Read Iban John 10 Bible Online

John 10 - Iban bible

John 10

¹“Enggau bendar Aku madah ngagai kita, orang ke enda tama ngagai kandang bedus nengah pintu, tang niki nengah jalai bukai, nya penchuri enggau perumpak.

² Tang orang ke tama nengah pintu nya pengibun bedus.

³Orang ke nyaga pintu, muka pintu ke iya. Raban bedus ninga nyawa iya, lalu iya ngangauka nama sida siku-siku, lalu nguluka sida pansut.

⁴Lebuh iya udah mai semua bedus iya pansut, iya lalu bejalai dulu ari sida, lalu sida nitihka iya, laban sida ngelala munyi nyawa iya.

⁵Sida enggai nitihka orang bukai, tang deka rari ari orang nya, laban sida enda ngelala munyi nyawa orang nya.”

⁶ Jesus nyebut sempama tu ngagai sida, tang sida enda meretika utai ti disebut Iya ngagai sida.

⁷Nya alai Jesus lalu bejaku baru ngagai sida, “Enggau bendar Aku madah ngagai kita: Aku tu pintu ke raban bedus.

⁸ Semua orang ke udah datai dulu ari Aku nya penchuri enggau perumpak, tang bedus enda mendingka sida.

⁹Aku tu pintu. Barang sapa tama nengah Aku, deka diselamatka, lalu iya deka tama, lalu pansut, lalu nemu padang rumput.

¹⁰Penchuri datai laban iya semina deka ngenchuri, munuh enggau ngerusak. Aku datai ngambika sida bulih pengidup, pengidup ti belipat-lipat.

¹¹ “Aku tu pengibun bedus ti badas. Pengibun bedus ti badas nyerahka nyawa diri ke bedus.

¹²Orang gaji ke ukai pengibun bedus sereta ukai bempu bedus, ninggalka bedus lebuh iya meda ukui kampung datai, lalu ukui kampung nerekam raban bedus lalu mambarka sida.

¹³Orang gaji nya rari laban orang gaji endang enggai ibuhka bedus nya.

¹⁴Aku tu pengibun bedus ti badas. Aku ngelala bedus Aku, lalu bedus Aku ngelala Aku,

¹⁵ baka Apai ke ngelala Aku, lalu Aku ngelala Apai; lalu Aku nyerahka nyawa Aku ketegal sida.

¹⁶ Aku bisi bedus ti bukai, ti ukai ari raban tu. Aku enda tau enda mega mai sida, lalu sida deka mendingka nyawa Aku. Nya alai sida deka nyadi siti raban, enggau siku aja pengibun.

¹⁷Nya meh kebuah Apai rinduka Aku, laban Aku nyerahka nyawa Diri, lalu ngambi nyawa nya pulai baru.

¹⁸ Nadai orang ulih ngambi[68] nyawa Aku ari Aku. Aku nyerahka nyawa Aku ari peneka Aku Empu. Aku bisi kuasa nyerahka iya, lalu Aku bisi kuasa ngambi iya pulai baru. Aku udah nerima pesan tu ari Apai Aku.”[69]

¹⁹ Orang Judah lalu beserekang penemu baru ketegal jaku nya.

²⁰ Mayuh sida nyebut, “Iya dirasuk antu, lalu udah gila! Nama kebuah kita mendingka Iya?”

²¹ Ku sida ti bukai bejaku, “Tu ukai jaku orang ke dirasuk antu. Kati antu ulih ngasuh orang ke buta meda?”

²² Lebuh maya nya Gawai Penyerah benung nyadi di Jerusalem. Musin lebuh maya nya endang musin chelap,

²³ lalu Jesus bejalai dalam Rumah Sembiang, dalam Serambi Solomon.

²⁴Nya alai orang Judah lalu begelumu ngelingi Iya, lalu bejaku ngagai Iya, “Ni pengelama Nuan mengkang enggai madah ngagai kami? Enti Nuan amat Kristus,[70] padahka ngagai kami enggau terang.”

²⁵ Disaut Jesus, “Aku udah madah ngagai kita, tang kita enda arap. Pengawa ti dikereja Aku dalam nama Apai Aku, besaksika pasal Aku,

²⁶ tang kita enda arap, laban kita ukai bedus Aku.

²⁷Bedus Aku mendingka nyawa Aku. Aku ngelala sida, lalu sida nitihka Aku.

²⁸ Aku meri sida pengidup ti meruan belama iya, lalu sida enda mati. Nadai orang ulih ngerampas sida ari jari Aku.

²⁹ Utai ti udah diberi Apai ngagai Aku besai agi ari semua utai bukai, lalu nadai orang ulih ngerampas sida ari jari Apai.[71]

³⁰ Kami Duai Apai endang siku.”

³¹ Orang Judah lalu ngambi batu baru, deka nuku Iya.

³²Jesus lalu nyaut sida, “Aku udah ngayanka mayuh bengkah kereja ti badas di mua kita ari Apai. Kereja ni ti ngasuh kita keran deka nuku Aku ngena batu?”

³³ Disaut sida, “Kami ukai deka nuku Nuan ngena batu ketegal pengawa ti badas ti dikereja Nuan, tang laban Nuan bejaku busung, laban Nuan, ke semina mensia aja, ngumbai Diri Allah Taala!”

³⁴ Disaut Jesus, “Kati jaku tu nadai ditulis dalam Adat kita: Ku Allah Taala bejaku, ‘Kita tu petara’?

³⁵Enti orang ke nerima jaku Allah Taala nya dikumbai ‘petara’ -- lalu jaku Bup Kudus endang enda ulih dibuai --

³⁶baka ni ku kita ngumbai Aku, ke udah dipilih lalu dikirumka Apai ngagai dunya, bejaku busung ketegal Aku madahka Diri Anak Allah Taala?

³⁷Enti Aku enda ngereja pengawa Apai Aku, anang meh kita arapka Aku.

³⁸Tang enti Aku ngereja pengawa Apai Aku, taja pen kita enda arapka Aku, kita patut arapka pengawa ti dikereja Aku, ngambika kita nemu sereta meretika[72] Apai bisi dalam Aku, lalu Aku dalam Apai.”

³⁹ Sida lalu sekali agi nguji nangkap Iya, tang Iya ngelechut ari jari sida.

⁴⁰ Iya lalu pulai baru meraka Sungai Jordan, ngagai endur alai John ke terubah maptisa orang, lalu diau dia.

⁴¹Mayuh orang datai ngagai Iya. Ku sida, “John nadai ngereja kereja ajih, tang semua utai ti disebut John pasal orang tu, amat magang.”

⁴² Lalu mayuh orang dia arapka Iya.