Read Iban Ulang Adat 9 Bible Online

Ulang Adat 9 - Iban bible

Ulang Adat 9

¹“Dingaka tu, kita orang Israel! Sehari tu kita baru deka meraka Sungai Jordan, lalu ngalahka menua ti diempu bansa orang ke kering sereta bekuasa agi ari kita. Nengeri sida besai, sereta bisi kuta ti nyentuk ke langit.

²Orang nya tinggi sereta kering, peturun orang Anakim. Kita nemu sapa sida nya. Sida nya orang ke udah dikenang orang munyi tu, ‘Sapa tan ngelaban orang Anakim?’

³Nya alai kita enda tau enda nemu sehari tu, TUHAN Allah Taala kita deka bejalai dulu ari kita baka api ti mau. Iya deka ngalahka sida lebuh kita nyerang sida, ngambika kita muru lalu munuh sida enggau naka penyampat, munyi ti udah disemaya TUHAN.

⁴“Lebuh TUHAN Allah Taala kita udah muru sida ari mua kita, anang bejaku dalam ati diri, ‘TUHAN udah mai aku kitu ngambika aku bempu menua tu, ketegal aku lurus’; Utai nya ukai baka nya: TUHAN muru semua bansa orang nya ari mua kita ketegal penyai sida.

⁵Kita deka ngerampas menua sida ukai ketegal pengelurus tauka pemanah ati kita, tang laban TUHAN Allah Taala kita muru sida ari mua kita ketegal penyai sida, enggau laban TUHAN deka ngamatka semaya ti digaga Iya enggau aki kita Abraham, Isak enggau Jakop.

⁶Kita enda tau enda nemu tu: TUHAN ukai meri menua ti manah tu ngagai kita ketegal pengelurus kita; laban kita tu bansa ti kieh.

⁷“Anang enda ingatka jalai kita udah nyungkak TUHAN Allah Taala kita ringat di menua puang. Kenyau ari maya kita pansut ari menua Ejip, nyentuk ngagai hari kita datai ditu, kita udah ngelaban TUHAN.

⁸Indah ba Bukit Sinai deh kita udah nyungkak TUHAN ringat, datai ke Iya nyau sedia deka munuh kita.

⁹ Lebuh aku niki ngagai bukit nya deka nerima lampang batu ti udah alai TUHAN nuliska sempekat entara Iya enggau kita, aku diau ba bukit nya empat puluh hari, empat puluh malam, nadai makai, nadai ngirup.

¹⁰Lalu TUHAN meri ngagai aku dua iti lampang batu nya ngagai aku, alai Iya ti udah nulis ngena jari Iya Empu, jaku ti udah disebut Iya ngagai kita ari dalam api lebuh kita begempuru ba bukit nya.

¹¹Ba pengujung empat puluh hari empat puluh malam nya, TUHAN meri ngagai aku lampang batu dua iti nya, iya nya lampang batu adat.

¹²“Udah nya TUHAN bejaku ngagai aku, ku Iya, ‘Angkat nuan, lalu nurun ari bukit tu enggau jampat, laban bala nembiak nuan, ti udah dibai nuan pansut ari menua Ejip, udah ngereja pengawa ti jai; sida udah limpang ari jalai Aku; sida udah ngaga engkeramba ke diri empu.’

¹³“Nambahka nya, TUHAN mega bejaku ngagai aku, ku Iya, ‘Aku nemu orang tu bansa ti kieh.

¹⁴Anang nguji nagang Aku. Aku deka munuh sida, ngambika sida enda agi dikingatka. Udah nya baru Aku deka ngasuh nuan nyadi apai ke siti bansa ti kering agi sereta mayuh agi tubuh ari sida.’

¹⁵“Ninga nya, aku nguing lalu nurun ari bukit nya, lebuh bukit nya mau laban api; aku mai lampang batu dua iti nya ba jari aku.

¹⁶Aku malik lalu tepedaka kita udah bedosa ngelaban TUHAN Allah Taala kita; kita udah ngaga engkeramba anak sapi ari emas ti diluluhka kita; kita jampat amat limpang ari jalai TUHAN.

¹⁷Aku lalu ngempaska dua iti lampang batu adat nya di mua kita, lalu mechahka lampang batu nya.

¹⁸Udah nya aku lalu ningkapka diri baru ba tanah di mua TUHAN empat puluh hari empat puluh malam baka ke dikereja aku dulu ari nya; aku nadai makai, nadai ngirup, ketegal semua dosa kita, laban kita udah ngereja utai ti jai di mua Iya, lalu udah nyungkak Iya ringat.

¹⁹ Aku takutka pengeringat TUHAN, laban Iya udah chukup pedis ati ngagai kita, datai ke Iya nyau deka munuh kita. Tang TUHAN mendingka aku baru lebuh maya nya.

²⁰TUHAN mega balat amat ringat ngagai Aron, datai ke Iya nyau deka munuh Aron. Aku lalu besampi mega ke Aron lebuh maya nya.

²¹Aku lalu ngambi utai dosa nya, anak sapi ti udah digaga kita, lalu nunu utai nya, mechahka iya, lalu nginsarka iya nyadi amau, lalu naburka amau nya ngagai ai sungai ti rarat ari bukit nya.

²² “Kita mega nyungkak TUHAN Allah Taala kita ringat lebuh kita di Taberah, di Masah, enggau di Kibrot-hataba.

²³ Lalu lebuh Iya ngasuh kita bejalai ari Kades-barnea, lalu ngasuh kita ngerampas menua ti diberi Iya ngagai kita, kita angkat ngelaban atur ti diberi TUHAN Allah Taala kita, lalu enda arapka Iya tauka ngasika jaku Iya.

²⁴Sekumbang aku ti udah nemu kita, kita endang seruran ngelaban TUHAN.

²⁵“Nya alai aku ningkapka diri ba tanah di mua TUHAN empat puluh hari empat puluh malam, laban TUHAN udah madahka Diri deka munuh kita.

²⁶Aku lalu besampi ngagai TUHAN, ku aku: ‘O TUHAN Allah Taala, anang munuh bala nembiak Nuan enggau pesaka Nuan tu, ti udah ditebus Nuan ngena pemesai kuasa Nuan, ti udah dibai Nuan pansut ari menua Ejip ngena pengering Nuan.

²⁷Kingatka nembiak Nuan Abraham, Isak enggau Jakop, lalu anang bedulika pengekieh, tauka penyai, tauka dosa orang tu,

²⁸enggai ke orang Ejip bejaku munyi tu, ‘Laban TUHAN enda ulih mai sida ngagai menua ti udah disemaya Iya ngagai sida, enggau laban Iya begedika sida, nya kebuah Iya mai sida ngagai menua puang lalu munuh sida.’

²⁹Laban orang tu endang nembiak enggau pesaka Nuan, ke dibai Nuan pansut ngena pemesai kuasa, enggau ngena jari Nuan.”