Read Iban Ulang Adat 6 Bible Online

Ulang Adat 6 - Iban bible

Ulang Adat 6

¹“Nya meh adat ti diasuh TUHAN Allah Taala kita ajar aku ngagai kita. Titihka semua adat nya di menua ti deka digagai lalu dialahka kita;

²ngambika kita enggau anak uchu kita nangika TUHAN Allah Taala kita sepemanjai umur kita, lalu ngasika semua adat enggau pesan Iya, ti dipadahka aku ngagai kita, ngambika kita panjai umur.

³Nya alai, pendingka semua adat enggau pesan nya, kita orang Israel, lalu ngasi; ngambika kita mujur, lalu pemayuh tubuh kita nambah-menambah di menua ti kaya sereta ami, munyi ti udah disemaya TUHAN Allah Taala aki ini kita, ngagai kita.

⁴ “Dinga, kita orang Israel! TUHAN Allah Taala kita endang siku aja;

⁵ lalu kita enda tau enda rinduka TUHAN Allah Taala kita enggau pengabis ati kita, enggau pengabis semengat kita, enggau pengabis pengering kita.

⁶ Kingatka pesan ti diberi aku ngagai kita sehari tu.

⁷Ajar pesan nya ngagai anak kita. Kita enda tau enda betanduka pesan nya lebuh kita di rumah, enggau lebuh kita bejalai kebukai, lebuh kita belelak, enggau lebuh kita gawa.

⁸Tuliska sida lalu tanchangka ba lengan kita. Lekatka sida ba kening kita kena kita ngingatka sida.

⁹Tuliska sida ba tiang pintu rumah kita, enggau ba pintu kuta kita.

¹⁰ “Munyi ti udah disemaya TUHAN Allah Taala kita ngagai aki ini kita Abraham, Isak enggau Jakop, Iya deka meri ngagai kita menua ti bisi nengeri ti besai sereta kaya-raja, ti ukai digaga kita.

¹¹Rumah dia deka penuh laban utai ti manah, ti ukai disimpan kita empu, lalu bisi telaga ti ukai ditumbak kita, enggau kebun anggur enggau kebun kana ti ukai ditanam kita. Lebuh TUHAN mai kita ngagai menua nya, lalu semua utai ti deka diempa kita bisi magang,

¹²anang enda ingatka TUHAN ti udah mai kita pansut ari menua Ejip, alai kita ke udah nyadi ulun.

¹³ Kemesaika TUHAN Allah Taala kita. Sembah Iya siku aja, lalu gaga semaya kita atas nama Iya siku aja.

¹⁴Anang nyembah petara bukai, petara orang bansa bukai ke ngelingi kita.

¹⁵Enti kita nyembah petara bukai, TUHAN deka ringat ngagai kita baka api, lalu deka ngerusak semua kita, laban TUHAN Allah Taala, ti bisi enggau kita, nya Allah Taala ti chemburu.[10]

¹⁶ “Anang nguji TUHAN Allah Taala kita, baka ke udah dikereja kita di Masah.

¹⁷Kita enda tau enda ngasika semua adat ti udah diberi Iya ngagai kita.

¹⁸Kereja semua utai ti ngena sereta manah ti diasuh TUHAN. Nya baru semua utai ti dikereja kita deka mujur magang. Kita ulih ngerampas menua ti ami nya, ti udah disemaya TUHAN ngagai aki ini kita,

¹⁹lalu kita ulih muru munsuh kita, munyi ti udah disemaya Iya.

²⁰“Jemah ila anak kita deka nanya, ‘Nama kebuah TUHAN Allah Taala kitai ngasuh kitai ngasika semua adat nya?’

²¹Lalu kita deka madahka ngagai sida, ‘Kitai udah nyadi ulun raja menua Ejip, lalu TUHAN udah mai kitai pansut ari menua nya ngena pemesai kuasa Iya.

²²Lalu kami udah meda Iya ngereja kereja ajih, sereta ngereja utai ti ngenakutka, ngagai orang Ejip, enggau ngagai raja sida, enggau ngagai semua bala pemesai raja.

²³Iya udah mai kitai pansut ari menua Ejip, mai kitai kitu, lalu meri menua tu ngagai kitai, munyi ti udah disemaya Iya ngagai aki ini kitai.

²⁴Udah nya, TUHAN Allah Taala kitai lalu ngasuh kitai ngasika semua adat nya, lalu nangika Iya. Enti kitai ngereja nya, Iya deka seruran ngemataka bansa kitai, lalu ngasuh bansa kitai seruran kaya-raja.

²⁵Enti kitai tetap ati ngasika semua utai ti udah dipesanka Allah Taala ngagai kitai, Iya deka gaga ati ke kitai.’ [11]