anang inginka bini orang, tauka rumah orang, tauka tanah, ulun, jelu sapi, keledai, tauka sebarang utai orang.’

²² “Nya meh leka jaku ti disebut TUHAN enggau nyawa ti inggar ngagai semua kita ba bukit nya, ari dalam api, ari dalam mua hari, enggau ari dalam pemetang ti enda dipeda achuk mata. Iya nadai nyebut leka jaku bukai. Lalu Iya nuliska semua leka jaku nya ba dua iti lampang batu, lalu meri lampang batu nya ngagai aku.

²³“Lebuh kita ninga munyi nyawa nya bejaku ari dalam petang, lebuh bukit nya diempa api, kita, semua kepala raban bansa kita, enggau bala tuai kita lalu datai semak ngagai aku;

²⁴lalu ku kita bejaku, ‘TUHAN Allah Taala kitai udah ngayanka ngagai kitai mulia enggau pemesai kuasa Iya, lalu kitai udah ninga munyi nyawa Iya bejaku ari dalam api; sehari tu kitai udah meda Allah Taala bejaku enggau mensia, lalu mensia agi mengkang idup.

²⁵Nya alai, nama kebuah kitai patut mati? Laban api ti balat nya deka ngerusak kitai; enti kitai ninga munyi nyawa TUHAN Allah Taala kitai, kitai tetap mati.

²⁶Laban sapa udah kala ninga munyi nyawa Allah Taala ti idup bejaku ari dalam api, baka ke didinga kitai, lalu agi mengkang idup?

²⁷Alai nuan empu mansang semak kin, lalu mendingka semua utai ti disebut Allah Taala. Udah nya padahka ngagai kami utai ti disebut Iya ngagai nuan, lalu kami deka mending lalu ngasi.’

²⁸“TUHAN ninga jaku kita, lebuh kita bejaku ngagai aku; lalu ku TUHAN bejaku ngagai aku, ‘Aku udah ninga jaku orang tu, ti disebut sida ngagai nuan; sida endang nyebut utai ti ngena.

²⁹Naka meh pemanah enti sida berunding baka nya berari, nangika Aku sereta ngasika semua pesan Aku, ngambika sida enggau anak uchu sida mujur belama iya!

³⁰Alai asuh sida pulai ngagai langkau kain sida.

³¹Tang nuan, Moses, Aku ngasuh nuan bediri ditu enggau Aku, laban Aku deka madahka ngagai nuan semua adat enggau pesan Aku, ti deka diajar nuan ngagai sida, ngambika sida ngasika semua adat enggau pesan nya di menua ti diberi Aku ngagai sida.’

³²“Nya alai kita enda tau enda ngereja semua utai ti udah dipesanka TUHAN Allah Taala kita ngagai kita. Anang limpang ke kiba tauka ke kanan.

³³Kita enda tau enda idup nitihka jalai ti udah dipesanka TUHAN Allah Taala kita ngagai kita, ngambika kita idup, sereta mujur, lalu gayu-guru nguan menua ti diempu kita.