Read Iban Ulang Adat 7 Bible Online

Ulang Adat 7 - Iban bible

Ulang Adat 7

¹ “Lebuh TUHAN Allah Taala kita mai kita ngagai menua ti deka dialahka kita, lalu muru mayuh bengkah bansa ari mua kita, orang Iti, orang Girgas, orang Amor, orang Kanaan, orang Peris, orang Ibi enggau orang Jebus, tujuh bengkah bansa ti mayuh agi tubuh sereta kering agi ari kita,

²lalu lebuh TUHAN Allah Taala kita nyerahka sida ngagai kita, lalu kita ngalahka sida, kita enda tau enda munuh semua sida. Kita enda tau begagaka sempekat enggau sida, tauka kasihka sida.

³Kita enda tau jadi enggau sida, lalu enda tau nejuka anak kita jadi enggau sida,

⁴laban sida deka mai anak kita limpang ari Aku, besembahka petara bukai. TUHAN deka ringat ngagai kita, lalu Iya deka tekala nya munuh kita.

⁵ Nya alai runtuhka alta sida, patahka tiang batu keramat sida. Tebang anak patung petara Aserah sida, lalu tunu semua engkeramba sida.

⁶ Laban kita tu orang ke kuduska TUHAN ti Allah Taala kita. TUHAN udah milih kita ari semua bansa di dunya tu, nyadika nembiak Iya.

⁷“TUHAN ukai rinduka kita lalu milih kita laban kita mayuh agi tubuh ari orang bansa bukai; kita tu bansa ti pemadu mit.

⁸Tang TUHAN rinduka kita, lalu deka ngamatka semaya ti udah digaga Iya enggau aki ini kita. Nya kebuah Iya mai kita pansut ngena pemesai pengering Iya, lalu nebus kita ari pengidup kita ke nyadi ulun raja menua Ejip.

⁹ Ingat: TUHAN Allah Taala kita endang siku aja. Ati Iya endang tetap. Iya deka ngingatka sempekat Iya, lalu ngayanka pengerindu Iya ti meruan belama iya ngagai beribu serak orang ke rinduka Iya, sereta ngasika pesan Iya,

¹⁰tang Iya deka ngukum orang ke begedika Iya; Iya enda lubah ngukum orang ke begedika Iya, Iya deka ngukum sida.

¹¹Nya alai, kita enda tau enda ngasika semua pesan, enggau adat enggau atur ti diasuh aku titihka kita sehari tu.

¹² “Enti kita mending lalu tetap ati ngasika pesan tu, nya baru TUHAN Allah Taala kita deka majak ingatka sempekat Iya enggau kita, lalu deka ngayanka pengerindu Iya ti enda berubah, munyi ti udah disemaya Iya ngagai aki ini kita.

¹³Iya deka rinduka kita, lalu merekatka kita, ngambika pemayuh tubuh kita nambah-menambah. Kita deka mayuh anak, lalu Iya deka merekatka umai kita, ngambika kita bulih gandum, wain, enggau minyak kana. Iya deka nambahka pemayuh jelu sapi enggau jelu bedus kita di menua ti udah disemaya Iya enggau aki ini kita, ti deka diberi Iya ngagai kita.

¹⁴Nadai bansa di dunya tu deka bulih mayuh agi berekat ari ti diberi Iya ngagai kita. Nadai siku kita, tauka jelu tupi kita, deka mandul.

¹⁵Lalu TUHAN deka muai semua penyakit kita; lalu nadai penyakit ti jai ti nyadi di menua Ejip, ti ditemu kita menya, deka nyerang kita, tang Iya deka ngasuh penyakit nya nyerang orang ke begedika kita.

¹⁶Lalu kita enda tau enda ngerusak semua bansa ti diserahka TUHAN Allah Taala kita ngagai jari kita, lalu anang kasihka sida. Lalu kita pen enda mega tau nyembah petara sida, laban utai nya deka manjuk kita.

¹⁷“Anang berunding ngumbai orang nya mayuh agi tubuh ari kita, lalu kita ngumbai diri enda ulih muru sida.

¹⁸Anang takutka sida. Kingatka utai ti udah dikereja TUHAN Allah Taala kita ngagai raja menua Ejip, enggau ngagai semua nembiak raja nya.

¹⁹Kingatka penyakit ti dipeda mata kita empu, kereja ajih enggau kereja ti nyelai, enggau pemesai kuasa enggau pengering ti dikena TUHAN Allah Taala kita mai kita pansut. Baka nya meh chara TUHAN Allah Taala kita deka ngerusak semua bansa ti diketakutka kita.

²⁰Nambahka nya, TUHAN ti Allah Taala kita deka ngasuh indu gamang nyerang sida, datai ke orang ke agi idup, ke belalai ari kita, abis mati.

²¹Anang takutka sida; laban TUHAN Allah Taala kita, Allah Taala ti bekuasa, ti balat diketakutka, bisi enggau kita.

²²Iya deka muru bansa orang nya mimit-mimit sekali, lebuh kita nyerang. Kita enda tau ngeluska semua sida sekali, enggai ke kita dikelingi kelalu mayuh jelu babas.

²³Tang TUHAN Allah Taala kita deka nyerahka sida ngagai jari kita, lalu ngasuh sida begau abis ati, datai ke sida dibunuh.

²⁴Lalu Iya deka nyerahka raja sida ngagai jari kita, lalu kita enda tau enda munuh sida. Nadai orang tan ngelaban kita. Kita deka munuh semua sida.

²⁵Tunu engkeramba sida. Anang inginka pirak tauka emas ti ba tubuh engkeramba nya, lalu anang ngambi utai nya ke kita empu, enggai ke kita dipanjuk utai nya; laban TUHAN begedika utai nya.

²⁶Lalu anang mai engkeramba nya ngagai rumah kita, enggai ke kita kena sumpah baka utai nya empu. Kita enda tau enda begedi sereta kejika utai nya; laban utai nya kena tinggang sumpah Allah Taala.