Read Iban John 1 Bible Online

John 1 - Iban bible

John 1

¹ Ba pun iya kelia, Jaku endang udah bisi. Jaku nya enggau Allah Taala, lalu Jaku nya endang Allah Taala.

²Iya endang enggau Allah Taala kenyau ari pun.

³ Semua utai digaga ulih Iya; enti nadai Iya, nadai utai ti udah digaga ulih digaga.

⁴ Dalam Iya bisi pengidup lalu pengidup nya meri penampak ngagai semua mensia.

⁵ Penampak nya manchar dalam pemetang, lalu pemetang enda ulih ngalahka iya.

⁶ Siku orang dikirumka Allah Taala. Nama iya John.

⁷John datai besaksika pasal penampak nya ngambika, ulih iya, semua orang tau arap.

⁸John empu ukai penampak, tang iya datai ngambika iya besaksika pasal penampak nya.

⁹ Penampak ti bendar ti meri penampak ngagai genap iku mensia, bisi datai ngagai dunya.

¹⁰Iya bisi di dunya, lalu dunya digaga ulih Iya. Tang taja pia, dunya enda ngelala Iya.

¹¹Iya datai ngagai menua Iya Empu, tang bansa Iya Empu enda nerima Iya.

¹² Tang semua orang ke nerima Iya, ke arapka nama Iya, diberi Iya kuasa nyadi anak Allah Taala,

¹³ ke diadaka Allah Taala, ukai diadaka mensia, tauka ulih peneka mensia.

¹⁴ Jaku nya nyadi mensia, lalu diau begulai enggau kitai, lalu kami udah meda mulia Iya, mulia Iya ke nyadi Anak Tunggal Apai, ke penuh laban pengasih enggau pemendar.

¹⁵ (John besaksika pasal Iya. Ku John ngangau, “Tu meh orang ke dikenang aku lebuh aku nyebut: ‘Iya ke datai dudi ari aku, besai agi ari aku, laban Iya endang udah bisi sebedau aku ada.’ ”)

¹⁶ Ulih pemesai pengasih Iya, semua kitai udah nerima pengasih ti nambah-menambah.

¹⁷ Adat amat udah diberi ulih Moses, tang pengasih enggau pemendar datai ulih Jesus Kristus.

¹⁸ Nadai orang udah kala meda Allah Taala. Semina Anak Tunggal Allah Taala, ke begulai enggau Apai, ke madahka pasal Apai.

¹⁹ Tu saksi John, lebuh orang Judah ngirumka sida imam enggau orang Lewi ari Jerusalem lalu nanya iya, “Sapa nuan tu?”

²⁰ John lalu ngaku, ukai besangkal, tang ngaku, “Aku ukai Kristus.”[1]

²¹ Sida lalu nanya iya, “Enti pia, kati nuan tu Elijah?” “Ukai,” ku John nyaut. “Kati nuan tu nabi nya?”[2] ku sida nanya. “Ukai,” ku iya nyaut.

²²Sida lalu nanya iya, “Sapa nuan tu deh? Padahka ngagai kami, ngambika kami bisi saut dibai ngagai orang ke ngirumka kami. Baka ni ku nuan madahka pasal diri empu?”

²³ Ku John bejaku, “Aku tu orang ke ngangau di menua puang: ‘Gaga jalai Tuhan rurus!’ munyi ti disebut nabi Isaiah.”

²⁴Nyadi bala seruan nya udah dikirumka orang Parisi.

²⁵Sida lalu nanya iya, “Enti pia, nama kebuah nuan maptisa orang, enti nuan ukai Kristus,[3] tauka ukai Elijah, tauka ukai nabi nya?”

²⁶ John lalu nyaut sida, “Aku maptisa ngena ai, tang ba bala kita bisi siku ke enda dikelala kita,

²⁷ke datai dudi ari aku. Indah muka tali kasut Iya deh aku enda tau.”

²⁸ Pekara tu nyadi di Betani, di seberai Sungai Jordan, alai John ke maptisa orang.

²⁹ Hari siti John tepedaka Jesus mansang ngagai iya, lalu ku John bejaku, “Peda kita, nyin Anak Domba Allah Taala, ke muai dosa dunya!

³⁰ Nya meh orang ke dikenang aku, ‘Siku orang deka datai dudi ari aku, ke besai agi ari aku, laban Iya endang udah bisi sebedau aku ada.’

³¹Aku empu enda ngelala Iya, tang tu meh kebuah aku datai lalu maptisa orang ngena ai, ngambika Iya dipandangka ngagai orang Israel.”

³² John lalu besaksi: “Aku meda Roh Kudus nurun ari serega[4] baka burung achang lalu meruan ba Iya.

³³Aku empu enda ngelala Iya; tang Allah Taala[5] ti ngasuh aku maptisa orang ngena ai, udah madahka ngagai aku, ‘Nuan deka meda Roh Kudus nurun lalu meruan ba orang siku; nya meh orang ke deka maptisa ngena Roh Kudus.’

³⁴Lalu aku empu udah meda Iya lalu aku besaksi madahka Iya nya Anak Allah Taala.”[6]

³⁵ Hari siti John bediri baru enggau dua iku ari sida murid iya,

³⁶lalu lebuh iya ngemataka Jesus mansa, iya lalu bejaku inggar, “Peda seduai! Nyin Anak Domba Allah Taala!”

³⁷Lebuh seduai iya ninga John nyebut nya, seduai iya lalu nitihka Jesus.

³⁸Lebuh Jesus nguing lalu tepedaka seduai iya nitihka Iya, Iya lalu bejaku ngagai seduai iya, “Nama utai digiga seduai?” Seduai iya lalu nyaut, “Rabbi,” (reti nya, Pengajar,) “dini alai Nuan diau?”

³⁹Jesus lalu nyaut seduai iya, “Aram kitai meda.” Sida datai ba endur alai Iya diau, lalu seduai iya diau enggau Iya sehari nya. Hari nyau udah pukul empat lemai.

⁴⁰ Siku ari seduai ke ninga John bejaku, lalu nitihka Jesus, nya Andrew, menyadi lelaki Simon Peter.

⁴¹ Andrew lalu ngiga menyadi lelaki iya Simon, lalu madah ngagai iya, “Kami udah tetemuka Messiah.” (Reti nya: Iya ke udah ditata; tauka Kristus).

⁴² Andrew lalu mai Simon ngagai Jesus. Jesus malik ngagai Simon, lalu bejaku, “Nama nuan Simon anak John, tang nuan deka dikumbai Kephas.” (Reti nya Peter)[7]

⁴³ Hari siti Jesus mutuska runding deka mupuk ngagai Galili. Iya tetemuka Philip, lalu bejaku ngagai iya, “Titihka Aku!”

⁴⁴Penatai asal Philip nya ari Betsaida, nengeri Andrew seduai Peter.

⁴⁵ Philip tetemuka Natanel, lalu madah ngagai iya, “Kami udah tetemuka orang siku ke dikenang Moses dalam Bup Adat enggau ditulis sida nabi, Jesus anak Josep, ari Nasaret.”

⁴⁶ Natanel lalu bejaku enggau Philip, “Kati utai ti badas ulih datai ari Nasaret?” Philip lalu nyaut, “Aram tua meda.”

⁴⁷Lebuh Jesus meda Natanel mansang ngagai Iya, Iya lalu bejakuka pasal Natanel, “Tu baru orang Israel ke bendar, ke nadai nemu ngelakar!”

⁴⁸Natanel lalu nanya Iya, “Baka ni ku Nuan ngelala aku?” Disaut Jesus, “Aku endang udah meda nuan di baruh kayu ara nya tadi, sebedau Philip ngangauka nuan.”

⁴⁹ Natanel lalu nyaut Iya, “Pengajar, Nuan amat Anak Allah Taala! Nuan tu meh Raja orang Israel!”

⁵⁰Disaut Jesus, “Kati nuan arap laban Aku udah madahka Diri meda nuan di baruh kayu ara nya tadi? Nuan deka meda utai ti besai agi ari nya!”

⁵¹ Lalu ku Iya bejaku ngagai Natanel, “Enggau bendar Aku madah ngagai kita:[8] kita deka meda langit tebuka, lalu meda bala melikat Allah Taala nurun-niki ngagai Anak Mensia.”